NTEMU WA YEHOWA mukuabu wa mu Canada diende Don utu udienzeja bua kuyukila ne bantu batu basombele mu njila. Don udi ulonda bua umue wa kudibu ne: “Tatu kampanda uvua kayi ne muaba wa kusombela diende Peter uvua ne manyanu mapite a bantu bonso batu basombela mu tujila tua manyanu bankadi mumone. Kavua usankisha bua kumutangila to, ne uvua ne mayele avuaye wipata nawu bantu kudiye. Uvua misangu ne misangu ubenga bua bantu kabamuenzedi malu mimpe to.” Nansha nanku, mu bidimu bipite pa 14, Don uvua udienzeja imue misangu bua kuenzela muntu uvua kayi ne muaba wa kusombela eu malu mimpe ne lutulu.

Dimue dituku, Peter wakebeja Don ne: “Bua tshinyi udi untatshisha? Bantu bakuabu bonso kabatu batshiuka malu anyi to. Wewe udi uditatshisha bua tshinyi?” Don wakandamuna Peter ne budimu buonso ne mvese isatu, udienzeja bua kulenga muoyo wende. Tshia kumpala, wakebeja Peter ni uvua mumanye ne: Nzambi udi ne dîna, ne wakamulomba bua abale Musambu 83:18 mu Bible. Pashishe Don wakaleja Peter tshivuaye uditatshishila, kumulombaye bua abale Lomo 10:13, 14 udi wamba ne: “muntu yonso udi ubikila dîna dia Yehowa neasungidibue.” Ndekelu wa bionso, Don wakabala Matayi 9:36 ne kulombaye Peter bua adibadile nkayende. Mvese eu udi wamba ne: “Pakamonaye bisumbu bia bantu, [Yezu] wakabumvuila luse, bualu bavua batata, balekelela bu mikoko idi kayiyi ne mulami.” Bua mêyi au, Peter wakapuekesha binsonji, kuebejaye ne: “Ndi panyi umue wa ku mikoko eyi anyi?”

Peter wakatuadija kushintuluka. Wakowa mâyi, kukosaye muedi bimpe, ne kuvualaye bilamba bimpe bivua Don mumupeshe. Peter wakatungunuka ne kudilama ne mankenda.

Peter uvua ne kakanda kende kavuaye ufundila malu. Mu bitupa biaku bia kumpala muvua malu mabi ne makole menemene avua mamufikile, kadi malu a ndekelu avuaye mufunde avua owu mashilangane. Bumue bua kudiwu budi ne: “Ndi mulonge dîna dia Nzambi lelu. Mpindieu pandi nsambila, ndi nsambila anu Yehowa. Kumanya dîna diende mbualu budi busankisha bikole. Don udi wamba ne: Yehowa udi mua kulua Mulunda wanyi, mmuntu udi mua kunteleja misangu  yonso nansha meme mumulombe bualu kayi anyi dîba kayi.”

Mêyi a ndekelu a Peter uvua muafundile bana babu. Wakafunda ne:

“Lelu tshiena ndiumvua bimpe to. Ndi ngela meji ne: bidimu bikadi bintshiokeshe. Kadi nansha mudi dituku dia lelu edi dikale dianyi dia ndekelu, ndi mumanye ne: nemmonangane kabidi ne mulunda wanyi [Don] mu Mparadizu. Nuenu babale mêyi aa, tshienaku kabidi to. Kadi nuenu bamone muntu mukuabu ku nkita yanyi udi umueneka bu ne: kavua mua kuikala muaba au, nuyukile nende, ne ndi nnusengelela bua kubala kakanda ka dikala dia ble aka [wakula bua mukanda udi wambuluisha bua kulonga Bible wa “Bulelela budi bufikisha ku muoyo wa kashidi” uvuaye mupete kukavua bidimu]. * Kakanda aka kadi kamba ne: nemmonangane kabidi ne mulunda wanyi mu Mparadizu. Ndi ngitabuja bualu ebu ne muoyo wanyi wonso. Muanenu munanga Peter.”

Pakavuabu bamane kujiika Peter, Ummi muanabu ne Peter wakumvuija ne: “Kukadi bidimu bibidi pavua Peter mumbikile. Ke musangu wa kumpala uvuaye umueneka ne disanka panyima pa bidimu bia bungi. Uvua mene useka.” Ummi wakambila Don ne: “Nembale mukanda eu bualu, bualu buonso buvua mua kulenga muoyo wa muanetu budi ne bua kuikala bualu bua pa buabu.” Ummi wakitaba kabidi bua kulonga ne Ntemu wa Yehowa mukanda wa Bible utu ulongesha tshinyi menemene? udibu bapatule bidimu bidi panshi ebi.

Tuetu petu tudi mua kutangila bantu katuyi tuimanyina pa tshimuenekelu tshiabu, tuleja bantu ba mishindu yonso dinanga dilelela, ne bikale ne lutulu. (1 Tim. 2:3, 4) Patudi tuenza nunku, tudi mua kukoka bantu badi bu Peter, badi mua kuikala bamueneka kabayi basankisha, kadi bikale ne muoyo muimpe. Tuikale bajadike ne: Nzambi udi “utangila mu mutshima” neakoleshe bulelela mu mioyo ya bantu badi badiakaje.​—1 Sam. 16:7; Yone 6:44.