Lelo Yesu Ye Leza Mwine Bukomo Bonso?

Mulondolwelanga bantu:

▪ “En-en, Yesu ye Leza Mwine Bukomo Bonso.”

▪ “Yesu ye enka Leza waile mu ngitu.”

Le Yesu wānene’po namani?

▪ “Shi mwadi munsenswe longa nankyo umbasepelela po nemunena’mba: Ñendanga kudi Tata; ke-muntu aye Tata untabukile bukata.” (Yoano 14:28) Yesu wādi uyukile amba kadipo mu ludingo lumo na Shandi.

▪ “Yewa kakakanda kudi Shandi, kadi i wenu Shenu, kudi Leza wandi ne Leza wenu.” (Yoano 20:17) Yesu kānenepo amba aye mwine ye Leza, ino wātelele Leza bu muntu udi’ko.

▪ “Ino nkidipo kyo nenenena ami mwine, ehe, poso’nka Tata wauntumine ye wandaīle mwanda’mba: E mōkasapwila nankyo, e mōkēsambila nenki’mu.” (Yoano 12:49) Byāfundije Yesu ke bya ayepo mwine, mhm, i bya konka kudi Shandi.

YESU wētelele amba i Mwana wa Leza, kētelelepo bu Leza Mwine Bukomo Bonso. Shi Yesu wādi amba ye Leza, penepo wādi ulombela kudi ani paādi pano panshi? (Mateo 14:23; 26:26-29) Na bubine, Yesu kādipo wibepeleja kwisamba na muntu mukwabo!

Bana ba bwanga babidi ba Yesu pobāmulombele bitenta mu Bulopwe bwandi, wēbalondolwele amba: “Kushikata ku lundyo lwami, ne ku lunkuso lwami, byobya kebidipo byami kupana’byo, nanshi i bya boba balongolwedilwe’byo kalā kudi Tata.” (Mateo 20:23) Le Yesu wādi wibabepela bubela pa kunena amba kadipo na lupusa lwa kupāna bino bifuko? Mhm! Ino wāitabije na kwityepeja amba enka Leza kete ye udi na lupusa lwa kutongela bantu bino bitenta. Kadi Yesu wāshintulwile amba kudi bintu bikwabo byākadipo uyukile, nansha ke bamwikeulu bene, poso’nka Shandi.—Mako 13:32.

Lelo Yesu wādi munshi mwa Leza enka paādi muntu pano pa ntanda? Mhm. Nansha ke pa kupwa kufwa ne kusanguka, Yesu utelwa mu Bible bu udi munshi mwa Leza. Mutumibwa Polo wituvuluja amba “mutwe wa Kidishitu nao, i Leza.” (1 Kodinda 11:3) Kadi Bible unena’mba kumeso’ku “pa kunekenībwa bintu byonso kudi aye, ne Mwana mwine nandi ukamukōkela, enka aye wakunekenya bintu byonso kudi aye, mwanda wa kunena’mba, Leza ēkale wa byonso ne umbyonsololo.”—1 Kodinda 15:28.

Bine, Yesu ke ayepo Leza Mwine Bukomo Bonso. O mwanda wātelele Shandi bu “Leza wami.”—Kusokwelwa 3:2, 12; 2 Kodinda 1:3, 4. *

[Kunshi kwa dyani]

[Bushintuludi pa paje 7]

Yesu wāshintulwile amba kudi bintu bikwabo byākadipo uyukile, nansha ke bamwikeulu bene, poso’nka Shandi