Bimpengele Kebikekalakopo Dikwabo!

SHI MUNTU wakusapwila amba, “Panopano ponka bimpengele kebikekalakopo dikwabo,” le ukalonga’po namani? Ubwanya kulondolola amba, “Ulotanga. Bimpengele bibadilwa mu myanda ya mu būmi.” Nansha padi ukokeja kulanga mu mutyima’mba, ‘Ii, aye umwene bu ne kibudye kitye’ni?’

Nansha bimpengele bya kipangila byobimweka bu bidi’ko nyeke, ino kudi lukulupilo lwa bine lulombola’mba bisa kushinta. Inoko, kuno kushinta kekukekalakopo ku bukomo bwa muntu. Bantu kebabwanyapo kwivwanija ne pa mfulo muswelo ulongeka bintu mu bupangi ne mwanda waka bilongeka; mwanda i bakomenwe kwibikankaja nansha kwibishinta. Solomone mulopwe wa Isalela wa kala, wādi uyukene pangala pa tunangu ne bujinguludi bwandi, wāsonekele amba: “Muntu kakōkejapo kusokola mingilo yalongibwa munshi mwa dyuba; mwanda muntu nansha wingila byamwiko kusokola’kyo nanshi kakatana’yopo; eyo pakwabo napo nansha muntu wa bwino ulanga kuyuka’kyo, nanshi aye kakakōkejapo kutana’kyo.”—Musapudi 8:17.

Shi muntu kabwanyapo kukankaja bimpengele bya kipangila, lelo i ani ubwanya kwibikankaja? Bible utela Mupangi wetu bu ye muntu’tu umo ukokeja kushinta’byo. I aye utūdile’ko bifuko bikelwe’po pano pa ntanda, kimfwa bwa mema. (Musapudi 1:7) Kadi Leza byaeshidile kulampe na bantu, udi na bukomo kebudi mpwilo. Mupolofeto Yelemia pa kuleta bukamoni pa uno mwanda wānenene amba: “A mfumwami Leza! Talapo bidi wapungile diulu ne pano panshi pene pa bukomokomo bobe bukatakata, ne pa kuboko kobe koloke, kekudipo kyakukolejapo abe nansha kimo kine, ehe.” (Yelemia 32:17) Bidi Leza ye wāpangile ntanda ne byonso bidi’po, na bubine uyukile mwa kwibilongolwela mwanda wa bantu bekale’po mu ndoe ne mutyima-ntenke.—Mitōto 37:11; 115:16.

Penepa, Leza ukaleta kuno kushinta muswelo’ka? Ukavuluka amba kishinte kya bubidi kisambila pa bimpengele i kilombole amba bintu bivule bilenga moyo bilongeka pano panshi dyalelo, bilombola ‘kiyukeno’ kya kuyukila’po ‘mfulo ya pano pa ntanda.’ Yesu wānenene amba: “Bānwe pa kumona byobya bifike, mukayūka’mba, bulopwe bwa Leza bubafika.” (Mateo 24:3; Luka 21:31) Bulopwe bwa Leza, umbikalo wa mūlu utūdile’ko Leza, usa kuleta kushinta kukatampe pano pa ntanda, enka ne kukankaja bintu bya kipangila. Nansha Yehova Leza byadi na bukomo bwa kulonga namino aye mwine, ino wāpele wandi Mwana uno mwingilo. Mupolofeto Danyele pa kwisambila pa uno Mwana, wānene amba: “Kwamupebwa bufumu, ne ntumbo, ne bulopwe, amba bantu bonsololo, ne mizo, ne ndimi, bakamwingidile.”—Danyele 7:14.

Yesu Kidishitu Mwanā Leza, wāpelwe lupusa lwa kuleta kushinta konso kusakibwa pa kwalamuna ntanda ikale ke kifuko kya nsangaji. Kitatyi kyādi Yesu pano pa ntanda pano ke papite myaka elefu ibidi; wālombwele mu kitatyi kityetye bukomo bwandi bwa kukankaja bintu bya kipangila. Difuku dimo, paādi na bana bandi ba bwanga mu bwato pa Dijiba dya Ngadilea, “patalukile luvula lukatampe lwine, ne mabimbi ke akupila ku bwato ne mema asampukila monka, ino bwayūla.” Bana bandi ba  bwanga bakwatwa moyo. Kutyina bakafwa, baenda kukalangula Yesu. Nandi wālongele’po bika? Wakanda’tu enka “luvula, ebiya wanena mema nao amba: Ish! Talala nya-ā! Ponkapo luvula lwalāla ke padi talala, nya-ā!” Bana bandi ba bwanga batulumuka kebeipangula amba: “Le ani le uno nandi, udi’tu, luvula ne mema nabyo bimukōkela’tu namino?”—Mako 4:37-41.

Tamba penepa, Yesu wāzunzwidilwe mu kīkalo kya mushipiditu ne kupebwa bukomo bukatampe ne lupusa. Pamo bwa Mulopwe wa Bulopwe bwa Leza, udi na kiselwa ne bukomo bwa kuleta kushinta konso kusakibwa pa kusaka amba bantu bekale na būmi bwa ndoe ne mutyima-ntenke pano pa ntanda.

Inoko, monka motwekimwena, myanda mivule ne bimpengele biletwanga na bantu, kadi bilengejibwanga nansha kubipijibwa na bantu besakila ne ba makomwa-meso. Lelo Bulopwe bukalonga bika pa boba bendelela kulonga namino bapela kushinta? Bible wisambila pa kwiya kwa Mfumwetu Yesu “momwa mūlu, ne bamwikeulu ba bulobo bwandi, mu mudilo wa lubimbi pyā, kwibalubwila kinongo boba bampikwa kuyūka Leza, ne ku boba bampikwa kukōkela myanda-miyampe ya Mfumwetu Yesu.” Bine, usa konakanya “boba bonakanya panopanshi.”—2 Tesalonika 1:7, 8; Kusokwelwa 11:18.

Kupwa, uno Yesu Kidishitu, “Mulopwe wa umbalopwe,” usa kupwija lonso bimpengele bya pano pa ntanda. (Kusokwelwa 19:16) Ukalengeja babikalwa ba Bulopwe baleke monka kususuka ku binzengele byo-byonso. Ukengidija bukomo bwandi mwanda wa kulongolola myanda itala luvula ne mvula pa kusaka amba bantu bamwene mu mwikadilo wa kūlu ne mu kushinta kwa bitatyi. Mfulo mfulō, mulao wa Yehova Leza waālaile bantu bandi pano kepadi myaka, ukafikidila, wa amba: “Nkemupanga mvula wenu mu mwaka wandi, kabidi ntanda nayo ikapana bidibwa byayo, mityi nayo ya ntanda ikapana bipa byayo.” (Levi 26:4) Bantu bakekala na bukomo bwa kubaka mobo kwakubulwa kutyina kujimija’o ku kimpengele. Bible unena amba: “Bakōbaka mobo ne kwikala monka; kadi bakadima madimi a mañanza ne kudya bipa byayo.”—Isaya 65:21.

Le I Bika Byofwaninwe Kulonga?

Ne kutatana kwine mpika, abe ne bantu bakwabo, mudi na mulangwe wa kukekala mu ntanda kemukekalapo dikwabo bonakani bwa bimpengele. Ino le, i bika byofwaninwe kulonga pa kwikala’mo? Bidi “boba bampikwa kuyūka Leza” ne “boba bampikwa kukōkela myanda-miyampe” kebakekalapo mu ntanda ya kubulwa’mo bimpengele iya’ko; bibamweka patōka’mba, muntu ufwaninwe kwifunda tamba’nka pano myanda ya Leza ne kukwatakanya mpango yandi ya kutūla’ko bulopwe pano panshi. Leza usaka tumuyuke ne kukōkela myanda miyampe ya Bulopwe yatūdile’ko kupityila kudi wandi Mwana.

Muswelo muyampe wa kulonga namino i wa kwifunda Bible na kusumininwa. Mu Bible mudi bulombodi bwa mwa kubwaninya bisakibwa pa kwikala mu kifuko kyampikwa koneka kikekala’ko mu umbikalo wa Bulopwe. Ubulwe’po kunena Batumoni ba Yehova bakukwashe uyuke bine bifundija Bible? Bakakukwasha ufikile pa kino kitungo. Kintu kya bine i kino—shi ulonge bukomo bwa kuyuka Leza ne kukōkela ku myanda miyampe, nankyo binenwa bidi mu Nkindi 1:33 bikafikidila podi bya amba; “Ino nanshi yewa ungivwana ukekalanga ne mutyima-ntenke, kadi ukatalala nyā, ne moyo wa byamalwa mpika.”