Kana Tato ya Mulimu I Sweli Y’a Ezwa?
Kana Tato ya Mulimu I Sweli Y’a Ezwa?
“Se si latwa ki Wena si ezwe mwa lifasi, mo si ezezwa kwa lihalimu.”
BO JULIO ni Christina ne ba talimezi fela ba sabile maswe ba bane kwa bana ba bona ha ne ba nze ba ca mwa mulilo. Mota ya bona ye ne i yemi ne i lengilwe ki ndilaiba ya kozwi, mi ya tumbuka mulilo. Marcos, mwana wa buketalizoho, n’a yangwezwi mwa ñumbimulilo, kono mulilo w’o n’o babauzi mubili wa hae, ili ku sinya ponahalo ya ona. Marcos n’a na ni lilimo ze 9. Bondatahe ne ba tunkehile maswe kwa pilu. Ne ba ikokotozi hamoho ni lubasi lwa bona ka manzwi a’ li: “Lu na ni ku utwisisa kuli yeo ki tato ya Mulimu, ibe kuli ki ye nde kamba ye maswe kamba mo ku bezi kaufela.”
Ha ku ezahalile kozi ye cwale ka yeo, ba bañata ba ikutwanga ka nzila ye swana. Ba ipuzanga kuli, ‘Haiba Mulimu ki ya m’ata ote mi wa lu tokomela, se si ezahalile si na ni bunde bo buñwi ku luna, nto yeo niha i zinga.’ Kana mwa lumela cwalo?
Mubonelo wa kuli se si ezahala kaufela, ibe se sinde kamba se si maswe, ki tato ya Mulimu hañata u tomanga fa manzwi a Jesu a ye twi ki Tapelo ya Mulena, ye ñozwi fahalimu. Tato ya Mulimu i sweli ya ezwa kwa lihalimu, nji cwañi? Mwa ku lapela kuli ‘Tato ya hao i ezwe mwa lifasi,’ kana haki ku bonisa kuli lwa lumela kuli ze ezahala fa lifasi ki tato ya Mulimu?
Ba bañata ba kakanya mubonelo w’o. Ba li u bonisa kuli Mulimu h’a isi pilu kwa maikuto a batu b’a bupile. Ba buza kuli: ‘Mulimu ya lilato n’a ka lakalezañi ze maswe ku ba ba si na mulatu? Haiba ku na ni tuto ya ku ituta, i kona ku ba tuto mañi yona yeo?’ Mwendi ni mina kona mo mu ikutwela.
Ka za seo, munyan’a Jesu ku bom’ahe, mulutiwa Jakobo, n’a ñozi kuli: “Mutu h’a likwa a si ke a li: Ni likwa ki Mulimu. Kakuli Mulimu h’a koni ku likwa ki bumaswe, mi h’a liki mutu.” (Jakobo 1:13) Mulimu haki yena musimululi wa ze maswe. Kacwalo, kwa iponelwa kuli haki zote ze ezahala fa lifasi kacenu z’e li tato ya Mulimu. Mañolo a bulela hape za tato ya mutu, tato ya macaba, mane ni tato ya Diabulosi. (Joani 1:13; 2 Timotea 2:26; 1 Pitrosi 4:3) Kana mwa lumela kuli ze n’e wezi lubasi lwa bo Julio ni Christina ne si tato ya Ndate y’a lilato wa kwa lihalimu?
Kanti he kiñi luli za n’a talusa Jesu ha n’a lutile balutiwa ba hae ku lapela kuli: “Se si latwa ki Wena si ezwe”? Kana ne li kupo fela ku Mulimu ya kuli a tuse mwa miinelo ye miñwi, kamba kana Jesu n’a lu luta ku lapelela nto ya butokwa hahulu, ili ye nde ku fita, ili cinceho yeo bote ba kona ku sepa ku iponela? Ha lu nyakisiseñi ze ñwi zeo Bibele i bulela.
[Manzwi a bañi ba siswaniso fa likepe 3]
Mota: Dominique Faget-STF/AFP/Getty Images; mwanana: FAO photo/B. Imevbore