BIBELE YA CINCANGA BUPILO BWA BATU

“Ne ba bata kuli ni fite fa ku ziba ili na ze i bulela Bibele luli”

Taba ye kandekilwe ki bo Luis Alifonso

SILIMO SE NE BA PEPILWE: 1982

NAHA KO NE BA PEPEZWI: DOMINICAN REPUBLIC

LITABA ZE EZAHEZI: KU HULISEZWA MWA BULAPELI BWA MORMONI

BUPILO BWA KA BWA KWAMULAHO: Ne ni pepezwi mwa Santo Domingo, kwa Dominican Republic; lu ba bane mwa mba ya luna mi ki na ñomba. Bashemi ba luna ne ba itutile hahulu mi ne ba bata kuli lu hulisezwe mwa sibaka se sinde mo ku na ni batu ba bande ni ba ba sepahala. Lilimo zee ne pili ni si ka pepwa kale, bashemi ba ka ba kopana ni balumiwa ba bulapeli bwa Mormoni. Bakeñisa kuli ne ba tabisizwe hahulu ki bukeni ni ponahalo ye nde ya mitangana bao, bashemi ba ka ba atula kapili-pili kuli lubasi lwa luna lu be lo lu ñwi lwa mabasi a pili mwa sioli seo ku ba mwa Keleke ya Jesu Kreste ya Bahalalehi ba Miteñi ya Hamulaho (Church of Jesus Christ of Latter-day Saints), kamba Keleke ya Mormoni (the Mormon Church.)

Ka nako ye ne ni hula, ne ni ikolanga ku eza misebezi ye ne ezwanga kwa keleke mi ne ni tabela hahulu litaba za keleke ya Mormoni ze ne ambola za bupilo bwa lubasi ni za likuka ze nde za muzamao. Ne ni tabela hahulu ku ba mwa keleke ya Mormoni, mi naa itomela sikonkwani sa ku ba mulumiwa.

Ha ne ni na ni lilimo ze 18, lubasi lwa luna lwa tutela kwa naha ya United States ka mulelo wa kuli ni yo kena kwa yunivesiti ye nde. Hamulaho wa nako ye bato ba silimo, banyani ba bo ma ni bakubona, ba ba li Lipaki za Jehova, ba to lu potela kwa Florida. Ba lu mema kuli lu ye ni bona kwa mukopano o mutuna ko ne ba yo ituta Bibele. Ne ni tabisizwe ki taba ya kuli batu kaufela ba ne ba inzi bukaufi ni na, ne ba apula mañolo a mwa Bibele ni ku ñola lisupo. Kamukwaocwalo, na kupa siñoliso ni pampili mi na kala ku ñola lisupo.

Hamulaho wa mukopano wo, banyani ba bo ma ni bakubona ba ni taluseza kuli bakeñisa kuli ne ni tabela ku ba mulumiwa, ba kona ku ni tusa ku ituta litaba ze ñwi za mwa Bibele. Na tabela muhupulo wo bakeñisa kuli ka nako yeo, ne ni ziba hahulu litaba ze mwa Buka ya Mormoni ku fita litaba ze mwa Bibele.

BIBELE MO NE I CINCELIZE BUPILO BWA KA: Ha ne lu itutanga Bibele ka luwaile, banyani ba bo ma ni bakubona, kamita ne ba ni susuezanga ku bapanya litumelo za ka ni ze ne i luta Bibele. Ne ba bata kuli ni fite fa ku ziba ili na ze i bulela Bibele luli.

 Ne ku na ni lituto ze ñata ze lutiwa mwa keleke ya Mormoni ze ne ni lumezi, kono ne ni sa zibi hande luli za naa bulela Mañolo ka za lituto zeo. Banyani ba bo ma ba ni lumela Awake! ya November 8, 1995, ye hatisizwe ki Lipaki za Jehova, ye ne na ni litaba ze ñwi ze ne bulela ka za litumelo za keleke ya Mormoni. Na komoka hahulu kuli kanti ne ni sa zibi lituto ze ñata ka za bulapeli bwa Mormoni. Kamukwaocwalo, na kala ku bata fa sibaka sa fa Intaneti sa bulapeli bwa Mormoni kuli ni bone nji litaba ze ne ñozwi mwa Awake! ne li za niti. Litaba zeo ne li za niti, mi ha ne ni potezi mamiziyamu a bulapeli bwa Mormoni mwa Utah na yo fumana kuli ne li cwalo luli.

Ne ni lumela kuli litaba ze mwa Buka ya Mormoni ni litaba ze mwa Bibele za lumelelana. Kono ha ne ni kalile ku bala Bibele ka tokomelo, na fumana lituto ni litaba za mwa bulapeli bwa Mormoni ze ne sa lumelelani ni ze i bulela Bibele. Ka mutala, kwa Ezekiele 18:4, Bibele i bulela kuli moyo wa shwa. Kono mwa Buka ya Mormoni, kwa liñolo la Alma 42:9, ku bulela kuli: “Moyo ha ku koni ku shwa ni kamuta.”

Kwandaa feela ku sa lumelelana mwa lituto ze ñwi, hape ne ni katazwa hahulu ki taba ya kuli ba bulapeli bwa Mormoni ne ba luta lituto za ku lata hahulu naha ya habo mutu. Ka mutala, ba bulapeli bwa Mormoni ba lutiwa kuli simu ya Edeni ne i li mwa sibaka se si bizwa Jackson County, Missouri, mwa U.S.A. Bapolofita bwa mwa bulapeli bo, ba bulela kuli Mubuso wa Mulimu u ka busa lifasi ka ku itusisa muuso wa naha ya United States.

Ne ni ipuzanga kuli ba bulapeli bwa Mormoni ne ba luta kuli ku ka ezahalañi kwa linaha ze ñwi, inge cwalo kwa naha ye ne ni pepezwi ku yona. Nako ye ñwi manzibwana ha ne ni sweli ku ikambota fa luwaile ni mukulwani yo muñwi wa mwa bulapeli bwa Mormoni ya naa lutiwa ku ba mulumiwa, naa kala ku bulela za yona taba yeo. Na mu buza ka za haiba naa ka itatela ku lwanisa ba bulapeli bwa Mormoni ba bañwi, naha ya habo ha ne i ka lwana ni naha ya bona. Ne ni komokile hahulu ha naa ni alabile kuli na ka eza cwalo! Na batisisa hahulu lituto ze ne lutiwa mwa bulapeli bwa hesu mi hape na buza baeteleli ba Keleke ya Mormoni. Ba ni taluseza kuli lipuzo za ka ki likunutu ze ka patululwa ka nako ye ñwi liseli ha ne li ka ekezeha.

Bakeñisa kuli ne ni zwafisizwe ki likalabo za bona, na itatuba ka tokomelo ni ku nyakisisa libaka ha ne ni bata ku ba mulumiwa wa bulapeli bwa Mormoni. Na lemuha kuli libaka le liñwi ha ne ni bata ku ba mulumiwa ne li la kuli ne ni tabela hahulu ku tusa batu ba bañwi. Mi libaka le liñwi ha ne ni bata ku ba mulumiwa ne li la kuli batu ne ba ka ni kuteka. Kono ne ni sa zibi ze ñata luli ka za Mulimu. Nihaike kuli kwamulaho ne ni balile Bibele hañata, ne si ka i inga ku ba ya butokwa luli. Ne ni sa zibi ni hanyinyani za mulelo wa Mulimu ka za lifasi kamba batu.

MO NI TUSELIZWE: Ku ituta Bibele ni Lipaki za Jehova, ne ni ku ni tusize ku ziba kuli Mulimu u na ni libizo, ne ni itutile ze ezahala mutu ha timela, mi ne ni zibile musebezi wa peta Jesu mwa ku talelezwa kwa mulelo wa Mulimu, ni ze ñwi ze ñata. Hamulaho naa kala ku utwisisa hande buka ye nde hahulu ye, yona Bibele, mi ne ni ikozi ku taluseza ba bañwi lika ze ne ni ituta. Ne ni ziba kuli Mulimu u teñi, kono cwale se ni kona ku ambola ni yena mwa tapelo sina Mulikanaa ka yo mutuna. Ne ni kolobelizwe sina yo muñwi wa Lipaki za Jehova ka la 12 July, 2004, mi hamulaho wa likweli ze silezi, naa kalisa sebelezo ya ka nako kaufela mwa bukombwa bwa Sikreste.

Ne ni sebelelize kwa sibaka sa zamaiso sa Lipaki za Jehova mwa Brooklyn, kwa New York ka lilimo ze ketalizoho. Ne ni ikozi hahulu ku tusa mwa musebezi wa ku hatisa Libibele ni lihatiso ze tomile fa Bibele ze tusa ba batu ba bañata mwa lifasi kamukana, mi ni sa zwelapili ku ikola ku tusa batu ba bañwi ku ituta ka za Mulimu.