Linyalo la Mina la Kona ku Silelezwa

Bañi ba ndu ba lumela kuli ndu ya bona ha i sa bonahala hande, kono ba ikatulela ku i lukisa.

KANA mwa tabela ku eza nto ye swana ka za linyalo la mina? Haiba ku cwalo, mu ka kala cwañi? Mu like liakalezo ze latelela.

1 Mu ikatulele za ku eza.

Mu lumelelane ni bakumina kuli mu ka sebelisana hamoho kuli mu kutise sinca kozo mwa linyalo la mina. Mu like ku ñola likatulo za mina fa pampili. Haiba mina ni bakumina mu swalisana hamoho, mu ka yangwela linyalo la mina.—Muekelesia 4:9, 10.

2 Mu tongole butata.

Ki butata mañi bo bu icocomelize mwa linyalo la mina? Mwa mubamba u li muñwi, mu ñole ze mu sa ezi kamba ze mu lakaza kuli kambe za cinca. (Maefese 4:22-24) Ki niti kuli, butata bo mu ka tongola mwendi bu ka shutana ni bo ba lemuhile bakumina.

3 Mu tome sikonkwani.

Ki licinceho mañi ze mu bata kuli li be teñi mwa linyalo la mina hamulaho wa likweli ze silezi? Mu ñole sikonkwani sa mina fa pampili. Ha mu ka ziba hande ze mu tokwa mwa linyalo la mina, ku ka mi bela bunolo ku peta sikonkwani se mu itomela.—1 Makorinte 9:26.

 4 Mu sebelise kelezo ya Bibele.

Ha se mu tongozi butata bo mu na ni bona ni ku ziba licinceho ze mu tokwa ku eza, mu nangele mwa Bibele kuli i mi eleze. Likuka za Bibele li tusa nako kaufela, mi ha li cinci. (Isaya 48:17; 2 Timotea 3:17) Ka mutala, Bibele i susueza mina ni bakumina kuli mu no swalelana. Mane Bibele i bulela kuli, ‘ha mu swalela ba ba mi foselize, mu ka bubana.’—Liproverbia 19:11; Maefese 4:32.

Buikatazo bwa mina niha bu ka bonahala kwa makalelo inge bo bu sa peti se siñwi, mu si ke mwa zwafa! Buka ye bizwa The Case for Marriage i biha piho ye susueza ye ne fumanwi mwa patisiso ye ñwi ye ne ezizwe, i li: “Taba ye komokisa kikuli: 86 pesenti ya batu ba ba nyalani ba ba si na tabo, ili ba ba zwelangapili mwa manyalo a bona ku si na taba ni matata, ba fitanga fa ku lemuha kuli, hamulaho wa lilimo ze ketalizoho, ku banga ni tabo ye tuna mwa manyalo a bona.” Nihaiba batu ba ba nyalani ba ba bulelanga kuli bona ha ba na tabo ni ye kana, ba fitanga fa ku ba ni tabo.

Mwendi ku kona ku ezahala cwalo ni ka za linyalo la mina. Bahatisi ba magazini ye, bona Lipaki za Jehova, ba fumani kuli Bibele i na ni likuka ze na ni tuso kwa batu ba ba nyalani. Ka mutala, manyalo a mañata a kondanga muta batu ba ba nyalani ba bonisana musa, ba utwelana butuku, ni ku swalelana. (Maefese 4:32) Basali ba ba nyezwi ba itutile butokwa bwa ku bonisa “moya o na ni musa ni bunolo,” mi baana ba fumana lituso ze tahiswa ki ku sa halifelanga basali ba bona.—1 Pitrosi 3:4; Makolose 3:19.

Likuka za mwa Mañolo ze, li tusa hahulu kakuli Musimululi wa Bibele, yena Jehova Mulimu, ki yena ya na tomile linyalo. Haiba mu bata litaba ze ñata za mo i kona ku mi tuseza Bibele mwa linyalo la mina, mwa kona ku buza Lipaki za Jehova. *

[Litaluso za kwatasi]