Yehowa udiku wangata ne mushinga bidi batendeledi bende benza bua kumusankisha anyi? Bamue bantu badi mua kuandamuna ne: tòo, bamba ne: Nzambi kena ututabalela to. Kadi kuela meji mushindu eu kudi kusaka bantu bua kumona Nzambi mu mushindu mubi. Mu Bible Dîyi diende badi baleja malu mu mushindu muimpe. Bible udi utujadikila ne: Yehowa udi wanyisha kudienzeja kua batendeledi bende ba lulamatu. Konkonona mêyi a mupostolo Paulo adi mu Ebelu 11:6.

Ntshinyi tshidi tshikengela bua kusankisha Yehowa? Paulo udi wamba ne: ‘bikalaku kakuyi ditabuja, muntu kena mua kusankisha Nzambi.’ Mmona ne: Paulo kena wamba ne: mbikole bua kusankisha Nzambi kakuyi ditabuja to. Kadi, udi wamba ne: muntu kena mua kuenza nunku. Mu mêyi makuabu, ditabuja ntshintu tshia mushinga mukole tshidi tshiambuluisha bua kusankisha Nzambi.

Nditabuja dia mushindu kayi didi disankisha Yehowa? Ditabuja ditudi nadi kudi Nzambi didi dilomba malu abidi. Bua kumpala, tudi “ne bua kuitaba ne: udiku.” Imue nkudimuinu ya Bible idi yamba ne: “kuitabuja ne: mmulelela” ne “kuitabuja ne: yeye udiku.” Mmunyi mutudi mua kusankisha Nzambi tuetu katuyi tuitaba dikalaku diende? Ne kabidi ditabuja dilelela didi dilomba malu a bungi, bualu nansha bademon badi bitabuja ne: Yehowa udiku. (Yakobo 2:19) Patudi tuitabuja ne: Nzambi udiku, bidi bitusaka kuenza bualu kampanda, mmumue ne: kuleja ditabuja dietu pa kuikala ne nsombelu udi umusankisha.​—Yakobo 2:20, 26.

Bualu buibidi, tudi “ne bua kuitabuja” ne: Nzambi ‘mmufutshi.’ Muntu udi ne ditabuja dilelela mutuishibue ne: didienzeja diende bua kuikala ne nsombelu udi usankisha Nzambi kadiena patupu. (1 Kolinto 15:58) Mmunyi mutudi mua kusankisha Yehowa tuetu tuelesha mpata ne: kena mua kutufuta? (Yakobo 1:17; 1 Petelo 5:7) Muntu udi wamba ne: Nzambi kena utabalela bantu, kena ubanyisha anyi kena ubambuluisha ki mmumanye Nzambi wa mu Bible bimpe to.

Muntu wa mushindu kayi udi Yehowa ufuta? Paulo udi wamba ne: “Badi bamukeba ne muoyo mujima.” Mukanda kampanda wa bakudimunyi ba Bible udi wamba ne: muaku wa mu tshiena Greke udibu bakudimune ne: “kukeba ne muoyo mujima,” kawena umvuija “kukeba bua kupeta” kadi, udi umvuija kuya kudi Nzambi bua “kumutendelela.” Mukanda mukuabu udi pawu umvuija ne: muaku eu wa pa muanda udibu benze nawu mudimu udi ne lungenyi lua kudienzeja ne kudifila bikole. Bulelela, Yehowa udi ufuta bantu badi ditabuja dibasaka bua kumutendelela ne dinanga dionso ne tshisumi.​—Matayi 22:37.

Mmunyi mudi Yehowa ufuta batendeledi bende ba lulamatu? Mmulaye muoyo wa tshiendelele pa buloba bukudimuna Mparadizu mu matuku atshilualua, difutu edi didi dileja mudiye ne muoyo wa kupa ne dinanga. (Buakabuluibua 21:3, 4) Nansha mpindieu, bantu badi bakeba Yehowa ne muoyo mujima badi bapeta mabenesha a bungi. Badi ne mabenesha ne nsombelu muimpe ku diambuluisha dia nyuma wende muimpe ne meji adi mu Dîyi diende.​—Musambu 144:15; Matayi 5:3.

Bulelela, Yehowa n’Nzambi muimpe udi wanyisha mudimu wa lulamatu wa batendeledi bende. Kumanya bualu ebu kakuenaku kukusaka bua kusemena pabuibi nende anyi? Biobi nanku, kuenaku mua kulonga malu a bungi a mushindu uudi mua kuleja ditabuja dikala Yehowa mua kufuta anyi?