Lelo I Ani Wivwananga Milombelo?

SHI kudi Wivwananga milombelo, nankyo ufwaninwe kwikala Umpangi. Lelo i ani mukwabo wāpangile bongolo bwa muntu ubwanya kuyuka bidi mu milangwe yobe? Le i ani mukwabo ubwanya kulondolola milombelo ne kupa bantu bukwashi bobasakilwa? Inoko, ubwanya kwiipangula amba, ‘le i byendele’mo kukulupila mudi Umpangi?’

Bantu bavule balañanga amba pa kukulupila mudi Umpangi, ufwaninwe kupatanya bukamoni buleta sianse ya dyalelo. Inoko, mulangwe wa amba kukulupila mudi Leza kekukwatañenepo na sianse i wa bubela. Tala bino bilonda’ko.

◼ Mu bwipangudi bwa panopano bwaipangwilwe bapolofesele ba sianse 1646 ba ku masomo 21 matumbe a Inivelesite a mu États-Unis, batene’mo amba enka polofesele umo pa basatu ye wanene amba “kakulupilepo mudi Leza.”

Bubine i buno amba, befundi bavule ba sianse bakulupile amba Leza udi’ko.

Bukamoni Bulombola’mba Umpangi Udi’ko

Le tuketabija pampikwa bukamoni bulombola amba kudi wivwananga milombelo? Nansha dimo. Mulangwe wa amba lwitabijo i kukulupila pampikwa bukamoni i mulangwe mwitupe. Bible ushintulula lwitabijo bu “kusumininwa kwa mu bintu bikulupilwe . . . , ne kuyūkidila kwa mu byobya bintu byampikwa kumweka.” (Bahebelu 11:1) Bwalamuni bukwabo bunena amba lwitabijo “i kukulupila bintu byampikwa kumweka’mba i byabinebine.” (Myanda Miyampe ku Bonso) Kimfwa, kukokejapo kumona luvula, ino na bubine ubwanya kumona bintu bilonga luvula kupityila ku kujina kwa mani ku misambo ya mutyi. Papo waitabija ne kwitabija amba luvula ludi’ko. Muswelo umo onka, nansha byoketubwanyapo kumona Yewa Wivwananga  milombelo, ino tubwanya kubandaula bukamoni budi’ko bubwanya kwitukulupija amba udi’ko.

Le i kwepi kotukokeja kutana bukamoni bulombola’mba Leza udi’ko? Tufwaninwe kubandila bintu bitujokolokele. Bible unena amba: “Ke-mantu mōbo onso adi ne bashimiki bao, ino wakushimika bintu byonso i Leza.” (Bahebelu 3:4) Lelo witabije bubinebine bwa bino binenwa? Padi kitatyi kyolangulukila pa mwikadile diulu ne ntanda, mwāshilwidile būmi, nansha mupangilwe bongolo bwa muntu mu muswelo mukutakane kupita bintu byonso bya pano pa ntanda, ukamona’mba kudi muntu udi peulu utabukile bantu bonso. *

Inoko bupangi bubwanya kwitufundija bintu bityetye’tu bitala padi Leza. Kumona bukamoni bulombola’mba Leza udi’ko kupityila ku bupangi, kudi pamo na kwivwana matabula a muntu ufwena ku mulango mushite. Ubayuka’mba kudi muntu udi panja, ino le i ani? Pa kumuyuka, bikulomba kushitula mulango. Netu tufwaninwe kulonga uno muswelo pa kuyuka Yewa udi kunyuma kwa bupangi.

Bible o mulango utwala ku kuyuka Leza. Shi ushitule uno mulango, kadi ubandaule bupolofeto palapala budi’mo ne kufikidila kwabo, ukatana bukamoni bulombola amba Leza udi’ko. * Ino kutabukidila, nsekununi ya mwikadile Leza na bantu ilombola mwine mwikadile bumuntu bwa Wivwananga milombelo.

 Le Yewa Wivwananga Milombelo Udi Namani?

Bible ulombola patōka amba Yewa Wivwananga milombelo i muntu—muntu okokeja kuyuka. Na bubine i enka muntu ye ubwanya kuteja na katentekeji. I bikulupija pa kutanga amba: “Ē! abe wivwananga kulombela, kudi abe ko kukāya bantu bonso.” (Mitōto 65:2) Wivwananga boba bamulomba na lwitabijo. Kadi udi na dijina. Bible unena amba: “Yehova udi kulampe na bapupakane: Ino wivwananga lulombelo lwa boloke.”—Nkindi 15:29.

Yehova uteñwanga na biyampe nansha na bibi. I “Leza wa lusa” kadi witwanga ne bu “Leza wa dyese ne dyesepo.” (2 Kodinda 13:11; 1 Temote 1:11) Bible unena pangala pa byālongele Leza kitatyi kyaāndabile bubi amba: “Kyamufityija ku mutyima.” (Ngalwilo 6:5, 6) Mulangwe wa amba Leza ulengejanga masusu mwanda wa kutompa bantu i wa bubela. Bible unena’mba: “Leka! Leka! Leka! kulampe kwine, Leza kalongapo bibi.” (Yoba 34:10) Inoko, ubwanya kwiipangula’mba, ‘Shi Leza ye Umpangi mwine bukomo bonso, mwanda waka ulekele masusu endelela?’

Yehova i mupe bantu bukomo bwa kwingidija bwanapabo bwa kwitongela, ne kino kitulombola kintu kampanda pa mwikadile Leza. Tubulwepo kukwata na mutyika bwanapabo bwetu bwa kutonga muswelo otubwanya kwikala mu būmi? Ino yō, bantu bavule bengidijanga bibi bwanapabo bwabo ne kwiletela masusu abo bene ne bakwabo. Shi ke pano, kipangujo kifwaninwe kulangulukila’po na kusumininwa i kino: Lelo Leza ubwanya namani kupwa masusu pampikwa kuyata bantu bwanapabo? Tukabandaula kino kipangujo mu kishinte kilonda’ko.

[Kunshi kwa dyani]

[Kapango pa paje 5]

Lelo I Bipwilo Bikulengeja Utatane?

I kya bulanda, mwanda i bipwilo bilengejanga bavule batatane kwikala’ko kwa Yewa wa lusa Wivwanga milombelo. Kwikuja kwikujanga bipwilo mu divita, butumbula ne kutala kilomonyeka konwa kwa bana batyetye, kutwalanga’nka ne muntu ukwete milombelo na mutyika ku kunena amba, “Nkikikulupilapo mudi Leza.”

Mwanda waka bipwilo bidi divule na lupusa lubi? Mu kīpi: Bantu babi baloñanga bintu bibi mu dijina dya kipwilo. Bible wālaile amba bwine Kidishitu bwādi bwa kutādilwa ne kwingidijibwa bibi. Mutumibwa Polo wāsapwidile batadi Bene Kidishitu amba: “Ku bānwe bene nako kukemutalukilanga bantu bakwisamba byalupatalupata, mwanda wa kukokela bāna-babwanga ko badi’mba, betulonde.”—Bilongwa 20:29, 30.

Leza ushikilwe bipwilo bya bubela. Na bubine, Bible Kinenwa kya Leza, kilambikanga bipwilo bya bubela “mashi . . . a bonsololo batapilwe panopanshi.” (Kusokwelwa 18:24) Bino bipwilo i bilambikwe mashi ku meso a Leza mwanda i bikomenwe kufundija bantu myanda itala Leza wa bine, buswe bwisokwele bu muntu.—1 Yoano 4:8.

Yewa Wivwananga kulomba wivwaninanga lusa bantu basusulwa na bipwilo. Panopano ponka, buswe bwa Leza bwaswele bantu busa kumutonona atyibile bipwilo byonso bya buzazangi mambo kupityila kudi Yesu. Yesu wānene amba: “Mu dyodya difuku bangi bakanena mba; abe Mfumwetu! abe Mfumwetu! ketwadipo tufumika mu dijina dyobe, a? . . . Ino nami nkebatentulula’mba: Mhm! Ami nkimuyūkilepo, mfundukei papo bānwe bakulonga bubi.”—Mateo 7:22, 23.