KUNKU KIA 1
‘Vava Ivava Dina Diavila’
E meme ditungiane. Ekolo didianga e titi muna nzanza, divavukidi ekambi. Owau ke dina mona diaka ekambi ko ngatu mvungudi. O kuma kubwitidi. Ekolo ditungiananga muna ndimba uviokelanga bulu ya nsisi, ka dilendi kuyitanina ko. I bosi, diwidi ndinga ina dizeye, nding’a mvungudi ona okwiz’a mvavinge, umbakidi unzingidi muna mvwatu miandi yo kunata ku nzo.
NKUMBU MIAYINGI, Yave okuyitezanesanga yo mvungudi ndioyo. Okutusikidisanga muna Diambu diandi vo: “Omono, mono kwame ntomba mameme mame, yo kubayandala.”—Yezekele 34:11, 12.
“Mameme M’edilu Diame”
Aki nani i mameme ma Yave? Muna mvovo miankufi, e mameme ma Yave i nkangu ukunzolanga yo kunsambila. Nkand’a Nzambi uvovanga vo: ‘Yambula twakunda yo yizama; twafukamèna Yave wa mvangi eto: Kadi yandi i Nzambi eto, oyeto tu nkangu a madilu mandi, ekambi dia koko kwandi!’ (Nkunga 95:6, 7) Nze meme dilandanga mvungudi, asambidi a Yave bena ye luzolo lwa landa Mvungudi au. Nga ke besumukanga ko? Ve. Ezak’e ntangwa, selo ya Nzambi bekalanga nze “mameme mamwanganini,” “mameme mavila,” ‘mameme matungiana.’ (Yezekele 34:12; Matai 15:24; 1 Petelo 2:25) Kana una vo i wau, vava muntu kevengomokanga, Yave ke kunyambulanga ko ngatu dimbula e vuvu.
Nga Yave wakinu Mvungudi aku? Aweyi Yave kekadilanga se Mvungudi o unu? Badika mpila tatu:
Okutudikilanga muna mwanda. Yave wavova vo: “Ikubavungula van’edilu diambote,” “kuna bebubamena muna mpak’ambote, van’edilu diambote bevungulwa.” (Yezekele 34:14) Yave keyambulanga kutuvana madia ma mwanda ko muna ntangwa ifwene. Nga olenda sungamena longi diavaika muna nkanda mieto, longi dia nkangu yovo video yavana e mvutu za sambu yaku? Nga diadi ke diakwikidisa ko vo Yave okuvwanga kikilu o mfunu?
Okututaninanga yo Kutusadisa. Yave osianga nsilu vo: ‘Ivutula eki kiayingwa, yo kang’eki kiatoloka yo kumik’eki kiayela.’ (Yezekele 34:16) Yave okumikanga awana bayoya yovo awana betelamwanga o moyo. Ofiaulwisanga mameme mandi muna kubasadisa bawukwa vava belwekwanga, dilenda kala vo kwa akwau akwikidi. Ovutulanga awana bayivambula ye kambi ana benwananga ye ngindu zalembi songa.
Ozeye wo vo mbebe kena yau oku kwa yeto. Yave wavova vo: “Nyandala mameme mame; ikubakôla muna fulu yawonso ina bamwanganini,” “vava ivava eki kiavila.” (Yezekele 34:12, 16) Kuna kwa Yave e meme diavila ke diavila mvimba ko. Ozayanga vava meme divilanga, ovavanga dio yo yangalala vava kesololanga dio. (Matai 18:12-14) Vana ntandu, oyikilanga asambidi andi akieleka vo “mameme mame, o mameme m’edilu diame.” (Yezekele 34:31) Ongeye mpe u mosi muna mameme mama.
Kuna kwa Yave ememe diavila ke diavila mvimba ko. Oyangalalanga vava kesololanga ememe diandi
‘Nungununa Lumbu Yeto nze Kuna Nz’ankulu’
Ekuma Yave kekuvavilanga yo kubokela vo wavutuka kwa yandi? Kadi ozolele vo wakala ye kiese. Yave osianga nsilu vo “mukala mvula za nsambu” muna mwina mameme mandi. (Yezekele 34:26) O nsilu wau wakieleka. Ongeye kibeni wamona kala e ziku kia diambu diadi.
Sungamena una wamona vava wazaya Yave. Kasikil’owu, aweyi wamona vava walongoka mu nkumbu antete e ludi mu kuma kia nkumbu a Nzambi ye kani diandi mu kuma kia wantu? Nga osungamene una wafiaulwisilwanga mu kala kumosi ye akwaku Akristu muna tukutakanu twa zunga ye twa mvivu? Nga kwavutuka ku nzo ko ye kiese yo yangalala vava wasamuna e nsangu zambote kwa muntu wasonga luzolo lwambote?
Olenda vutukila e kiese kiaki. Selo ya Yave kuna nz’ankulu basamba vo: ‘Utuvilul’oko wina, e Yave, tuviluka; nungununa lumbu yeto nze kuna nz’ankulu.’ (Maniongo ma Yeremiya 5:21) Yave wavana e mvutu za sambu kiau. O nkangu andi wavutuka kunsambila ye kiese kiawonso. (Nekemiya 8:17) Yave i diau mpe kevanga kwa ngeye.
Kieleka, diasazu mu vova vo ivutuka kwa Yave, kansi diampasi mu vanga wo. Badika maka mambu malenda kukakidila mu vutuka kwa Yave ye una olenda mo sundila.
