Senga Bafwilwe, Mwālongele Yesu

LAZALASA, mwikadi wa mu Betani wābelele bininge. Bakaka wandi Mata ne Madia, bātumanya mikendi kudi mulunda nandi wa pa mutyima, Yesu. Ino misongo yāpitula Lazalasa. Kitatyi kyaādi ulēle mu kibundu, balunda ne balondakani bakapempula Mata ne Madia mwanda wa “kwibadidijako.” (Yoano 11:19) Penepa, Yesu wāfika ku Betani wākamona balunda nandi baswedibwe. Shi tubandaule byaānene ne byaālongele, tukaboila’ko ñeni ya mwa kusengela bafwilwe.

Kufika’ko Kulombola’mba Wibatele Mutyima

Pa kufika ku Betani, Yesu wādi wa kwenda lwendo lwa mafuku abidi, kutyibuluka Munonga wa Yodano, kaenda ukanda mu mukuna wa dishinda ditamba ku Yediko. Mata wāenda kukatundaila Yesu ne kibumbo kya bantu ba mu kibundi. Kupwa, Madia pa kwivwana’mba Yesu waiya, nandi wāenda lubilo kukamumona. (Yoano 10:40-42; 11:6, 17-20, 28, 29) Kufika’ko kwa Yesu kwāsengele’po kashā bano bakaka badi na njia.

 Dyalelo, kufika ku boba bafwilwe kukokeja kwibasenga. Scott ne Lydia, bafwidilwe wabo mwana wa myaka isamba witwa bu Theo ku akishida bavuluka’mba: “Twadi tusaka kisaka ne balunda bakwitukwatakanya. Baile umbukata bwa bufuku, pityipityi ku lupitalo.” Le bano balunda nabo banenene bika? “Pa kine kitatyi’kya ketwadipo na buya bwa binenwa. Kufika’po kwabo kwanene bivule—amba betutele mutyima.”

Bible unena’mba kitatyi kyāmwene Yesu bantu badila Lazalasa, penepo nandi “ku mutyima ke kudi fututu” kadi “ne impolo yamusuma.” (Yoano 11:33-35, 38) Yesu kāmwenepo amba kudila pa bantu i bibi. Nandi wāivwene misanshi ne bushiyena bwabo. I ñeni’ka yotuboila’ko? Kitatyi kyotukapempula bantu bafwilwe, ketwakivwanai bumvu bwa kudila ne boba badila. (Loma 12:15) Pakwabo napo kadi, kokasaka kuningila muntu mufwilwe adile. Bamo basakanga kudila kufula.

Teja bya Lusa

Padi Yesu uno wādi na byakunena bikankamika Madia ne Mata, ino wēbalekele banene bidi. (Yoano 11:20, 21, 32) Kitatyi kyaānene na Mata, wāmwipangwile kipangujo, kupwa kamuteje.—Yoano 11:25-27.

Kwikala mwimvwaniki muyampe kulombolanga’mba umutele mutyima bya binebine. Pa kusenga muntu mufwilwe, tusakilwa kuteja biyampe. Tukokeja kwilombola bu bemvwaniki bayampe na kwipangula bipangujo bilengeja ufwidilwe anene bivule. Inoko dyumuka, kokamuningila anene shi kyaba’kya usaka kushikata talala. Padi ke mukoke kasake kukōkolokwa.

Muntu udi na njia ukokeja kutumbukwa ñeni uyuka kyaba kimo kapituluka mu bintu bimo. Bamo banenanga patōka mobeivwanine. Madia ne Mata bānene Yesu amba: “Abe Mfumwami, shi wadipo longa nankyo mwanetu kafwilepo.” (Yoano 11:21, 32) Le Yesu wālongele’po namani? Wātejeje na mutyima mutūke kadi bya lusa. Kātompelepo kwibalombola muswelo obafwaninwe kwiivwana. Wāivwanije amba bantu bafwilwe bemvwananga misanshi mikata.

Shi kuyukilepo bya kunena kitatyi kyokapempula bantu bafwilwe, ukokeja kushilula mīsambo na kwipangula’tu amba, “Le byadi namani?” Kupwa teja na katentekeji palondolola. Languluka pa byowaivwana. Tala mwine wisamba ne kwitula pa kyandi kyaba.

Kwivwanija milangwe ya muntu mufwilwe ke mwandapo upēla. Lydia unena’mba: “Bisakibwa byetu byashintyile. Kyaba kimo ketwadipo tubwanya kutalala, ino twadi tudila mu meso a bantu baile kwitupempula. Twadi tusaka bakwabo bekale na mumweno muyampe. Balunda netu balongele bukomo bwabo bonso mwanda wa kwitūla pa kyetu kyaba.”

Yesu wālongele kino mu muswelo mubwaninine. Wāyukile amba muntu ne muntu udi na “kipupo kyandi, muntu kyandi kipupo muntu kyandi kipupo, ne misongo nayo mo monka.” (2 Bilongwa 6:29) Yesu wālondolwele kukwatañana ne muswelo wāmutundaile bano bana-bakaji babidi. Mata wāendelele kunena, o mwanda Yesu nandi wēsambile nandi. Ino Madia byaādi udila, Yesu kēsambilepo nandi bivule. (Yoano 11:20-28, 32-35) I ñeni’ka yotuboila ku kimfwa kyandi? I biyampe kuleka muntu mufwilwe aludike mīsambo. Mutyima obe wa kusaka kuteja kitatyi kyalupula patōka njia yandi kubwanya kusenga bikatampe.

 Binenwa Byundapa

Ba Madia ne Mata kitatyi kyobānene Yesu amba: “Shi wadipo,” Yesu kēbatopekelepo nansha kumona amba abamusomba. Wālondolwele Mata mu muswelo ukulupija’mba: “Mwanenu usangukanga.” (Yoano 11:23) Na bino binenwa bityetye, Yesu wāmukweshe atale bya kumeso ne kumuvuluja na kanye amba kudi lukulupilo.

Kitatyi kyowisamba na muntu mufwilwe, vuluka’mba binenwa byampikwa budimbidimbi ne biyampe bikokeja kukwasha, nansha bikale bityetye namani! Binenwa bya kusenga bikokeja kunenwa nansha kulembwa. Mikanda ne tulata byobikokeja kutangwa ne kutangululwa, bikokeja kusenga kitatyi kilampe. Myeji kitema pa kupwa kwa lufu lwa Bob mulumyandi, Kath wadi utanga monka tulata tonso twaatambwile. Unena’mba “Mona’mba twankweshe nakampata mu kine kitatyi’kya. Kyo kitatyi kyo nasengelwe.”

I bika byokalemba mu mukanda wa kusenga ufwidilwe? Ukokeja kwandika myanda itala mwine ufwile—bintu kampanda byomwadi mulonga nandi nansha ngikadilo kampanda miyampe yaadi nayo. Kath unena’mba: “Binenwa bya kanye bitala Bob ne ngikadila yandi byadi bilengeja mungemunge ne kudila ponka na ponka. Mānga ya mizaulo yandi yadi insepeja ne kumvuluja būmi bwa nsangaji botwadi nandi. Tulata tuvule tonsenswe ne pano twadi’mo ne bisonekwa bya mu Bible.”

Wibakwashe’ko

Pa kukwasha kisaka kya Lazalasa, Yesu wālongele kintu kyoketubwanyapo. Wājokeje Lazalasa ke mūmi. (Yoano 11:43, 44) Inoko, tukokeja kulonga bintu bikwasha mungya bukomo bwetu, kimfwa kwibatēkela bidibwa, kwibalongolwela mwa kushikata baya kwibamona, kwibafudila bisandi, kwibalamina bana, kwibakwasha shi bakimba wa kutuma, ne kwibapa byendwa nabyo. Bilongwa bityetye bya buswe bwa bine bikasangaja boba bafwilwe.

Shako, kyaba kimo muntu mufwilwe usakanga ne kwikala pa bunka. Nansha nankyo, ukokeja kukwata’ko mulangwe wa kwisamba nandi pa kitatyi kifwaninwe. Lolo umo wafwidilwe wandi mwana unena’mba: “I kutupu kitatyi kitungwe kya kufula njia nansha kya kwivwana biyampe.” Bamo bavulukanga bantu bafwilwe mu mafuku kampanda a kuvuluka, kimfwa difuku dyobesongele nansha difuku dyaafwile. Shi utanwa mu bitatyi na bino, ukekala bu mulunda muyampe mu mafuku makomo.—Nkindi 17:17.

Mu busengi bwāletele Yesu mubadilwa ne lukulupilo lwaālombwele bandi bana ba bwanga’mba: “Mukwetu Lazalasa walāla mu tulo, ino ami ke ñenda konka nkamulangule.” (Yoano 11:11) Yesu wākulupije balondi bandi amba lusangukilo lwa bafu ludi’ko. Wāipangwile Mata amba: “Le ubaitabija’byo a?” Mata nandi amba: “Eyo Mwa! abe Mfumwami.”—Yoano 11:24-27.

Le ubaitabija’mba Yesu ukasangulanga bafwe? Nankyo sapwila boba bafwilwe luno lukulupilo lwa kutendelwa. Wibakwashe’ko ne kwibakwasha. Binenwa byobe ne bilongwa bikebasenga mu muswelo kampanda.—1 Yoano 3:18.

[Kalata pa paje 9]

(Pa kuyukila’ko bikwabo, tala dibuku)

PELEA

Munonga wa Yodano

Yediko

Betani

Kalunga ka Mwepo

Yelusalema

SAMADIA