Tshintu tshia kashidi tshidi Nzambi mutupeshe

KABIENAKU bikukemesha bua kumona ne: bintu bidi bena meji bitaba mudibi ne mushinga bua muoyo kuikalawu pa dibulungu kayi dionso mbabitele buludiludi anyi mu mushindu mukuabu mu nshapita wa kumpala wa mu Bible anyi? Mbintu kayi abi?

Bua koku kuikalaku muoyo, bidi bikengela kuikale mâyi a bungi, a buena adibu batele mu Genese 1:2. Bidi bikengela bua luya luikale lukumbane bua mâyi adi pa buloba kushalawu anu menguluke. Ebi bidi bilomba ne: buloba buikale mutantshi muakanyine ne dîba. Muyuki wa mu Genese udi wakula njila ne njila bua dîba ne tshididi dienzela buloba.

Bua dibulungu kuluadi muaba udi bantu mua kusombela, didi ne bua kuikala ne lupepele luikale ne bintu bialu bia lubungibungi. Bualu ebu bua mushinga mbuleja mu Genese 1:6-8. Ditoloka dia bikunyibua didibu baleje mu Genese 1:11, 12, ndivudije kabidi lupepele luimpe lutudi tueyela. Dibulungu didi bintu bia muoyo bia mishindu yonso mua kusombela didi ne bua kuikala ne buloba bûme ne buloba bua bufuke, anu mudibi bileja mu Genese 1:9-12. Bua kujikija, bua mivu kuikalayi mimpe, dibulungu didi ne bua kuikala disendame ne kushala kadiyi dishintuluka. Bua bidi bitangila buloba, bualu ebu budi buenzeka ku diambuluisha dia bukole budi ngondo ukoka nabu buloba. Mbakule bua ngondo ne malu mimpe adiye utuenzela mu Genese 1:14, 16.

Mmunyi muvua Mose, uvua kayi ne biamu bia buena bidi nabi bena malu a siyanse lelu eu, mufike ku diakula bua bintu ebi? Mose uvuaku mufike ku dijingulula mushinga udi nawu bintu ebi bualu uvua ne dimanya dia pa buadi divua bena mu tshikondo tshiende kabayi nadi anyi? Diandamuna didi ne: uvua muenzeja kudi nyuma wa Mufuki wa diulu ne buloba. Ke bualu kayi muyuki udi mu mukanda wa Genese mmulelela.

Bible udi ujadika ne: bintu bia dikema bidi mu tshibuashibuashi tshitudi tumona etshi bidi ne tshidibu babienzele. Musambu 115:16 udi wamba ne: ‘Diulu ne diulu mbia Yehowa; kadi wakupa bana ba bantu buloba.’ Musambu mukuabu udi wamba ne: ‘Wakajadika buloba pa bishimikidi biabu, bua kabunyungi too ne kashidi.’ (Musambu 104:5) Bikala tshibuashibuashi ne buloba ebu buimpe bilongolola ne bienza kudi Mufuki, mbimpe kuitaba kabidi ne: udi ne bukole bua kubilama. Mbuena kuamba ne: udi mua kutekemena ne dishindika dionso dikumbana dia mulayi mulenga eu: ‘Bantu bakane nebapiane buloba, nebashikamemu tshiendelele.’ (Musambu 37:29) Bua kuamba bulelela, Nzambi ‘kakafuka [buloba] bu tshintu tshia patupu’ kadi ‘wakabufuka bua bashikamepu’ bua kashidi kudi bantu badi banyisha bidiye muenze.​—Yeshaya 45:18.

Bilondeshile Bible, Yezu wakalua pa buloba bua kutulongesha malu a Nzambi ne dijinga diende dia kupesha bantu badi bamutumikila muoyo wa tshiendelele. (Yone 3:16) Tudi batuishibue ne: mu katupa kîpi emu, Nzambi ‘neabutule badi babutula buloba,’ kadi bantu ba mu matunga onso badi basue ditalala ne badi bitaba malu adiye mulongolole bua lupandu nebashale ne muoyo. (Buakabuluibua 7:9, 14; 11:18) Dîba adi muoyo newikale mua kusankisha bantu bikole patungunukabu ne kujingulula bintu bia dikema bidi Nzambi mufuke ne kusanka bua bualu buabi kashidi ne tshiendelele!​—Muambi 3:11; Lomo 8:21.

[Mêyi a dianyisha bua tshimfuanyi mu dibeji 8]

Foto wa NASA