Mungu omve ’ba suru dria ma alea ’diyi esizoru ivu enyia ogogo izita si. (Zaburi 65:2) Te erini kaniku a’ini izita dria ku. Eceta si, agupi oku iniri ni candi fepiri ma izita ngani ovu irizaru ku. (1 Petero 3:7) Dika, Mungu ga ndra izita ’ba Israeli ru ’diyi niri eriko si eyini muzu drile e’yo onzi ’yezu risi. ’Di e’da di nditiri kini, Mungu ziza eri drileba azi amboru ni. Tro erini ovuzu ’dini ti, Mungu ni vini izita ’ba ezata ambo ’diyi ezapi ’diyi pini ri a’i ra kaki ezata eyini ri oga asi driasi ria.—Mi la Isaya 1:15; 55:7.

Izita ni ovuzu woko inzita amani rini risi, le ama ma iziki lu ama O’bapi Yehova vu a’dule. (Matayo 4:10; 6:9) Vini indi, amani ovuzu eza’ba ni risi, le ama ma iziki ru Yesu niri si a’dusikuni dra ezata amani si. (Yohana 14:6) Yehova le ni ama ma omviki izita ama omia kaniku ’bani si buku ma alea ’diyi ki toko toko ku. Le ama ma iziki engazu ama asia.—Mi la Matayo 6:7; ’Ba Filipia ’Diyi 4:6, 7.

O’bapi amani ri eco vini izita amani izi ama asia ri eri ra. (1 Samueli 1:12, 13) A’i ama i zizu sawa driasi, ekile obiti si azini ondresi, sawa nyaka dria, azini sawa amani dri fuzu e’yo ewaru be risi.—Mi la Zaburi 55:22; Matayo 15:36.

Esizoru Mungu vu enyia ri ovuni ewa koko ku a’dusikuni ’ba amani o’azu eyi ma eselea ’diyi ma a’ita Mungu ma dria oyo erini so asianzu ejizu nyakua ri be ri yo. (2 Timoteo 3:1, 4;  2 Petero 3:3, 13) Ani e’yo ’disi aleki asi omiza isu engazu ’ba amani okuzuru yi pie tualu ’diyi pi vu, eyini vini le ama vu rile.—Mi la ’Ba Ebraniani 10:24, 25.

Okuzuru ’ba Mungu ni lepi ’diyi pie ri ama aza ko esizoru Mungu vu enyia ogogo. Okuta okuzuru ’Ba Yehova ma E’yo Eti Nzepi ’Diyi pie ri amani drileba fe orodri isuzu a’ita ’ba azi ’diyi pini ri ma alea.—Mi la ’Ba Rumia ’Diyi 1:11, 12.

Mi eco mi esi Yehova vu enyia ogogo mini asisile drozu afa mini oni E’yo erini ri ma alea ri ma dria risi. Mi ega e’yo afa mini eco oni ’yeta erini, imbata, azini oyo soza erini pie ’diyi ma dria. Mungu ziza pi asisile droza be eyi nga ama aza ko leta azini ondua Munguni ri ma orodri nezu.—Mi la Yosua 1:8; Zaburi 1:1-3.

Mi eco mi esi Mungu vu enyia ogogo mini asi azini a’ita mini ’bazu eri ma dria risi. Te a’ita eri ekile afa idri be nyaka lepi ra rile. Ani le sawa dria si mi ma izo a’ita mini ri mi ni asisile drozu afa mini a’ita nde ’bazu eyi ma dria ’diyi ma e’yo si risi.—Mi la Matayo 4:4; ’Ba Ebraniani 11:1, 6.

Yehova asi ’ba i lepi ’diyi si ra. Eco eyi ma ta mba afa dria lepi eyi ma a’ita azini asi ’baza idri ’dani ’dani ri ma dria ri ezapi ’diyi si ra. (Zaburi 91:1, 2, 7-10) Eri ama bilendu li geri onzi ama rua ni azo fepi azini ayiko ezapi ’diyi si. Yehova ni amani geri o’azu kilili ru ndepi ni ri imba ni.—Mi la Zaburi 73:27, 28; Yakobo 4:4, 8.