LITIMANA ZA MWA BIBELE ZETALUSIZWE

Maroma 10:13—“Yakabiza fa Libizo la Mulena”

MUBAPALE

“Mutu kaufela yabiza fa libizo la Jehova ukapiliswa.”—Maroma 10:13, Bibele ya Toloko ya Lifasi Lelinca.

“Mutu ufi kamba ufi yakabiza fa libizo la Mulena ukapiliswa.”—Maroma 10:13, Bibele ya King James Version.

Taluso ya liñolo la Maroma 10:13

Mulimu haana ketululo, mi ufa batu kaufela kolo ya kupiliswa ni kufumana bupilo bobusa feli kusina taba ni naha koba pila, mubala wa litalo labona, kamba mayemo abona mwa silalanda. Nihakulicwalo, luswanela kubiza fa libizo la Jehova, lona libizo la Mulimu Yamaata Kaufela a kuli lutusiwe.—Samu 83:18.

Mwa Bibele, pulelo ya kuli, “yakabiza fa libizo la Jehova” haitalusi feela kuziba libizo la Mulimu ni kuitusisa lona halu mulapela. (Samu 116:12-14) Ikopanyeleza kusepa Mulimu ni kuitinga ku yena kuli alutuse.—Samu 20:7; 99:6.

Libizo la Mulimu neli la butokwa ku Jesu Kreste. Mwa tapelo yahae yeli mutala, manzwi apili anaabulezi, ali: “Ndataa luna ya kwa mahalimu, libizo lahao likeniswe.” (Mateu 6:9) Jesu hape naabonisize kuli luswanela kuziba Jehova, kumuutwa, ni kumulata kuli lufumane bupilo bobusa feli.—Joani 17:3, 6, 26.

Ki kabakalañi halubulela kuli Jehova ki yena “Mulena” yabulezwi kwa Maroma 10:13 mwa Bibele ya King James Version? Bakeñisa kuli manzwi a kwa Joele 2:32 akutezwi kubulelwa mwa timana ye, ili ko libizo la Mulimu, isiñi lilumbatina la “Mulena,” liñozwi mwa puo ya Siheberu ya kwa makalelo. b

Litaba zeñwi zeswalisana ni litaba ze kwa Maroma 10:13

Kwa liñolo la Maroma kauhanyo 10, Bibele ibonisa kuli mutu ukona feela kuba ni silikani sesinde ni Mulimu haiba abonise tumelo ku Jesu Kreste. (Maroma 10:9) Litaba zeñata za kwa Testamente Yakale zekutezwi kubulelwa, libonisa buniti bwa taba yeo. Mutu ubonisa kuli unani tumelo ka ‘kushaela fapilaa nyangela,’ mi kueza cwalo kuama kushaela taba yende ya puluso kwa batu babasi balumeli. Kueza cwalo kutusa batu babañwi kuba ni kolo ya kuba ni tumelo yekatahisa kuli bapiliswe.—Maroma 10:10, 14, 15, 17.

Mubale Maroma kauhanyo 10 hamoho ni litaluso ze kwatasi, mi mubone ni mañolo abonisizwe fa litaku zelibisa kwa mañolo amañwi.

a Libizo la Mulimu lifumaneha ibato ba ha 7,000 mwa miputo ya Bibele ya kwaikale. Mwa Siheberu, libizo la Mulimu liyemelwa ki litaku zeene, zebizwa Tetragrammaton. Mwa Silozi, libizo leo lizibahala hahulu kuli ki “Jehova,” kono licaziba babañwi bona batabela kuitusisa libizo la “Yahweh.”

b Kubonahala kuli Bakreste bane bañola Bibele nebaitusisize libizo la Mulimu hane bakutezi kubulela manzwi a kwa “Testamente Yakale” mokunani libizo leo. Hatiso ya The Anchor Bible Dictionary, ibulela kuli: “Kunani bupaki bobubonisa kuli litaku zeene zeyemela libizo la Mulimu, libizo la Mulimu, Yahweh, nelifumaneha mwa litaba zeñwi kamba mwa litaba kaufela za mwa Testamente Yakale zenekutezwi kubulelwa mwa Testamente Yenca ka nako yene liñozwi litaba za mwa Testamente Yenca.” (Volyumu 6, likepe 392) Kuli muzibe litaba zeñata, mubone taba yeli, “Libizo la Mulimu Mwa Mañolo A Sigerike A Sikreste” ye mwa litaba zeekelizwe, A5, mwa Bibele ya Tokolo ya Lifasi Lelinca [Bibele ya kuituta]. Mwa litaba zeekelizwe, C2, kunani mukoloko wa Libibele zeitusisize libizo la Mulimu kwa Maroma 10:13.