Udi utumvuila mu makenga etu
Semena pabuipi ne Nzambi
Udi utumvuila mu makenga etu
NTEMU wa Yehowa mukuabu udi misionere mukulakaje wakamba ne: “Ndi ngumvua bibi menemene pandi nkumona utata.” Yehowa Nzambi ke udi tshilejilu bua kuditeka pa muaba wa bakuabu. Udi umvua makenga adi bantu bende nawu. Ntshinyi tshidi tshituleja nanku? Mêyi a Yezu ne malu avuaye wenza pavuaye pa buloba avua aleja mushindu utu Yehowa umvuilangana menemene ne dinanga. (Yone 5:19) Tshilejilu, tukonkononayi bualu buvua buenzeke bulonda mu Yone 11:33-35.
Pavua Lazalo mulunda wa Yezu musama ne mufue lufu lua tshikoso, Yezu wakaya mu musoko wa ba Lazalo. Mariya ne Mâta bana babu ne Lazalo bavua ne kanyinganyinga kakole. Yezu uvua munange bena mu dîku adi bikole. (Yone 11:5) Ntshinyi tshiakenzaye? Bible udi wamba ne: ‘Pakatangila Yezu [Mariya] udila ne bena Yuda bakalua nende badila, [lungenyi luende kulubakana, MMM], mubidi wende wakakanka, wabakakonka ne: Nuakumujika kudi kunyi? Bakamuambila ne: Mukalenge, lua umone. Yezu wakashikunka,’ anyi kudila. (Yone 11:33-35) Yezu uvua mudile bua tshinyi? Bualu mulunda wende wa pa muoyo Lazalo uvua mufue, kadi uvua ukeba kumujula ku lufu. (Yone 11:41-44) Kavuaku tshintu tshikuabu tshivua tshitonde Yezu bikole anyi?
Bala kabidi mêyi atudi batela kulu eku aa. Mvese eu udi wamba ne: Pavua Yezu mumone Mariya ne bantu avuaye nabu badila, ‘mubidi wende wakakanka’ ne “lungenyi luende kulubakana.” Miaku ya tshiena Greke idibu batela muaba eu idi ileja dipampakana dikole. * Malu avua Yezu mumone akamulenga ku muoyo bikole. Dipampakana diende dikole diakamuenekela ku binsonji bivua bimutengebele mu mêsu. Bidi bimueneka ne: makenga a bantu bakuabu avua alenga Yezu ku muoyo bikole. Bikatuku bikufikile bua kudila pavua muntu uuvua ulame udila anyi?—Lomo 12:15.
Mushindu udi Yezu umvuila bantu bakuabu udi utuleja ngikadilu ya Tatuende Yehowa ne mutuye. Vuluka ne: Yezu uvua ne ngikadilu ya buena ya Tatuende menemene, ke bualu kayi wakafika ne ku diamba ne: “Wakuntangila meme wakutangila Tatu.” (Yone 14:9) Nunku patudi tubala ne: ‘Yezu wakashikunka,’ tudi mua kumona tshitu Yehowa umvua pende bua makenga a batendeledi bende. Bualu ebu badi babujadika ne kudi bafundi bakuabu ba Bible. (Yeshaya 63:9; Zekâya 2:8) Yehowa udi Nzambi wa luse be!
Bantu batu basue kusomba ne badi bumvuila bakuabu luse. Patudi batekete mu maboko anyi bikala ne tunyinganyinga, tutu tuya kudi muntu udi mua kutumvuila mu lutatu lutudi nalu ne kutuambuluisha. Tutambe kuyayi kudi Yehowa, Nzambi wa luse utu utumvuila mu makenga etu ne utu mumanye tshitudi tudidila!—Musambu 56:8.
[Mêyi adi kuinshi]
^ tshik. 3 Muaku wa tshiena Greke udibu bakudimuna ne: “wakashikunka” udi umvuija “kudila mundamunda.” Muaku udibu benza nawu mudimu bua kumvuija kudila kua Mariya ne kua bantu bakuabu udi umvuija “kudila ne dîyi dikole, wa kanjabala.”