Kuli muzibe hande mutu yomuñwi, mukatokwa kuziba zapetile mutu yo ni matata atiyezi. Ka nzila yeswana, haiba mubata kuziba hande Mulimu, mutokwa kuziba zaezize. Hamunze muziba zaezize Mulimu, mukalemuha kuli uezize lika zeñata zelutusa ka nako ya cwale ni zekalutusa hahulu kwapili.

Jehova Mulimu ki Mubupi Yomutuna, mi “tulemeno twa Mulimu totusa bonahali tuiponahalela hande haisamba lifasi liezwa, kakuli tulemuhiwa ka lika zeezizwe.” (Maroma 1:20) “Ki yena Muezi wa lifasi ka maata ahae, yena yatiisize naha ka butali bwahae ni kuyandulula mahalimu ka kutwisiso yahae.” (Jeremia 10:12) Lika zekomokisa zabupile Mulimu ni zona libonisa kuli Mulimu walulata.

Munyakisise mo Jehova atahiselize kuli luikole bupilo ka kulubupa “ka siswaniso sahae.” (Genese 1:27) Taba yeo italusa kuli Mulimu ulubupile ka nzila yelukonisa kumulikanyisa ka kubonisa tulemeno twahae totuipitezi. Ulubupile ka nzila yelutusa kuutwisisa mibonelo ni likuka zahae. Halunze luikataza kupila ka likuka za Mulimu ni kuunga lika mwalingela, lukaba ni tabo yetuna mi lukaikola bupilo. Mi sa butokwa ni kufita, ulubupile ka nzila yelukonisa kuba ni silikani ni yena.

Lika zabupile Mulimu fa lifasi, libonisa mwalulatela. Muapositola Paulusi naañozi kuli Mulimu “naasika itulela feela asina bupaki kakuli naaezize bunde, ka [kulufa] pula yezwa kwa lihalimu ni linako za siselo, [alukulisa] ka lico ni kutaza lipilu [zaluna] ka tabo.” (Likezo 14:17) Mulimu ulufile lika zeñata hahulu kufita zelutokwa. Ulufile lika zeñata zeshutana-shutana ili zelukonisa kuikola bupilo. Taba yeo ibonisa kuli Mulimu ukaluezeza lika zeñata hahulu kwapili.

 Jehova naabupile lifasi ilikuli batu bapile ku lona kuya kuile. Bibele ibulela kuli: “Lifasi ulifile bana ba batu,” mi ‘naasika libupa feela kusina mulelo, kono naaliezize kuli liyahiwe.’ (Samu 115:16; Isaya 45:18) Ki bo mañi babaswanela kuyaha mwa lifasi, mi bakapila nako yekuma kai? “Babalukile bakaluwa lifasi, mi bakapila ku lona kuya kuile.”—Samu 37:29.

Bakeñisa mulelo wahae wo, Jehova naabupile muuna ni musali bapili, ili Adama ni Eva, mi ababeya mwa paradaisi fa lifasi ‘kuli bailime ni kuibabalela.’ (Genese 2:8, 15) Mulimu naafile Adama ni Eva misebezi yetabisa hanaababulelezi kuli: “Mupepe mi muate, mutaze lifasi mi mubuse fahalimwaa lona.” (Genese 1:28) Kacwalo, Adama ni Eva nebanani sepo ya kupila kuya kuile fa lifasi. Ka bumai, nebaiketezi kusautwa Mulimu mi kabakaleo balatehelwa ki sepo ya kuba mwahalaa “babalukile” ‘babaka luwa lifasi.’ Sina molukaitutela, zanaaezize Adama ni Eva nelisika tahisa kuli Jehova acince mulelo wahae ka za batu. Kono halukaleñi ka kunyakisisa zaezize Mulimu kuli alutuse.

Bibele hape ibizwa kuli ki Linzwi la Mulimu. Ki kabakalañi Jehova hanaalufile Bibele? Libaka lelituna ki la kuli luitute ka za hae. (Liproverbia 2:1-5) Ki niti kuli Bibele haikoni kualaba lipuzo kaufela zelukana lwabuza ka za Mulimu, mi hakuna feela buka yekona kueza cwalo. (Muekelesia 3:11) Nihakulicwalo, lika kaufela zeñozwi mwa Bibele lilutusa kuziba hande Mulimu. Lwaziba mwainezi Mulimu bakeñisa mwasebelisanela ni batu. Lwaziba batu batabela Mulimu ni basatabeli. (Samu 15:1-5) Lwaziba mwangela lika zeama bulapeli, muzamao, ni lika za kwa mubili. Mi halunyakisisa litaba zanaabulezi Jesu ni likezo zahae, zeñozwi mwa Bibele, lufita fa kuziba hande tulemeno twa Jehova.—Joani 14:9.

Libaka leliñwi Jehova hanaalufile Linzwi lahae, yona Bibele, ki kuli luzibe molukona kubela ni tabo mwa bupilo ni kuziba zelupilela. Mwa Bibele, Jehova ulubulelela molukona kubela ni tabo mwa lubasi, molukona kupilela ka kukolwa ka lika zelunani zona, mane ni molukona kutalimanela ni matata mwa bupilo. Mi sina moikaboniseza magazini ye, Bibele inani likalabo kwa lipuzo za butokwa za mwa bupilo, zecwale ka za kuli: Ki kabakalañi hakunani manyando amañata mwa lifasi? Kukaezahalañi kwapili? Bibele hape ibulela zaezize Mulimu kuli ataleleze mulelo wahae.

Kunani litaba zeñwi zebonisa kuli Bibele ki buka yeipitezi mwa linzila zeñwi zeñata mi ki buka yezwa ku Mulimu. Bibele neiñozwi mwahalaa lilimo ze 1,600 ki batu bababato eza 40, nihakulicwalo, litaba kaufela zeñozwi mwa Bibele zalumelelana mi libulela taba iliñwi yetuna, mi kucwalo kakuli Mulimu ki yena Musimululi wayona luli. (2 Timotea 3:16) Ka kushutana ni litaba zeñwi za kwaikale, Bibele isanani litaba zenepahezi, mi yalumelelana ni miputo ya Bibele yemiñata-ñata ya kwaikale. Sa butokwa ni kufita ki kuli Bibele izwezipili kubateñi kusina taba kuli batu babañwi nebabata kuli isike yatolokiwa, kuabelwa, kamba kubaliwa. Bibele ki yona buka yeabelwa ni kutolokiwa hahulu kacenu. Kufumaneha kwa Bibele ki bupaki bobubonisa kuli “linzwi la Mulimu waluna liina kuya kuile.”—Isaya 40:8.

Mulimu uezize nto yeñwi hape yetuna yebonisa kuli mulelo wahae ka za batu ukatalelezwa luli. Sina mokutaluselizwe kwa makalelo, Mulimu ubata kuli batu bapile kuya kuile fa lifasi. Nihakulicwalo, bakeñisa kuli Adama naasika utwa Mulimu mi naaezize sibi, yena ni bana bahae bane bakapepwa nebalatehezwi ki kolo ya kupila kuya kuile. “Sina sibi hasikeni mwa lifasi ka mutu alimuñwi ni lifu halitile ka sibi, mi ka mukwa ocwalo lifu layamba kwa batu kaufela kakuli kaufelaa bona baezize sibi.” (Maroma 5:12) Adama hanaasika utwa Mulimu, nekubonahala inge kuli mulelo wa Mulimu ka za batu neukapala. Jehova naaezize cwañi?

Zanaaezize Jehova zalumelelana ni tulemeno twahae. Ka kulatelela katulo yahae yelukile, naafile Adama ni Eva mulatu kabakala zene baezize, kono hape naalukisize nzila yeñwi yeneka tusa bana bane bakapepwa kwapili. Ka kuitusisa butali  bwahae, Jehova naalukisize mwanaaka tatululela muinelo wo, mi abulela mwanaaka ezeza cwalo. (Genese 3:15) Jesu Kreste, yena mwanaa Mulimu, ki yena yanaaka itusiswa kwa kuliulula batu kwa sibi ni lifu. Taba yeo neiamañi?

Kuli aliulule batu kwa matata atahisizwe ki kusa utwa kwa Adama, Jehova naalumile Jesu fa lifasi kuto luta batu nzila ya bupilo ni kuto fa “bupilo bwahae sina tiululo kuli aliulule babañata.” * (Mateu 20:28; Joani 14:6) Jesu naakona kufa tiululo bakeñisa kuli neli mutu yapetahalile sina Adama. Kono ka kushutana ni Adama, Jesu naazwezipili kuutwa Mulimu kuisa lifu. Bakeñisa kuli Jesu naasa swaneli kushwa, Jehova naamuzusize kwa bafu kuli ayo pila kwa lihalimu. Jesu naakona kueza zanaapalezwi kueza Adama, ili kutusa batu babautwa Mulimu kuba ni sepo ya bupilo bobusa feli. “Kakuli sina babañata hababile baezalibi kabakala kusautwa kwa mutu alimuñwi, ka mukwa oswana babañata bakaba babalukile kabakala kuutwa kwa mutu alimuñwi hape.” (Maroma 5:19) Ka sitabelo sa tiululo sa Jesu, Mulimu ukataleleza mulelo wahae wa kuli batu bapile kuya kuile fa lifasi.

Luituta zeñata ka za Jehova halunyakisisa mwanaatatululezi butata bone butahisizwe ki kusautwa kwa Adama. Ka niti, hakuna nto yekona kupalelwisa Jehova kutaleleza mulelo wahae; linzwi lahae likatalelezwa luli. (Isaya 55:11) Hape luitumela hahulu ku Jehova kuli walulata luli. “Lilato la Mulimu nelipatuluzwi cwana ku luna: Mulimu naalumile Mwanaa hae wa libanda mwa lifasi kuli lukone kufumana bupilo ka yena. Lilato leo libonisizwe cwana, isiñi kuli ki luna babalatile Mulimu, kono ki yena yanaa lulatile mi naalumile Mwanaa hae kuli abe sitabelo sa swalelo ya libi zaluna sesi lukutiseza ku yena.”—1 Joani 4:9, 10.

Mulimu “naasika katwa nihaiba Mwanaa hae kono amufa kabakala luna kaufela,” kacwalo lunani buikolwiso bwa kuli ‘ukalufa lika zeñwi kaufela’ zasepisize. (Maroma 8:32) Ki lika mañi zasepisize kuluezeza Mulimu? Halunyakisiseñi puzo yeo mwa taba yetatama.