Bible wālaile amba bipupo bya misongo (kusambakana lubilo kwa misongo) bikekala’ko mu mafuku a mfulo. (Luka 21:11) Bino bipupo ke mfutopo itamba kudi Leza. Ne kadi bidi, kupityila ku Bulopwe bwandi, Leza usa kutalula’ko panopano ponka misongo yonso, kubadila’mo ne bipupo.

•  Lelo Bible wālaile amba bipupo bikekala’ko?

•  Lelo Leza ke mupe ne bantu mfuto ya misongo?

•  Le kipupo kidi’ko dyalelo i mfuto itamba kudi Leza?

•  Le bipupo bikapwanga?

•  Bisonekwa bya mu Bible bīsambila pa misongo

 Bible kālailepo bipupo na kwibitela pa dijina, kimfwa amba COVID-19, SIDA, nansha’mba manzamba a mu Eshipanye. Ino i mulaye “bipupo bya misongo” ne “kipupo kileta lufu.” (Luka 21:11; Kusokwelwa 6:8) Bino bintu bibadilwa mu kiyukeno kya “mafuku a mfulo,” atelwa ne bu “mvuyo ya ngikadilo ya bintu.”—2 Temote 3:1; Mateo 24:3.

 Bible i mutele’tu misunsa mityetye yāingidije Leza misongo mwanda wa kupa bantu mfuto. Kimfwa, wāpēle bantu bamo makopo. (Umbadilo 12:1-16; 2 Balopwe 5:20-27; 2 Bilongwa 26:16-21) Inoko, ino misunsa mityetye keyādipo bwa bipupo bisambakana ne ku bantu bampikwa mambo. Ino, kwādi i kutyibilwa mambo kwa bantu kampanda bātombokēle Leza patōkelela.

 Aa. Bantu bamo banenanga’mba Leza wingidijanga bipupo ne misongo palapala mwanda wa kupa bantu mfuto dyalelo. Inoko Bible ketabijangapo wao mulangwe’o. Mwanda waka?

 Kimo bidi, enka ne batōtyi ba Leza bamo—ba pa kala ne ba dyalelo—ke batanwe na bipupo bya misongo. Kimfwa, Temote, muntu wa kikōkeji, wādi ‘ubelabela.’ (1 Temote 5:23) Bible kanenenepo amba kuno kubela kwādi kulombola’mba Leza i mumupele, aa. Mo monka ne dyalelo, bengidi bamo ba Leza babelanga nansha kusambukilwa’tu na misongo. Divule dine, bano bantu batanikilwanga’tu mu kifuko kibi ne pa kitatyi kibi.—Musapudi 9:11.

 Kikwabo, Bible ufundija’mba kitatyi kya Leza kupa bantu mfuto kekyafikile. Inoko, tukidi mu “difuku dya lupandilo”—ko kunena’mba, mu kitatyi kikīta Leza bantu bamufwene mwanda wa bapande. (2 Bene Kodinda 6:2) Muswelo umo bidi waityila’mo bantu i kupityila ku mwingilo wa busapudi wingilwa ntanda yonso, mwine udi na musapu muyampe—witwa bu “myanda miyampe ya Bulopwe.”—Mateo 24:14.

 En-en, bikapwanga. Bible i mulaye amba kumeso’ku kekusapo kwikala muntu wa kubela. Leza usa kupwija misongo yonso mu buludiki bwa Bulopwe bwandi. (Isaya 33:24; 35:5, 6) Masusu, misanshi ne lufu, ukebijimankanya byonso. (Kusokwelwa 21:4) Kadi ukasangula ne boba bonso bafwile amba nabo bekale mu būmi bwampikwa misongo pano pa ntanda mu ngikadilo mibwaninine.—Ñimbo ya Mitōto 37:29; Bilongwa 24:15.

 Kusokwelwa 6:8: “Na’mba ntale! kabalwe katōkoloka, kadi yewa wadi utentamine’po wadi witwa bu Lufu. Kadi Kibundu kyadi kimulonda pabwipi. Penepo bapebwa lupusa . . . lwa kwipaya . . . na kipupo kileta lufu.”

 Bishintulula bika: Bupolofeto bwa ba pa tubalwe baná budi mu Kusokwelwa bulombola’mba bipupo bya misongo byadi bya kumweka mu ano etu mafuku.