Micheline: Lelu eu ndi ngenda mpesha bantu bonso ba mu tshitupa tshinu etshi trakte eu. Udi ne tshiena-bualu tshia ne: Kuenaku musue kupeta mandamuna a nkonko eyi anyi? Diebe dibeji ndiodi edi.

Sophie: Didi diakula malu a tshitendelelu anyi?

Micheline: Eyo. Tangila nkonko isambombo idi pa mutu apa. Ndukonko kayi ludii . . .

Sophie: Imanyina apu. Udi ujimija dîba diebe tshianana bua kuyukila nanyi.

Micheline: Bua tshinyi udi wamba nanku?

Sophie: Mu kuamba kuimpe, tshitu ngitabuja Nzambi to.

Micheline: Ndi kuela tuasakidila bua muudi mundeje malu onso patoke. Ndi musue kumanya, mmuenenu eu ke uutu nende konso eku anyi?

Sophie: Tòo, pavua ngenda nkola mvua nsambila. Kadi nkamulekele kuya mu nzambi kukadi matuku a bungi.

Micheline: Mbimpe. Kadi anyishaku nkuambila dîna dianyi. Dîna dianyi m’Micheline.

Sophie: Dianyi meme n’Sophie.

Micheline: Ndi ne disanka bua kumonangana nebe Sophie wetu.

Sophie: Nansha meme panyi.

Micheline: Ya Sophie, tshiena mulue muaba eu bua kukuenzeja ku bukole bua witabe tshindi ngamba to. Kadi ndi amu ne dijinga dia kumanya bualu kampanda. Kudiku bualu kampanda budi bukufikishe bua kubenga kuitaba dikalaku dia Nzambi anyi?

Sophie: Eyo. Maman uvua mupetangane ne njiwu mikole mu mashinyi kukadi kupite bidimu 17.

Micheline: Bibi be. Uvua mutapike anyi?

Sophie: Eyo, katshi anu ku dîba adi katshitu wenda bimpe to.

Micheline: Bidi bienza luse be. Bushuwa, udi ne bua kumvua bibi.

Sophie: Bidi bisama ku muoyo bikole. Ke bualu kayi ndi anu ndiebeja ne: bikala Nzambi udiku, bua tshinyi udi mua kulekela bualu bua nunku buenzeka? Nzambi mmutulekele tukenga mushindu eu bua tshinyi?

Micheline: Ki mbibi bua wewe kuamba muudi udiumvua anyi kuela nkonko to. Patudi ne ntatu, bidi ne mushinga bua kudiebeja bua tshinyi tudi tukenga. Nansha bamue balume ne bakaji ba lulamatu ba mu bikondo bivuabu bafunda Bible bakadiela pabu nkonko mu bualu ebu.

Sophie: Bushuwa anyi?

Micheline: Eyo. Ndiku mua kukuleja tshimue tshilejilu tshia mu Bible anyi?

Sophie: Udi anu mua kundeja.

Micheline: Umvua tshivua muprofete wa lulamatu Habakuka muebeje Nzambi mu mukanda wa Habakuka nshapita wa 1, mvese 2 ne 3, udi wamba ne: ‘Yehowa, nendile kuudi musangu bule bishi bua wewe unkuatshishe? Kuena ungunvuila, anyi? Ndi ndila kuudi bua tshimbambila tshidiku, ne wewe kuena utupandisha. Bualu kayi udi ummueneshisha bienzedi bibi?’ Nkonko eyi mmifuananganaku ne iukadi mudiele anyi?

Sophie: Mmifuanangane.

Micheline: Nzambi kavua mutandishe Habakuka bua muvuaye muele nkonko ayi to, kavua nansha muambile Habakuka ne: udi ne bua kuikala ne ditabuja dikole to.

Sophie: Bimpe be!

Micheline: Bible udi utuambila ne: Nzambi udi umona ntatu itudi nayi ne udi ututabalela.

Sophie: Udi musue kuamba tshinyi?

 Micheline: Imana nkuleja tshilejilu tshikuabu mu Ekesode 3:7. Udiku mua kubala mvese eu anyi?

Sophie: Kakuena bualu to. Udi wamba ne: ‘Ngakutangila dikenga dia bantu banyi badi mu Ejipitu bulelela, ngakumvua muadi wabu bualu bua tupita tuabu; bualu bua ndi mumanye kanyinganyinga kabu.’

Micheline: Tuasakidila. Bilondeshile mvese eu, Nzambi udiku umona ntatu ya bantu bende anyi?

Sophie: Eyowa, bidi bimueneka nanku.

Micheline: Kena anu umona patupu tshidi tshienzeka to. Tangila kabidi tshidi tshitupa tshia ndekelu tshia mvese eu tshiamba. Nzambi udi wamba ne: “Ndi mumanye kanyinganyinga kabu.” Mêyi aa adiku umvuika bu mêyi a Nzambi udi kayi uditeka pa muaba wa bantu anyi?

Sophie: Tòo, kabiena nanku to.

Micheline: Bulelela, Nzambi kena anu umona ntatu yetu patupu to, kadi udi kabidi umvua bibi patudi tukenga.

Sophie: Wambilamu anyi?

Micheline: Bidi nanku, tuanji kubala bualu bukuabu pavua bantu ba Nzambi bakenga. Budi mu Yeshaya 63:9. Tshitupa tshia kumpala tshia mvese eu tshidi tshiamba ne: ‘Mu makenga abu onso yeye wakumvua dikenga.’ Kabienaku bileja ne: Nzambi uvua mumvue bibi bua makenga avua makuate bantu bende anyi?

Sophie: Eyo, ke mudibi.

Micheline: Sophie wetu, mu bulelela, Nzambi udi ututabalela bikole, ne bidi bimutonda padiye utumona tukenga. Padibi bitusama ku muoyo, bidi bimusama pende ku muoyo.

Micheline: Kumpala kua meme kuya, ndi njinga kukuleja bualu kampanda.

Sophie: Mbimpe.

Micheline: Tutangilabi tshidi Bible utuambila bua bukole bua Nzambi. Mvese undi ngakuila udi mu Yelemiya 10:12. Udiku mua kumubala anyi?

Sophie: Eyo. Udi wamba ne: ‘Nzambi nyeye wakafuka buloba ku bukole buende, wakajadika bia pa buloba ku lungenyi luende, wakavungula diulu ku meji ende.’

Micheline: Tuasakidila. Tuanji kuelabi meji bua mvese eu. Nzambi uvuaku dijinga ne bukole bua bungi bua kufuka diulu ne buloba binene nunku anyi?

Sophie: Ke mudibi bimueneka.

Micheline: Ambaku tung, bikala Nzambi udi ne bukole bua kufuka bintu bionso bidi bitunyunguluke ebi, katuenaku mua kuitaba ne: udi ne bukole bua kukuba bifukibue biende bionso anyi?

Sophie: Udi nabu.

Micheline: Elabi meji kabidi bua maman webe. Bua tshinyi bidi bikutonda paudi umumona ukenga?

Sophie: Bualu ndi mumunange. Si mmaman wanyi.

Micheline: Bu wewe ne bukole bua kumondopa lelu, kuvuaku mua kumondopa anyi?

Sophie: Mvua mua kumondopa.

Micheline: Elabi meji tshidi bualu ebu busua kumvuija. Bible udi wamba ne: Nzambi udi umona ntatu yetu, udi ukenga netu, ne udi ne bukole bua bungi. Udiku mua kuela meji mushindu udiye udikanda bua kubenga kujikija diakamue makenga etu anyi?

Sophie: Tshitu muanji kuela meji nanku to.

Micheline: Kabienaku bimueneka ne: udi ne kabingila kimpe kadi kamukanda bua kujikija ntatu yetu anyi? *

Sophie: Hmm, ndi ngela meji ne: udi naku.

Micheline: Ndi mumvue telefone webe udila, nanku ndi mua kulua dituku dikuabu bua tulue kuyukila bua bualu ebu.

Sophie: Tuasakidila. Nensanke bikole. *