Bukomo bwa mu Ñeni
Bible witudyumuna ku milangwe mibi ne kwitukankamika twikale na milangwe miyampe.
BULOBO
MUSOÑANYA WA MU BIBLE: “Yewa wija pa kukwatwa bulobo i mupite buya muntu mukomokomo.”—Nkindi 16:32.
MOUSHINTULWILA: Tumwenanga’mo shi tulonga bukomo bwa kwīfula. Nansha kyaba kimo byotubwanya kwikala na bubinga bwa kulobela, inoko bulobo bwa kubulwa kutalajibwa bonanga bintu. Bakimbi ba dyalelo bamwene amba divule dine shi bantu i balobe, banenanga ne kulonga bintu byobakealakanya mwenda mafuku.
BYOBWANYA KULONGA: Longa bukomo bwa kutalaja bulobo bobe kumeso kwa kukutādila’bo. Bantu bamo balañanga’mba bulobo i kiyukeno kya bukomo, ino i biyampe tuyuke amba bulobo i kiyukeno kya buzoze. Bible unena’mba, “Pamo bwa kibundi kitūtwe, kyampikwa lubumbu, mo mwikadile ne muntu kabwanyapo kwīfula.” (Nkindi 25:28) Muswelo muyampe wa kutalaja bulobo bobe i kuyuka mwikadile myanda kumeso kwa kulonga kintu. “Bujinguludi bwa muntu bine butalajanga bulobo bwandi.” (Nkindi 19:11) I biyampe kwivwanija mwikadile myanda senene, kwine kubwanya kwitupa bujinguludi bwa mwa kulamina milangwe yetu.
KUFWIJA’KO
MUSOÑANYA WA MU BIBLE: “Ikalai na mutyima wa kufwija’ko.”—Bene Kolose 3:15.
MOUSHINTULWILA: Bavule banenanga’mba enka muntu wa mutyima wa kufwija’ko ye ukekala na nsangaji. Nansha ke boba bafwidilwe ne kujimija bintu, betabije uno mulangwe. Bamonanga’mba balamine milangwe yabo na kuleka kuta mutyima ku bintu byobajimije, ino bata’o ku bintu byobadi nabyo bya kufwijija’ko.
BYOBWANYA KULONGA: Lemba difuku ne difuku bintu bya kufwijija’ko. Kebilombengapo’nka bintu bikatakata. Langulukila ne pa bintu bityebitye kimfwa kutamba kwa dyuba, kwisamba na muntu osenswe, nansha kutanwa’ko mūmi mu difuku’dya. Bino bintu biyampe bibwanya kukukwasha ulumbulule bukomo bobe bwa mu ñeni shi ulangulukila’po ne kulombola mutyima wa kufwija’ko.
Kadi i biyampe nakampata kulangulukila pa kine kyofwijija’ko kyobe kisaka ne balunda nobe. Shi ubajingulula bintu bikusangaja ku bantu bakwabo, wibalombole’byo, mpala na mpala nansha mu mukanda, pa Entelenete, nansha mu musapu wa ku telefone. Kino kikaningisha kipwano kyenu ne kukukwasha wikale na nsangaji itamba ku kupāna.—Bilongwa 20:35.
MISOÑANYA MIKWABO YA MU BIBLE
Ubwanya kutentula butangi bwa Bible bukwatwe ku mawi. Budi pa Entelenete pa jw.org mu kintu kya ndimi 40
LEKA LUPOTOPOTO.
“Kushilula lūma i pamo bwa kujikula kibelo kya mema; kumeso kwa lupotopoto kushilula, taluka’po.”—NKINDI 17:14.
LEKA KUZUMBIJA MUTYIMA BYA BITUPU PA BŪMI BWA KUMESO.
“Kemwakizumbijai mityima nansha dimo pa mwanda wa dya kesha, ke-pantu dya kesha dikekala na bya kuzumbijija mutyima byadyo. Difuku ne difuku didi na makambakano adyo mabwane.”—MATEO 6:34.
LANGULUKILA PA BINTU PA KYABA KYA KWIBILONGA NA KANSONTOMOKELA.
“Bukomo bwa kulanga bukakulamanga nyeke, ne kusansanya nako kukakukiñanga.”—NKINDI 2:11.
Tala'po Bidi ne Bino:
LANGUKAI!
Mwa Kulwila na Kuvutakanibwa Ñeni
Langulukila pa misoñanya imoimo ya kamweno ibwanya kukukwasha ulwe biyampe na kuvutakanibwa ñeni ne kuleka padi kuvutakanibwa’yo bininge.
