Lipaki za Jehova habaezangi mukiti wa kuhupula lizazi la kupepwa kabakala kuli lulumela kuli mikiti yecwalo haitabisi Mulimu. Nihaike kuli Bibele haibuleli ka kunonga kuli haluswaneli kuezanga mukiti wa kuhupula lizazi la kupepwa, ilutusa kuziba lika zeñwi ka za mikiti yeo ni kuziba mwaangela Mulimu mikiti yecwalo. Halunyakisiseñi mabaka amane halusa ezangi cwalo ni likuka za mwa Bibele zeswalisana ni taba yeo.

1.   Mukiti wa kuhupula lizazi la kupepwa usimuluha kwa bulapeli bwa buhata. Ka kuya dikishinari ya Funk & Wagnalls Standard Dictionary of Folklore, Mythology, and Legend, mukiti wo usimuluha fa tumelo ya kuli fa lizazi lapepwa mutu, “mioya yemaswe yakona kutaseza mutu yo” mi “haiba kuba ni balikani ni batu babañwi babalakaleza bunde mutu yo, wakona kusilelezwa.” Buka ya The Lore of Birthdays, ibulela kuli kwakale, kubuluka litaba zebonisa mazazi a kupepwa “ne li [kwa] butokwa hahulu mwa ku panga siswaniso sa linaleli” ka kulatelela “tuto ya bunuhi bo bu tomile fa linaleli.” Buka yeo iekeza kubulela kuli “batu nebalumela kuli makandela a fa lizazi la kupepwa, akona kutahisa kuli lika zebalakaza liezahale ka mabibo.”

    Kono Bibele hailumelezi kuitusisa mabibo, kulaula, kuba ni tumelo ya mioya, kamba ‘kueza [nto ifi kamba ifi] yecwalo.’ (Deuteronoma 18:14; Magalata 5:19-21) Mane libaka leliñwi lene litahisize kuli Mulimu afe koto muleneñi wa Babilona wakale kikuli, batu bane bapila mwa muleneñi wo nebanuha ka linaleli, ili mufuta omuñwi wa bulauli. (Isaya 47:11-15) Nihaike kuli Lipaki za Jehova hababatangi kuziba lisimuluho za lizo kaufela zekona kubateñi, Mañolo halufa ketelelo yenongile ka za teñi, lwalatelelanga zabulela.

2.   Bakreste ba kwa makalelo nebasa ezangi mukiti wa kuhupula lizazi la kupepwa. Hatiso yebizwa World Book Encyclopedia ibulela kuli Bakreste “ne b’a nga kuli ku eza mukiti wa lizazi la ku pepwa kwa mutu ufi kamba ufi ki sizo sa sihedeni.” Bibele ibonisa kuli baapositola ni balutiwa babañwi bane balutilwe ki Jesu kasibili, batomile mutala obaswanela kulikanyisa Bakreste kaufela.​—2 Matesalonika 3:6.

3.   Lizazi feela lebaswanela kuhupulanga Bakreste ki lizazi lanaashwile Jesu, isiñi lizazi lanaapepilwe. (Luka 22:17-20) Taba yeo haikomokisi, kakuli mane Bibele ibulela kuli “lizazi la kushwa lifita lizazi la kupepwa.” (Muekelesia 7:1) Kwa mafelelezo a bupilo bwahae bwa fa lifasi, Jesu naaikezelize libizo lelinde ni Mulimu ka kueza lika zenetahisize kuli lizazi lanaashwile libe la butokwa hahulu kufita lizazi lanaapepilwe.​—Maheberu 1:4.

4.   Bibele haibonisi kuli kunani mutangaa Mulimu yakile aeza mukiti wa kuhupula lizazi lahae la kupepwa. Haki kuli mwendi bañoli ba Bibele nebalibezi feela kuñola litaba zecwalo mwateñi kakuli mane mwa Bibele kuñozwi za batu bababeli bane baezize mikiti ya kuhupula mazazi abona a kupepwa, mi batu bao nebasa sebelezi Mulimu. Nihakulicwalo, litaba zeneezahezi fa mikiti yeo neli zemaswe luli.​—Genese 40:20-22; Mareka 6:21-29.

 Sina feela bashemi babañwi kaufela, Lipaki za Jehova babonisanga kuli balata bana babona silimo kaufela, inge cwalo ka kubafanga limpo ni kuya kwa sibaka sesiñwi kuyo itabisa. Baezanga mobakonela kaufela kulikanyisa mutala omunde wa Mulimu, yena yafanga bana bahae limpo zende niha basika libelela. (Mateu 7:11) Bana ba Lipaki za Jehova habaikutwi kuli kunani lika zeñwi zebayawa, sina feela babañwi ku bona mobataluselize mwa litaba zelatelela:

•   Musizana wa libizo la Tammy, yanani lilimo ze 12, utalusa kuli: “Nibanga ni tabo yetuna hanifiwanga mpo ka kusalibelela.”

•   Mushimani wa libizo la Gregory, yanani lilimo ze 11, utalusa kuli: “Nihaike kuli hanifiwangi limpo fa lizazi lene nipepilwe, bashemi baka banilekelanga limpo fa mazazi amañwi. Nibanga ni tabo habaezanga cwalo kakuli nalata kufiwa mpo nisika libelela.”

•   Mushimani wa libizo la Eric, yanani lilimo ze 6, utalusa kuli: “Kana munahana kuli kuca tusikono tusikai, ni kuteeleza kwa lipina mwa mizuzu yelishumi ki mukiti? Mutahe kwa ndu yaluna mi mukato iponela mukiti wa luli!”