Batumoni ba Yehova bengidijanga malamuni mavule a Bible mu bwifundi bwabo bwa Bible. Shi tudi kala na Bible Bisonekwa Bijila—Bwalamuni bwa Ntanda Mipya mu ludimi kampanda, tusangelanga bininge kumwingidija, mwanda uno Bible i mwingidije dijina dya Leza, mwalamunwe bya bine, kadi upēla kwivwanwa.

•   Kwingidijibwa kwa dijina dya Leza. Balamuni bamo ba Bible i bakomenwe kutumbija Mulembi mwine wa Bible. Kimfwa, mu bwalamuni bumo bwa Bible i mutelwe majina a bantu 70 ne kupita bakweshe ku kulupula’ye. Ino mu uno Bible i mutupu dijina dya Mulembi mwine wa Bible, ke Yehova Leza kadi—na bubine katelelwe’mopo!

   Kwishila na buno bwalamuni, Bisonekwa Bijila—Bwalamuni bwa Ntanda Mipya i bujokeje dijina dya Leza mu bifuku tununu na tununu poditanwa mu bilembwa bibajinjibajinji, kadi bantu balupwile’ye kebatelelwe’mopo.

•   Wabine. Malamuni amo kealamwinepo bya bine musapu wādi mu Bible mubajinjibajinji. Kimfwa, Bible Myanda Miyampe i mwalamune Mateo 23:15 uno muswelo: “Malwa enu, banwe bafundiji ba bijila ne Bafadiseo, banwe banzazangi! Mwanda mwendanga konsokonso panshi ne pa tulunga-lui amba mukamone’ko nansha tu umo waalamukila ku mutotelo wenu wa buyuda. Byo ke mumumone, mwamwalamuna ke mufwanyinwe kalunga ka mudilo misunsa ibidi kutabuka banwe.” Na bubine mu bilembwa bibajinjibajinji i patelwe kishima “Ngehena [kishima pa kishima i ‘Musanza wa Hinome’],” ino kepatelelwepo “kalunga ka mudilo.” Pa kala Musanza wa Hinome wādi kubwipi na Yelusalema, wāingidijibwe bu kyala mu mafuku a Yesu. I kimweke pa tōka’mba Yesu wāingidije kishima Ngehena mwanda wa kwisambila pa konakanibwa kwa lonso kulupuka ku butyibi bwa Leza. Bimweka bu balamuni ba Bible Myanda Miyampe i batweje’po kishima “kalunga ka mudilo” mwanda bakulupile amba bantu babi bakasusulwanga nyeke mu kalunga-nyembo ka mudilo. Ino kunena na bubine buno bufundiji kebudipo mu Bible. Inoko Bwalamuni bwa Ntanda Mipya i bwalamune kino kisonekwa amba: “Malwa enu, basonekeji ne Bafadiseo, banwe banzazangi! mwanda mutyibulukanga dijiba ne ntanda mukakimba muntu umo wa kwalamuka, ne shi waalamuka, mwamulonga ke mufwaninwe Ngehena pabidi kwimupita ne banwe bene.”

•   Kulupwila myanda patōka. Bwalamuni buyampe kebufwaninwepo kwikala’tu enka bwa bine, ino bufwaninwe ne kulupwila myanda patōka, kadi bufwaninwe kwikala bupēla kwivwanwa. Kimfwa, tala mwalamwininwe kisonekwa kya Bene Kolose 2:8 mu Myanda Miyampe: “Dyumukai, muntu kakimukwatai bwa misungi na byamanwa byandi bya kyongo bya bituputupu bya bufundiji bwa bibidiji bipyene bantu, bya bunkasampe bya bintu ne bya mpusa bya pano pantanda. Byabyo ke bya Kidishitu po.” Bishima ‘byamanwa bya kyongo,’ “bibidiji bipyene bantu,” ne “bya bunkasampe” i bilete mulangwe mukomo kwivwanwa biyampe mu Kiluba mu uno Bible. Bwalamuni bwa Ntanda Mipya i bwalamune uno vese mu muswelo upēla kwivwana. I bwingidije bishima “bongojani” pa kyaba kya ‘byamanwa bya kyongo,’ “kishi kya bantu” pa kyaba kya “bibidiji bipyene bantu,” ne “bintu bya kyalwilo,” pa kyaba kya “bya bunkasampe.”

 Kutentekela pa kwingidija dijina dya Leza, kwikala wa bine, ne kulupwila myanda patōka, Bwalamuni bwa Ntanda Mipya i Bible wa pa bula mu muswelo mukwabo: Upanwanga ku bitupu. Kulonga namino i kukwashe bantu midiyo ne midiyo batange Bible mu lwabo ludimi lwa kibutwila—enka ne boba ke badipo na lupeto lwa kupota Bible.