“Nwafwana kala alongi.” (Ayib. 5:12) Yindula e diambu edi: Yave una vo i Nlongi ona osundidi mu nsema wawonso okutubokelanga kimana twalonga e ludi kiandi kwa esi nzo, muna nkutakani yovo muna salu kia umbangi. Ediadi lau ye mbebe yampwena kikilu. Adieyi dilenda kutusadisa mu lungisa e mbebe yayi?

E mvutu zina muna mvovo mina Paulu wa ntumwa kasonekena Timoteo: “Kwamanana kuyivana muna tangila nkangu e sono yavelela, kubakasakesa yo kubalonga.” Paulu wakudikila vo: “Kadi muna vanga wo okuyivuluza ye awana bekuwanga.” (1 Tim. 4:13, 16) E nsangu osamunanga mioyo mia wantu zivuluza. Muna kuma kiaki, ofwete sia ngolo za tomesa e mpil’aku ya tangila yo longa. Finkanda fiafi fiakubikilu mu kusadisa mu vanga wo. Tala e maka mambu mena mo.

Yave i ‘Nlongi Anene.’ (Yes. 30:20) Kana una vo finkanda fiafi fikusadisa mu tomesa e mpil’aku ya tangila yo longa, kufwete vilakana ko vo Yave i Tuku dia nsangu tusamunanga, yandi otuntanga o wantu kimana bansadila. (Yoa. 6:44) Muna kuma kiaki, lombanga mwand’avelela muna sambu. Toma sadilanga e Diambu dia Nzambi. Sadisa wantu basia sungididi kwa Yave, ke kwa ngeye ko. Sadisa awana olonganga kimana bayima o zola muna Yave.

Nzambi wabokela yo kuvana kiyekwa kia longa o wantu e nsangu zisundidi o mfunu. Avo obundidi e vuvu muna “ngolo kevananga o Nzambi,” tuna ye ziku vo okituka nlongi ambote.—1 Pet. 4:11.

Akwaku Alongi,

Buka kia Selo Yambuta ya Mbangi za Yave