Adama muntu mubajinji waikele’ko myaka tutwa na tutwa. Ino ku mfulo wanunupa ne kufwa wafwa. Tamba penepa, bantu i batompe miswelo mivule ya kwepuka bununu. Ino kekudipo nansha umo ubwanya kunyema lufu. Mwanda waka? Adama wānunupile ne kufwa mwanda wālongele bubi na kuleka kukōkela Leza. Tununupanga mwanda twibapyane bubi kudi Adama ne lufu mpalo yabo.​—Tanga Ngalwilo 5:5; Loma 5:12.

Pa kwikala na būmi bwa nyeke, tusakilwa muntu wa kwitufutyila kikūlwa. (Yoba 33:24, 25) Kikūlwa i mfutwa ifutwanga mwanda wa kunyongolola muntu, kadi batwe netu tusakilwa kunyongololwa ku lufu. (Divilu 21:29, 30) Yesu wāfutyile mfutwa kitatyi kyaētufwidile.—Tanga Yoano 3:16.

Ke muntupo yense ukanyongololwa ku misongo ne ku bununu. Na bubine, bantu kebakōkelepo Leza pamo bwa Adama, kebakapandepo. I enka bantu balekelwe bubi bwabo bo bakekala na būmi bwa nyeke.​—Tanga Isaya 33:24; 35:3-6.

Pa kulekelwa, tufwaninwe kulonga’po kintu. Tufwaninwe kuyuka Leza kupityila ku kwifunda Bible Kinenwa kyandi. Bible witufundijanga mwa kwikadila na būmi bulumbuluke ne muswelo wa kwitabijibwa na Leza ne kwikala na būmi bwa nyeke.​—Tanga Yoano 17:3; Bilongwa 3:19.