Vena ye sambu ke ivaninwanga mvutu ko kwa Nzambi. Badika kuma yole ilenda fila Nzambi mu lembi vana mvutu za sambu.

1. Sambu ke kina ngwizani ko yo luzolo lwa Nzambi

 Nzambi ke vananga mvutu za sambu ke ina ngwizani ko yo luzolo lwandi yovo ye Diambu diandi. (1 Yoane 5:14) Kasikil’owu, Nkand’a Nzambi uvovanga vo ke tufwete kala akwa loko ko. Katufwete soka ngatu yikama nsaka za vwila nzimbu olembele sala ko. (1 Korinto 6:9, 10) Nzambi ke kuvana ko avo ulombele kimana wanunguka muna nsaka za vuila nzimbu olembele sala (loteria). Nzambi ke nlungisa konso diambu tuzolele ko. Tufwete vutulanga matondo wau vo Nzambi ke vananga mvutu za sambu yawonso ko ivangwanga. Kele vo kavangingi wo ko, mpasi twadi mweswa muna mambu belombanga wantu akaka kwa Nzambi.—Yakobo 4:3.

2. Mavangu ma muntu ke mena ngwizani ko yo luzolo lwa Nzambi

 Nzambi ke wanga nsambu ya wantu bevanga mambu mekunkendelekanga ko. Muna bonga e nona, Nzambi wavovesa awana bavovanga vo yandi basambilanga vo: ‘Kana nusamba nsamba zayingi, kiwa kwame ko: o moko meno mazele yo menga.’ (Yesaya 1:15) Kansi, diavavanga vo baviluka o ntima kimana basingika ngwizani au yo Nzambi yo wá e sambu yau.—Isaías 1:18.