Eric: Tshindi mua kukuleja ntshia ne: tshitu ndifila bikole ku malu a Nzambi to. Nunku ndi ngela meji ne: katuakuyukila mutantshi mule to.

Brian: Ndi nganyisha bikole muudi mundeje bualu ebu. Nansha nanku dîna dianyi Brian. Kadi diebe nganyi?

Eric: Eric.

Brian: Ndi ne disanka dia bungi bua kutuilangana nebe, Eric.

Eric: Meme panyi ndi ne disanka.

Brian: Ndi musue kukuebejaku: udi mukolele mu dîku dia bantu badi batendelela anyi?

Eric: Eyo. Kadi pamvua mumbuke ku nzubu bua kuya kulonga, ngakalekela malu a kutendelela.

Brian: Bushuwa anyi! Mmalu kayi auvua mulonge mu tulasa tua iniversite?

Eric: Mvua mulonge malu a mu nsombelu ne malu a kale. Mvua munange malu a kale bikole a muvua muntu mufike ku dikalaku pa buloba.

Brian: Malu a kale adi mua kusankisha muntu bikole. Anu bu muudi mua kuikala mumanye, Bible mmukanda wa malu a kale. Utuku wenza mudimu ne Bible mu makebulula ebe anyi?

Eric: Tòo. Ndi mumanye ne: mmukanda muimpe, kadi tshitu muanji kuela meji ne: Bible mmukanda wa miyuki ya kale to.

Brian: Udi umueneka muntu muimpe. Wewe mumpeshe minite nansha mikese, ndi mua kukuleja bilejilu bikese bia miyuki ya kale mijalame idi mu Bible.

Eric: Mbimpe. Kadi tshiena ne Bible to.

Brian: Kakuena bualu to. Ndi mua kukulejela mu wanyi meme. Tshilejilu tshia kumpala tshidi mu 1 Kulondolola 29:26, 27. Badi baleja mu mvese eyi ne: ‘Davidi, muana wa Yishai, wakadi ukokesha mu Isalele. Matuku onso akakokeshaye mu Isalele akadi bidimu makumi anayi; wakakokesha mu Hebelone bidimu muanda mutekete; wakakokesha mu Yelushalema bidimu makumi asatu ne bisatu.’

Eric: Mmunyi mudi tshilejilu etshi mua kuikala muyuki mulelela?

Brian: Bimpe, mu tshimue tshikondo bamue bantu bavua bamba ne: Mukalenge Davidi katuku to.

Eric: Bulelela anyi? Bua tshinyi bantu bavua babenga ne: Davidi kavuaku?

Brian: Kuvua bijadiki bikese bidi kabiyi bia mu Bible bivua bileja ne: Davidi uvua muntu wetu mulelela eu. Kadi mu 1993, kasumbu ka bakebuludi ba bintu bia mu buloba kakapeta dibue dia kale dikale ne mêyi aa: “Nzubu wa Davidi.”

Eric: Bualu bua dikema.

Brian: Muntu mukuabu wa mu Bible uvua bantu babenga dikalaku diende nguvena Ponsio Pilato uvua mulombole mu matuku a Yezu. Udi munkatshi mua balombodi ba bungi ba tshikondo atshi badibu batele mu Luka 3:1.

Eric: Eyo. Bidi nanku. Udi wamba ne: “Pavua Ponsio Pilato nguvena wa Yudaya, pavua Helode mulombodi wa distrike dia Galela.”

 Brian: Bimpe. Munkatshi mua bidimu bia bungi, bamue bamanyi ba malu a mu Bible bavua bela mpata bua ne: Ponsio Pilato mmuntu mulelela. Kadi panyima pa bidimu bitue ku 50, bakangula dibue mu Proche-Orient dikale ne dîna dia Ponsio Pilato.

Eric: Hmm. Tshivua muanji kumvua malu a mushindu eu to.

Brian: Ndi ne disanka dia kuyukila nebe malu aa.

Eric: Bua kukuambila bulelela, ntu ngangata Bible bu mukanda wa tshianana, kadi tshitu muanji kumumona bu mukanda udi ne mushinga matuku etu aa to. Udi mua kuikala ne malu a kale malelela, kadi tshiena ngela meji ne: mmukanda udi ne mibelu ya mushinga to.

Brian: Bantu ba bungi badi mua kuitaba lungenyi elu. Kadi meme ndi ngela meji mushindu mukuabu. Mona bua tshinyi ndi ngamba nanku: majinga manene a bantu ki mmashintuluke katshia ku tshibangidilu. Tshilejilu, tutu anu dijinga ne biakudia, bilamba ne miaba ya kulala. Tutu ne dijinga dia kuyukila ne bakuabu ne kuikala ne dîku dia disanka. Kuena umonaku ne: tuetu bonso tutu tuangata malu aa ne mushinga anyi?

Eric: Bidi nanku.

Brian: Bible udi mua kutuambuluisha mu malu onso aa. Mmukanda wa kale kadi udi ne malu a matuku etu aa.

Eric: Udi usua kuamba tshinyi?

Brian: Imana nkumvuije mu mushindu mukuabu: Bible udi ne mêyi manene adi ne mushinga lelu anu muvuawu ne mushinga pavuabu baafunde kukadi bidimu bia bungi.

Eric: Mbimpe. Mu mushindu kayi?

Brian: Mêyi a mu Bible adi mua kutuludika mu malu bu mudi kuikala ne mmuenenu muimpe bua makuta anyi kuikala ne nsombelu wa disanka mu dîku peshi kuikala mulunda muimpe wa bakuabu. Bible udi bu njila udi ufikisha ku diakalenga. Kuenaku umona ne: bua kuikala mulume muimpe ne mfumu wa dîku muimpe mu matuku etu aa mbualu bukole anyi?

Eric: Eyo, udi muambe bulelela. Meme ne mukajanyi tukadi ne tshidimu tshijima mu dibaka, kadi ki mbipepele misangu yonso bua kumona malu mu mushindu umue to.

Brian: Mmuomu. Kadi Bible udi ne mêyi mimpe adi ambuluisha. Tuangate tshilejilu tshidi mu Efeso nshapita 5. Tubale mvese wa 22, 23, ne wa 28. Wewe musue udi mua kubala mvese eyi.

Eric: Mbimpe. Idi yamba ne: “Bakaji bakokele ba bayabu bu mudibu bakokela Mukalenge, bualu mulume udi ku mutu kua mukajende anu bu mudi Kristo ku mutu kua tshisumbu, bu mudiye musungidi wa mubidi eu.” Pashishe mvese wa 28 udi wamba ne: “Mu mushindu eu ke mudi balume ne bua kunanga bakaji babu bu mibidi yabu bobu bine. Muntu udi munange mukajende mmudinange yeye muine.”

Brian: Bimpe. Tuasakidila. Kuena umona ne: bena dibaka bobu batumikile mêyi aa, nsombelu wa mu dîku diabu udi ulongoloka anyi?

Eric: Eyo, bidi nanku. Kuamba nkupepele, kadi kuenza nkukole.

Brian: Bushuwa; kakutu muntu mupuangane to. Kadi tshiudi ne bua kumanya ntshia se: anu mu nshapita umue umue eu mudi mvese udi utulomba bua kuikala ne nkatshinkatshi. * Mu nsombelu yonso bidi bikengela kuikala ne nkatshinkatshi ne kumanya mua kuitaba mmuenenu wa mukuabu. Meme ne mukajanyi tudi bamone ne: Bible udi mua kutuambuluisha bua kuikala ne nkatshinkatshi eu.

Eric: Bidi biumvuika mpindieu.

Brian: Bantemu ba Yehowa badi ne site wabu wa ku Enternete udi ne amue malu mimpe adi atangila bena mabaka ne nsombelu wa mu dîku. Wewe mumpeshe minite mikese, ndi mua kukuleja amue malu adi mu site wetu eu.

Eric: Bimpe. Ndi nkupesha ndambu wa minite.

Brian: Bimpe. Adrese wetu wa ku Enternete udi ne: www.ps8318.com. Edi ke dibeji dia ntuadijilu.

Eric: Ndi musue foto idimu.

Brian: Eyi mfoto ya mushindu udi mudimu wetu wenzeka pa buloba bujima. Tuafiki muaba utuvua tukeba! Muaba eu udi tshiena-bualu tshidi tshiamba  ne: “Couples et Parents.” Muinshi mua tshiena-bualu etshi mudi tubiena-bualu tuipi tudi tuakula bua nsombelu mishilashilangane. Kudiku tshiena-bualu tshidi tshikusankisha anyi?

Eric: Eyo. “Mua kujikija bilumbu mu dibaka dienu” anyi “Comment régler les problèmes dans votre couple.” Ndi ngela meji ne: ndi panyi mua kuenza nanku.

Brian: Tshiena-bualu etshi tshidi ne malu anayi a mua kujikija bilumu. Tangila tshikoso etshi. Eric, udiku mua kutshibala anyi?

Eric: Bimpe. Tshidi tshiamba ne: “Bikala muyuki muenze bu mashi adi afila muoyo mu dibaka, nanku dinanga ne kanemu bidi pabi bu muoyo ne bisulusulu mu malanda a bena mu dibaka.” Hmm, ndi musanke bikole mushindu udibu bumvuije.

Brian: Tuasakidila bua dibala. Mbatelamu mvese wa mu Bible. Udi mua kumukangula wewe mututapu.

Eric: Eyo, ndi mumumone. Efeso 5:33. Udi wamba ne: “Yonso wa kunudi anange mukajende bu mudiye mudinange; mukaji pende udi ne bua kuikala ne kanemu kakole kudi bayende.”

Brian: Udiku mumone ne: mbimanyine bikole pa tshidi yonso mua kufila ne kutekemena bua kupeta kudi mukuabu anyi?

Eric: Tshiena mumvue tshiudi musue kuamba.

Brian: Ki mbulelela bua se: mulume mmusue bua mukajende amunemeke ne mukaji pende mmusue bua bayende amuleje mudiye mumunange bulelela anyi?

Eric: Eyo. Ndi ngitaba ne: bidi nanku.

Brian: Misangu ya bungi mulume yeye ukeba mishindu ya kuleja mudiye munange mukajende, ki mbipepele bua mukajende kumulejaye kanemu anyi?

Eric: Biumvuika bu ne: malu adi mua kuenda bimpe.

Brian: Nunku, mvese eu wa mu Bible udibu bafunde kukadi bidimu bitue ku 2 000, udi wakula bua majinga a mulume ne mukajende ne udi ne mibelu mimpe, bobu bayitumikile, malu abu adi enda bimpe. Dîba adi, “dinanga ne kanemu” bitudi bakuile ku ntuadijilu nebikole mu dibaka.

Eric: Ngitabi bushuwa ne: mu Bible mudi malu a bungi kupita mumvua ngela meji.

Brian: Eric, bidi bingenza disanka bua kukumvua wakula mushindu eu. Ndi musue bua kulua kukutangila kabidi bua kumanya mmuenenu uudi nende bua katshiena-bualu aka: “Mishindu inayi ya kujikija bilumbu” anyi “Quatre mesures pour régler les problèmes” kadi mu tshiena-bualu tshimue tshimue tshidi mu Site wetu wa Enternete. *

Eric: Eyo. Netutapemu dîsu ne mukajanyi.