Lelo Leza Ukulaile Bupeta?

‘Leza usaka wikale mpeta—myotoka miyule pobe bā, ne kaji kendeka biyampe. Abe mukulupile’tu, tūla shinsani, kadi mulambule byonso byodi nabyo.’

UNO o musapu waletelwe na bisumpi bimobimo bya bipwilo bya mu Brezile mungya julunale wa mwabo. I musapu utele’ko bavule mutyima. Julunale Time unena pangala pa bwipangudi bwaipangwilwe bavule betela bu Bene Kidishitu mu États-Unis, amba: “Bantu 61 pa katwa betabije amba Leza usaka bantu bapete. Kadi bantu 31 pa katwa . . . betabije amba shi upe Leza lupeto, nandi ukakwesela na kukupa lupeto luvule.”

Nkulupilo ya uno muswelo, itelwa divule bu lufundijo lwa ntundubuko, ibavula nakampata mu matanda a Amerika wa Kunshi, kimfwa mu Brezile, kadi bantu batutyikilanga mu bipwilo bilaya bupeta butamba kudi Leza. Lelo bine Leza ulaile bupeta ku boba bamwingidila? Le bengidi bonso ba Leza ba pa kala bādi bampeta?

Eyo, mu Bisonekwa bya Kihebelu, tumona divule amba dyese dya Leza dyādi dyendela pamo na ntundubuko. Kimfwa tutanga mu Kupituluka 8:18 amba: “Nanshi ukavulukanga Yehova Leza obe, mwanda i ayewa ukupa bukomo bwa kumona bupeta.” Kino kyākulupije muzo wa Bene Isalela amba ufwaninwe kukōkela Leza, mwine wa kwiupa ntundubuko.

Le umo ne umo nandi? Yoba muntu wa kikōkeji wādi mpeta mukatampe, kadi nansha Satana pa kupwa kumulandapaja, Yehova wājokejeje Yoba bupeta “kutentekapo ne bikwabo bidingakane pamo’nka na byādi nabyo.” (Yoba 1:3; 42:10) Abalahama nandi wādi mpeta wa byandi. Ngalwilo 13:2 unena’mba “wadi mukambe bupeta byamalwa mu banyema banja; ne ndalama i ndalama, nsahabu i nsahabu.” Ne pākwetwe Lota mwanā mwanabo na Abalahama na bibumbo bya bulwi bya balopwe baná ba Kutunduka, Abalahama “watangidila bantu bandi bebidile kala mata, babutwilwe monka mwandi mu njibo, tutwa tusatu ne bantumo dikumi ne mwanda.” (Ngalwilo 14:14; i batwe basendeka.) Shi tutale’tu bidi bano “bantu bandi bebidile kala mata” 318, tumona amba kipango kya Abalahama kyādi kikatampe. Kulela kisaka kikatampe namino kulombola amba wādi mpeta binebine, na luombe lukatampe lwa banyema.

I amo, bengidi bavule ba kikōkeji ba Leza ba pa kala—Abalahama, Isake, Yakoba, Davida, Solomone, kubala nkonde i kuswa—bādi bampeta. Ino le kino kilombola amba Leza weselanga mwingidi umo ne umo ekale mpeta? Ku mutamba mukwabo, shi muntu i mulanda, le ko kunena’mba keselwepo na Leza? Kishinte kilonda kisa kuleta malondololo ku bino bipangujo.