“Nese lunyalani ni bo Sophia * ka lilimo ze 39 habatelwa ki butuku bone bubabulaile. Balikani baka nebanitusize hahulu, mi neniipatehisanga kuli nisike nahupula bo musalaaka. Kono nenizwezipili kuutwa butuku bo, silimo mukatumbi. Neniikutwanga kuli hanikoni kutiyela muinelo wo. Nihaiba hamulaho wa lilimo zetaalu kuzwa fone batimelezi bo Sophia, nisautwanga hahulu butuku fokuñwi, mi hañata niutwanga cwalo ka kusalibelela.”—Bo Kostas.

Kana mushwezwi ki mutu yemulata? Haiba ki cwalo, mwendi mwautwisisa mobaikutwela bo Kostas. Butuku bwautwanga mutu hashwelwa ki muuna hae kamba musalaa hae, kamba hashwelwa ki mutu yomuñwi wa mwa lubasi, kamba mane hashwelwa ki mulikanaa hae, bubanga bobutuna hahulu kufita butuku bobukona kutahiswa ki miinelo yemiñwi yetaata. Licaziba babaitutile za butuku bobutahiswanga ki kushwelwa, ni bona balumelelana ni taba yeo. Taba yeñwi yenehatisizwe mwa The American Journal of Psychiatry neibonisize kuli “batu habashwelwa ki mutu yebalata, baikutwanga kuli habasana kumubona hape kuya kuile mi baikutwanga hahulu butuku.” Mutu yaikutwanga butuku bobutuna cwalo, ukona kuipuza kuli: ‘Nikaanga nako yekuma kai inze niikutwa cwana? Kana nikaba ni tabo nako yeñwi hape? Ki nto mañi yekona kunitusa?’

Mwa magazini ye ya Muzuhe!, lukanyakisisa likalabo kwa lipuzo zeo. Mwa taba yetatama lukanyakisisa miinelo yemukona kukopana ni yona haiba kihona musazo shwelwa. Hape mwa magazini ye, lukanyakisisa litaba zeñwi zekona kumitusa kusaikutwa hahulu butuku hamushwezwi.

Lusepa kuli litaba zelatelela lika miomba-omba mi likatusa mutu ufi kamba ufi yautwa butuku bwa kushwelwa.