HAIBA mushwezwi ki mutu yemulata, mwendi ni mina nemubile ni maikuto ashutana-shutana, inge cwalo kulobeha pilu, kuikutwa bulutu, ni kuikutwa kuziyeleha. Mwendi hape nemuhalifile, nemuikutwile mulatu, mi nemusabile. Hape mwendi nemusaboni tuso ya kuzwelapili kupila.

Muhupule kuli hakusika fosahala kulila. Kulila kubonisa mone mulatela mutu yatimezi. Nihakulicwalo, kana kunani lika zekona kumitusa kuikutwa kwateñi hande?

Nihaike kuli mukona kuikutwa kuli butuku bomuutwa habuna kufela, kusebelisa liakalezo zelatelela kwakona kumitusa:

MUBE NI NAKO YA KULILA

Batu balilanga ka kushutana-shutana. Kono kulila kukona kumitusa kuikutwa kwateñi hande. Bo Vanessa, bababulezwi kwa makalelo babulela kuli: “Nenililanga; nenibata kuikutwa hande.” Bo Sofía, bane bashwezwi ki banyani babona babulela kuli: “Niutwanga hahulu butuku kwa pilu hanihupula lifu la munyanaaka, niikutwanga inge kuli ninani sitombo mi mutu uto siyebula ni kusitapisa. Kukenisa sitombo ku butuku hahulu, kono kusikenisa kutahisanga kuli sifole.”

MUBULELELE BABAÑWI MOMUIKUTWELA

Fokuñwi mwendi muikutwanga kuli mubata feela kuba munosi, mi hakusika fosahala kuikutwa cwalo.  Kono mutu utokwa kutusiwa ki babañwi kuli atiyele butuku bwa kushwelwa. Jared, yanani lilimo ze 17, ili yanaashwezwi ki bo ndatahe, ubulela kuli: “Nenibulelelanga babañwi mone niikutwela. Nihaike kuli mwendi nenisa talusangi hande lika ka kuutwahala, kubulelela babañwi maikuto aka nekunitusize luli.” Bo Janice, bababulezwi mwa taba yapili, babulela bunde bobuñwi bwa kutaluseza babañwi mwaikutwela mutu. Bali: “Kubulelela babañwi mone niikutwela nekuniomba-ombile hahulu. Batu nebautwisisize maikuto aka mi nenisika ikutwa buinosi.”

MUAMUHELE TUSO YEMUFIWA

Dokota yomuñwi naabulezi kuli: “Haiba batu babashwezwi baamuhela tuso yebafiwa ki balikani ni ba lubasi lwabona isali kwa makalelo, bakakona kuitiisa nako hainze iya.” Mubulelele balikani bamina zemubata kuli bamiezeze, mwendi batabela kumitusa kono habazibi zebaswanela kueza kuli bamituse.—Liproverbia 17:17.

MUSUTELELE KU MULIMU

Bo Tina babulela kuli: “Bo muunaaka hane babulailwe ki butuku bwa kansa, nenisa koni kubabulelela maikuto aka, kacwalo, nenibulelelanga Mulimu lika kaufela! Zazi ni zazi nenimukupanga kuli anituse kuitiisa. Mulimu naanitusize mwa linzila zeñata.” Bo Tarsha, bane banani lilimo ze 22 ka nako yene bashwezwi ki bo ma bona, babulela kuli: “Kubalanga Bibele zazi ni zazi nekuniomba-ombanga. Nekunitusanga kunahana lika zende zesusueza.”

MUNAHANISISANGE MOIKABELA ZUHO

Bo Tina bazwelapili kubulela kuli: “Kwa makalelo, kunahanisisanga za sepo ya zuho nekusika niomba-omba, kakuli nenibata kuba ni bo muunaaka mi ni bana baka ni bona nebabata bo ndataa bona ka nako yani. Nihakulicwalo, ka nako ye, ili lilimo zeene kuzwa fobatimelela bakuluna, ninahanisisanga hahulu za zuho ya bafu. Sepo ya zuho initusa hahulu kuitiisa. Haninahananga za nako yenika ba ni bakuluna hape ka nako ya zuho, nibanga ni tabo ni kozo ya mwa munahano!”

Butuku bwa kushwelwa ki mutu yemulata mwendi habukoni kufela mwa nakonyana. Nihakulicwalo, zeneezahezi ku bo Vanessa zakona kumitiisa. Bo Vanessa babulela kuli: “Mutu ukona kunahana kuli hana kutuhela kuutwa butuku bwa kushwelwa, kono nako hainze iya, ukaikutwa hande.”

Muhupule kuli, nihaike kuli mukazwelapili kuhupulanga balatiwa bamina babashwile, musakona kupila bupilo bobunde. Ka tuso ya Mulimu yalilato, mwakona kuba ni balikani babande ni kuikola bupilo. Mi ona cwale-cwale fa, Mulimu ukazusa babashwile. Mulimu ubata kuli mutokumbata balatiwa bamina hape. Ka nako yeo, butuku bwamina bukafela kuya kuile!