Leza wāpangile bantu mwanda wa kusambakena pamo enka mu busongi, kadi mwana-mulume ne mwana-mukaji. (Ngalwilo 1:27, 28; Bene Levi 18:22; Nkindi 5:18, 19) Bible i mupeleje kusambakena pamo kwa bantu kebesongelepo, ekale kwa bantu ba ngitu imo nansha kwa ba mwana-mulume ne mwana-mukaji. (1 Bene Kodinda 6:18) Muno mubadilwa ne kupolweja ku ngitu ya bumvu ya muntu mukwabo, kulāla na muntu mukanwa nansha ku matako.

 Bible ketabijepo kusambakena pamo kwa bantu ba ngitu imo, kadi i mupeleje kushikwa bantu ba ngitu imo basambakena pamo. Ino unena bene Kidishitu ‘balēmeke bantu bonso.’​—1 Petelo 2:17, Mukanda Ukola.

 Le muntu ubwanya kubutulwa bu wa kusambakena pamo na bantu ba ngitu imo?

Bible kesambīlepo patōkelela pa bilokoloko bya kibutwila bya kusambakena pamo na bantu ba ngitu imo, inoko unena’mba batwe bonso twi babutulwe na mutyima ulemenēne ku kujilula misoñanya ya Leza. (Bene Loma 7:21-25) Pa kyaba kya kwisambila pa kine kileta bilokoloko bya kusambakena na bantu ba ngitu imo, ino Bible upelaja bilongwa bya kusambakena na bantu ba ngitu imo.

 Mwa kusangeja Leza shi tudi na bilokoloko kya kusambakena na muntu wa ngitu imo.

Bible unena’mba: “Kemwakanekenibwai na ngitu yenu. Ipayai kusakasaka konso kwa kusambakena pamo kubi kwa miswelo yanso.” (Bene Kolose 3:5, Contemporary English Version) Pa kwipaya kusakasaka kubi, kwine kutwalanga ku bilongwa bibi, ufwaninwe kuta mutyima ku milangwe yobe. Shi udinga kyaba ne kyaba milangwe miyampe mu ñeni yobe, ukapēlelwa kufundula kusakasaka kubi. (Bene Fidipai 4:8; Yakoba 1:14, 15) Nansha byobwanya kwikonda bininge ku ngalwilo, ino ubwanya padi kupēlelwa mwenda mafuku. Leza i mulaye kukukwasha ‘walamunwe kodi mupya mu mulangilo obe.’​—Bene Efisesa 4:22-24.

 Ano makambakano ekondanga ne na bantu midiyo ne midiyo badi na bilokoloko bya kusambakena pamo na bantu ba ngitu imo basaka kulonda misoñanya ya mu Bible mu būmi bwabo. Kimfwa bantu kebasokwele wa kwisonga nandi nansha boba badi na benē pabo kebabwanyapo kusambakena nabo pamo, bōmininanga bilokoloko bya kusambakena pamo nansha shi abatanwa mu matompo’ka. Badi na nsangaji mu būmi, kadi boba badi na bilokokolo bya kusambakena pamo na bantu ba ngitu imo basaka kusangaja Leza, nabo babwanya kwikala na nsangaji.​—Kupituluka mu Bijila 30:19.