Mwa Kwikadila Mwine Kidishitu Wabinebine Kadi Mwana Kibundi Uvuija Bisakibwa Byandi

LELO i bintu’ka bibidi byādi bimanine’po mwingilo wa Yesu? Kibajinji, Yesu wādi usaka kushinta mityima ya bantu ke malongolodipo a kipolitike. Kimfwa, tala byobya byēsambile Yesu mu Busapudi bwandi bwa ku Lūlu. Kumeso’tu kwa kwisambila pa bisakibwa bya kwikala pamo bwa mwepo ne mwinya, wālombwele bemvwaniki bandi amba nsangaji ya binebine idi na boba “bakulandapala pa mutyima.” Wābwejeje’ko kadi amba: “Dyese dyo dyabo bakōkele, . . . ba mutyima wakutōka to-ō, . . . bakupwanya.” (Mateo 5:1-11) Yesu wākweshe balondi bandi bamone mvubu idi mu kukwatañanya milangwe ne malango abo na musoñanya wa Leza, wa kuyuka kiyampe ne kibi ne kamweno kadi mu kwingidila Leza na mutyima onso.

Kya bubidi, kitatyi kyāmwene Yesu bantu basusuka, lusa lwaādi nalo pa bantu-nandi lwāmutonwene atyepeje’ko bumonya-malwa bwabo. Inoko, kādipo ulonga namino na kitungo kya kupwididila masusu. (Mateo 20:30-34) Wāundapile babela, inoko misongo yādi’ko nyeke. (Luka 6:17-19) Wātūkije mityima ya bantu bādi basusulwa, inoko bukondame bwāendelele kususula bantu. Wāpele bantu bādi ne nzala bidibwa, inoko bipupo bya nzala byādi byendelela kuponena bantu.—Mako 6:41-44.

Kushinta Mityima ne Kutyepeja Masusu

Mwanda waka Yesu wāimanine pa kushinta mityima ne kutyepeja masusu pa kyaba kya kushinta malongolodi ne kupwidilala bumonya malwa? Yesu wādi uyukile amba, Leza wādi na mpango ya kwingidija Bulopwe Bwandi mu mafuku āya kumeso mwanda wa kufudija imbikalo yonso ya bantu ne kutalula’ko byonso bileta masusu. (Luka 4:43; 8:1) O mwanda, bana ba bwanga pa kuzenza Yesu bapityije kitatyi kivule mu kubelula babela, Yesu wēbanene amba: “Twendei bidi nanshi ku bibundi bilondakene ne kino nako nkasapwilekopo myanda, mwanda kyo naīdile i kyonka kino’ki.” (Mako 1:32-38) Yesu wātyepeje’ko masusu a bantu bavule, ino wādi utangidije kumeso kusapula ne kufundija mwanda wa Leza.

Batumoni ba Yehova baloñanga bukomo bwa kwiula Yesu mu mwingilo wabo wa busapudi dyalelo. Batompanga kutyepeja’ko masusu na kukwasha bantu basakilwa bukwashi. Inoko, Batumoni kebaloñangapo bukomo bwa kupwididila bukondame bwa mu ino ntanda. Bakulupile amba Bulopwe bwa Leza busa kufundula’ko bintu byonso bileta masusu. (Mateo 6:10) Pamo bwa Yesu, baloñanga bukomo bwa kushinta mityima ke malongolodipo a kipolitike. Kino i kilongwa kiyampe mwanda makambakano mavule a muntu i a mu mwikadilo ke a politikepo.

Bana ba Kibundi Bavuija Bisakibwa Byabo

Kadi, Batumoni ba Yehova bayukile amba badi na kiselwa kya bwine Kidishitu kya kwikala bu bana ba kibundi bayampe. O mwanda balēmekele balupusa. Bakankamikanga bakwabo bakōkele bijila kupityila ku mabuku ne mwingilo wabo wa kusapula bukamoni. Inoko, shi mbulamatadi waleta misoñanya keikwatañenepo na misoñanya ya Leza, Batumoni ba Yehova kebakōkelanga’yopo. Bakōkelanga “Leza, bantu munyuma.”—Bilongwa 5:29; Loma 13:1-7.

 Batumoni ba Yehova bapempulanga bantu bonso ba mu kyabo kibundi mwanda wa kwibafundija Bible ku bitupu. Bipa bilupuka’ko, i kushinta kwa mityima ya midiyo ne midiyo ya bantu. Mwaka ne mwaka, bantu tutwa na tutwa twa tununu bakwashibwanga bakomene bilongwa bya kyonakanya, kimfwa kutoma mfwanka, bunkolwankolwa, bitomibwa bikolwañana, makayo a kwidya lupeto ne busekese. Bekalanga ke bana ba kibundi bavuija bisakibwa bya mu mwikadilo, mwanda i befunde kwingidija misoñanya ya mu Bible mu būmi bwabo.

Kadi, bufundiji bwa mu Bible bukwashanga bantu ba mu kisaka batamije bulēme bobelēmekele abo bene na bene ne kulumbulula mīsambo yabo—pa bukata bwa ba bulume ne mukaji, bwa bambutwile ne bana, ne pa bukata bwa bana abo bene na bene. Bino i bintu biningishanga bumo bwa kisaka. Shi kisaka kikele mu bumo, bantu bebajokolokele nabo bakebeula.

Pa kupwa kubandaula myanda yesambilwa’po mu kino kishinte, le ulanga amba: Bible witabije boba batyanga kipwilo na politike? Kilondololwa kidi patōka; ke amopo. Ino le Bene Kidishitu ba bine bafwaninwe kwikala bana ba kibundi bavuija bisakibwa byabo? I amo. Le bakalonga kino namani? I na kulonda musoñanya wa Yesu wa kwikala pamo bwa mwepo ne pamo bwa mwinya mu ino ntanda.

Boba bonso balonga bukomo bwa kulonda misoñanya miyampe ya Kidishitu bakamwena’mo byabuyabuya abo ne byabo bisaka—kubadila’mo ne bantu ba mu bifuko byobashikete’mo. Batumoni ba Yehova ba mu wenu mwaba bakasangela kukusapwila myanda mivule itala pa mpangiko ya bufundiji bwa Bible ipityijibwa mu kyenu kibundi dyalelo. *

[Kunshi kwa dyani]

[Bushintuludi pa paje 7]

Yesu wādi usaka kushinta mityima, ke malongolodipo a kipolitike

[Bushintuludi pa paje 8]

Batumoni ba Yehova bayukile amba badi na kiselwa kya kwikala bu bana ba kibundi bayampe