TOHO YA TABA | KI KABAKALAÑI BATU BA BAÑWI HA BA IKUTWA KULI HA BA KONI KU LATA MULIMU?

Niti ya Kona ku mi Lukulula

Zazi le liñwi mwa Jerusalema, Jesu naa sweli ku bulela za Ndatahe, yena Jehova, ni za litaba ze ne bonisa buhata bwa baeteleli ba bulapeli ba mwa miteñi ya hae. (Joani 8:12-30) Litaba za naa bulezi Jesu zazi leo, li lu bonisa mo lu kona ku tatubela litumelo ze atile hahulu mazazi a, ka za Mulimu. Jesu naa bulezi kuli: “Haiba mu zwelapili mwa linzwi la ka, mu balutiwa ba ka luli, mi mu ka ziba niti, mi niti i ka mi lukulula.”—Joani 8:31, 32.

‘Mu zwelepili mwa linzwi la ka.’ Ka ku bulela manzwi ao, Jesu naa bonisa mo lu kona ku zibela haiba lituto za bulapeli bo buñwi ki za “niti” kamba ku tokwa. Ha mu utwa taba ye ñwi ye ama Mulimu, mu ipuze kuli, ‘Kana taba ye ya lumelelana ni manzwi a Jesu ni litaba ze ñwi ze fumaneha mwa Bibele?’ Mu likanyise mutala wa batu ba ne ba teeleza ku muapositola Paulusi ha naa ba luta ili ba ne ba “tatuba Mañolo ka tokomelo zazi ni zazi kuli ba zibe haiba lika zeo [ze ne ba ituta] ne li li cwalo.”—Likezo 17:11.

Bo Marco, bo Rosa, ni bo Raymonde, ba ba bulezwi mwa taba ya kwa makalelo, ne ba tatubile ka tokomelo litumelo za bona ka ku ituta Bibele ni Lipaki za Jehova. Ne ba itutileñi?

Bo Marco ba li: “Mutu ya naa lu lutanga Bibele, naa alabanga lipuzo za ka ni za bo musalaa ka, ka ku itusisa Bibele. Kabakaleo, lwa kala ku lata hahulu Jehova, mi na ni bo musalaa ka lwa kala ku utwana hahulu!”

Bo Rosa ba li: “Kwa makalelo ne ni hupula kuli Bibele ki buka feela ye talusa ze ba nahana batu ka za Mulimu. Kono hamulaho wa nako, naa fumana likalabo za Bibele kwa lipuzo za ka. Cwale naa utwisisa kuli Jehova u teñi luli, mi naa kona ku mu sepa.”

Bo Raymonde ba li: “Ne ni lapezi ku Mulimu kuli a ni tuse ku ituta ka za hae. Hamulaho wa fo, na ni bo muunaa ka lwa kala ku ituta Bibele. Mi cwale lu itutile niti ka za Jehova! Ne lu tabile hahulu ha ne lu zibile kuli Mulimu u cwañi luli.”

Bibele ha i patululi feela lituto za buhata ka za Mulimu, kono hape i talusa niti ka za tulemeno twa hae to tunde. Bibele ki Linzwi la Mulimu le li tahile ka susumezo ya moya wa hae, mi li lu tusa ku “ziba lika ze lu filwe ki Mulimu ka sishemo.” (1 Makorinte 2:12) Mu ka eza hande ku ituta likalabo za Bibele kwa lipuzo za butokwa ze ba buzanga hahulu batu ka za Mulimu, milelo ya hae, ni ze ka ezahala ku luna kwapili. Mwa kona ku ikupela tuto ya Bibele fa Webusaiti ya www.ps8318.com kamba ku yo muñwi wa Lipaki za Jehova. Lu sepa kuli ha mu ka eza cwalo, mu ka lemuha kuli ku lata Mulimu ku bunolo ku fita ni mo ne mu kana mwa nahanela.