1-3. Yesu notimo chenro mane mondo tij yalo wach maber otimre e okang’ malach, to mano kelo penjo mage?

 YESU ne oyalo e alwora mar Galili te kuom higni ariyo. (Som Mathayo 9:35-38.) Ne odhi e taonde kod gwenge mang’eny kopuonjo e sunagokegi kendo yalo wach maber mar Pinyruoth. Kuonde duto ma noyaloe, oganda maduong’ ne dhiga ire. Yesu nowacho ni “tij keyo duong’,” kendo ni jotich ne dwarore.

² Yesu notimo chenro mondo tij yalo wach maber otimre e okang’ malach. Notimo mano nade? Nooro jootene 12 “mondo giyal wach Pinyruodh Nyasaye.” (Luka 9:1, 2) Nyalo bedo ni jootego ne wuoro kaka ne gidhi timo tijno. Gima ber en ni ka Yesu pok nogonyogi mondo gidhi giyal, notiegogi mana kaka en be Jehova notiege.

³ Penjo ma nyalo biro e pachwa gin magi: En tiegruok mane ma Yesu noyudo kuom Jehova? En tiegruok mane ma Yesu nomiyo jootene? To be Ruoth ma Mesia tiego jolupne ma ndalowagi ne tij lendo? Ka en kamano, otiyo gi yore mage?

4. Jehova notiego Yesu karang’o, kendo kanye?

⁴ Yesu nowacho ayanga ni Wuon-gi e ma nopuonje kendo tiege. E kinde ma noyalo, nonyiso joma ne winje kama: “Awacho gigi mana kaka Wuora nosepuonja.” (Joh. 8:28) Jehova notiego Yesu karang’o, kendo kanye? Nenore ni ne ochako tiege mapiyo bang’ chueye e polo kaka Wuode makayo. (Kol. 1:15) Ne en gi Wuon-gi ka gi ka kowinje kendo koneno kaka Wuon-gi ma e ‘Japuonj Maduong’’ ne timo gik moko. (Isa. 30:20, NW) Wuoyi makayoni nopuonjore gik mang’eny kuom Wuon-gi. Gik ma nopuonjorego oriwo kit Wuon-gi, tijene, kod dwache.

5. Ang’o ma Jehova nopuonjo Wuode e wi tich ma bang’e Wuode ne dhi timo e piny?

⁵ Bang’ kinde, Jehova nopuonjo Wuode tich ma bang’e Wuodeno ne dhi timo e piny. Ne ane weche ma nokor ma  konyowa ng’eyo winjruok ma ni e kind Japuonj Maduong’ kod Wuode makayo. (Som Isaiah 50:4, 5.) Weche mokorgo wacho ni Jehova ne chiewoga Wuode ‘gokinyi pile pile.’ Picha ma biro e pachwa en mar japuonj ma chiewo japuonjrene gokinyi mang’ich mondo opuonje. Buk moro ma lero weche Muma wacho kama: “Chal mana ka gima Jehova . . . ne teroga [Yesu] e skul kaka nyathi skul, kendo nopuonje kaka nonego oyal kod weche ma nonego owachi.” Adier, e kinde ma Jehova ne puonjo Yesu e polo, nokonye ng’eyo ‘gima nonego owachi kod gima nonego opuonji.’ (Joh. 12:49) Bende, nonyise yore ma nonego otigo e puonjo. a Ka Yesu ne ni e piny ka, notiyo maber gi tiegruok ma noyudo. Nolendo gi kinda. Bende, notiego jolupne mondo gin be gitim tijno gi kinda.

6, 7. (a) En tiegruok mane ma Yesu nomiyo jootene, to tiegrugno nokonyogi nade? (b) Yesu osetemo matek mondo one ni jolupne ma ndalowagi oyudo tiegruok e weche mage?

⁶ En tiegruok mane ma Yesu nomiyo jootene? Ka luwore gi Mathayo sula mar 10, nonyisogi weche achiel kachiel ma nonego giluw, kaka: kama nonego giyalie (wes 5, 6), gima nonego giyal ne ji (wes 7), gimomiyo nonego gigen kuom Jehova (wes 9, 10), kaka nonego gichak mbaka gi ji (wes 11-13), gima nonego gitim ka ji ok orwakogi (wes 14, 15), kod gima nonego gitim ka ji sandogi (wes 16-23). b Tiegruok moriere kamano nomiyo jootego oyalo gi kinda ahinya.

⁷ To nade e kindewagi? Yesu ma e Ruodh Pinyruodh Nyasaye osemiyo jolupne migawo maduong’ ahinya, ma en yalo ‘wach maber mar Pinyruoth e piny mangima mondo ochiw neno ne ogendni duto.’ (Mat. 24:14) Be Ruodhwa osetiegowa ne tich maduong’no? Ee! Ka en e polo, osebedo kotiyo matek mondo one ni jolupne oyudo tiegruok e wi kaka ginyalo yalo wach maber, kod kaka ginyalo timo migepe ma dwarore e i kanyakla.

8, 9. (a) Gima duong’ momiyo nolos Skul mar Tij Nyasaye en ang’o? (b) Skundno osekonyi nade e tij lendo?

⁸ Kuom higni mang’eny, riwruok mar oganda Jehova osebedo ka tiego jo Jehova kokalo kuom chokruoge mag alwora, chokruoge madongo, kod chokruoge mag kanyakla kaka Chokruok mar Tijwa. Kata kamano, chakre higni mag 1940, owete ma tayo ofiswa maduong’ nochako timo chenro mag tiego jo Jehova kokalo kuom skunde mopogore opogore.

⁹ Skul mar Tij Nyasaye. Mana kaka ne waneno e sula mar 16, skundno nochakore e higa mar 1943. Be skundno nolos mana mondo otieg jopuonjre mondo gigol twege  mong’ith e kanyakla? Ooyo. Gima duong’ momiyo nolose en ni mondo otieg jo Nyasaye mondo ging’e tiyo gi mich mar wuoyo e pako Jehova e tij yalo wach maber. (Zab. 150:6) Skundno osekonyo owete gi nyimine mang’eny mondo gimed lony e tij yalo wach Pinyruoth.

10, 11. Chakre Oktoba 2011, gin jomage ma igwelo e Skul mar Gilead, to ang’o momiyo itiegogi?

¹⁰ Skul mar Gilead (Watchtower Bible School of Gilead). Skundno nochakore chieng’ Wuok Tich Februar 1, 1943. Ka nochake, notiego jopainia kod jomamoko ma ne tiyo ne Nyasaye kuom thuologi duto ma bang’e ne ioro kaka jomisonari kuonde mopogore opogore e piny ngima. Kata kamano, chakre Oktoba 2011, joma igwelo e skundno gin mana joma tiyo ne Nyasaye kuom thuologi duto e yo makende, kuom ranyisi, jopainia makende, jorit-alwora gi mondegi, Jo-Bethel, kod jomisonari ma pok nodhi e skundno.

¹¹ Ang’o momiyo itiego ji e Skul mar Gilead? Achiel kuom owete mosepuonjo e skundno kuom higni mang’eny wacho kama: “Tiegruogno tego yie mar jopuonjre kokalo kuom nono Wach Nyasaye e yo matut. Bende, okonyogi nyago kido ma nyalo miyo giked maber gi pek ma giromogo kuonde moorgie. E wi mago, omedogi siso mar lando injili.”—Efe. 4:11.

12, 13. Ere kaka Skul mar Gilead osekonyo e chwalo tijwa mar lendo e piny ngima? Chiw ane ranyisi.

¹² Ere kaka Skul mar Gilead osekonyo e chwalo tijwa mar lendo e piny ngima? Chakre higa mar 1943, skundno osetiego jolendo mokalo 8,500, c kendo jomisonari moa Gilead oselendo e pinje mokalo 170. Jomisonarigo tiyo gi tiegruok ma giyudo e yo maber, kendo giketo ne jolendo mamoko ranyisi maber kendo tiegogi. Kinde mang’eny, jomisonarigo ioroga kuonde ma jolendo nokie.

¹³ Ne ane gima notimre Japan. E kinde Lweny mar Ariyo mar Piny Ngima, tij yalo mitimo achana ne dhi ka ng’adore chuth. Chop Agost 1949, kwan mar jolendo ma Jo-Japan ne ok chop apar. E giko higano, ne oornegi jomisonari 13 ma noa Gilead kendo ne gimako tij lendo gi lwetgi ariyo. Mosmos ne omed jomisonari e pinyno. Jomisonarigo nokwongo ogoyo tach e taonde madongo, kata kamano, bang’ kinde ne gichako lendo nyaka e taonde matindo tindo kod gwenge. Ne gijiwo joma ne gipuonjo Muma kod jomamoko mondo oriwre kodgi e tij lendo. Kindagino nokelo nyak miwuoro. Sani nitie joyal wach Pinyruoth mokalo 216,000 e piny Japan, kendo chiegni pasent 40 kuomgi gin jopainia! d

14. Skunde mitiegoe jo Nyasaye nyiso wach mane ma onge kiawa kata matin? (Ne bende sanduk ma wiye wacho ni, “ Skunde Mitiegoe Joyal Wach Pinyruoth.”)

¹⁴ Skunde mamoko. Skul mar Jopainia, Skund Muma ne  Jokristo Mokendore, kod Skund Muma ne Owete Maok Nie Kend osekonyo jolendo modhuro e bedo Jokristo mochwiny kendo medo kinda e tij yalo injili. e Skundegi duto nyiso ma onge kiawa kata matin ni Ruodhwa tiegowa mondo watim tich momiyowa e yo maber chuth.—2 Tim. 4:5.

15. Owete ma tayo jo Nyasaye temo matek mondo giluw ranyisi mar Yesu e yo mane?

¹⁵ Mana kaka ne waseneno, janabi Isaya nolero kaka Jehova notiego Yesu e polo. Tiegruogno nopuonjo Yesu kaka nonyalo ‘hoyo joma ojony.’ (Isa. 50:4) Yesu notiyo gi puonjno. Ka ne en e piny ka, noduogo chuny joma ne ‘ojony kendo ma ting’ ne turo,’ kendo nomiyogi yueyo. (Mat. 11:28-30) Owete ma tayo jo Nyasaye bende temo matek mondo giluw ranyisi mar Yesu kuom hoyo chuny owete gi nyimine. Mondo okony owete ma tayogo timo migepegi e yo maber, oselos skunde mang’eny mitiegogie.

16, 17. Skul mar Tij Pinyruoth konyo e yo mane? (Ne bende weche momedore.)

¹⁶ Skul mar Tij Pinyruoth. Klas mokwongo mar skundni  ne ochakore Mach 9, 1959 e South Lansing, New York kendo ne okawo dwe achiel. Ne ogwel jorit-alwora kod jotije kanyakla e skundno, kendo ne otime gi dho Kisungu. Bang’e, ne olok weche mitiyogo e skundno e dhok mamoko, kendo mosmos ne ochak time e piny ngima. f

¹⁷ Yearbook of Jehovah’s Witnesses ma ne ogo e higa mar 1962 nowuoyo kuom kaka Skul mar Tij Pinyruoth konyo, kowacho kama: “E piny ma dich ng’enyieni, jarit mar kanyakla mar Joneno mag Jehova nyaka bed dichwo mochanore maber e ka onyal konyo ji duto e kanyakla kendo jiwogi. Seche motimo kamano, dwarore bende ni kik ojwang’ joode mana nikech odich e tije mag kanyakla. Nyaka obed gi paro maliw. Otimore maber ndi ni koro jotij-kanyakla duto e piny ngima nigi thuolo mar dhi e Skul mar Tij Pinyruoth mondo giyud tiegruok ma konyogi rito migepegi e yo maber mana kaka Muma chiko!”—1 Tim. 3:1-7; Tito 1:5-9.

18. Ere kaka jotich Nyasaye duto yudo ber nikech tiegruok ma owete ma tayo yudoga e Skul mar Tij Pinyruoth?

 ¹⁸ Jotich Nyasaye duto yudo ber mathoth nikech tiegruok ma owete ma tayo yudoga e Skul mar Tij Pinyruoth. E yo mane? Sama jodongo gi jokony-tich tiyo gi gik ma gipuonjore e skundno, gibedo joma ong’eyo duogo chuny Jokristo wetegi, hoyogi, kendo jiwogi, mana kaka Yesu notimo. Donge ibedoga mamor sama jaduong’ kata jakony-tich ohoyi gi weche mang’won, ochikoni ite, kata olimi? (1 The. 5:11) Kuom adier, kanyakla dhiga maber sama nitie owete motieg maber!

19. Gin skunde mage mamoko ma Komiti mar Puonjo losoga, to skundego konyo owete nade?

¹⁹ Skunde mamoko. Komiti mar Puonjo ma ni e bwo Bura Matayo losoga skunde mamoko ma tiego owete ma nigi migepe mopogore opogore e i oganda Jehova. Moko kuom skundego olos mondo otieg jodong-kanyakla, jorit-alwora, kod owete ma ni e Komiti mar Bad Ofis, mondo gitim migepegi e yo mong’ith. Tiegruok ma owetego yudo konyogi mondo girit winjruokgi gi Jehova kendo giti gi puonj mag Muma e siro rombe ma Jehova oketo e lwetgi.—1 Pet. 5:1-3.

20. Ang’o momiyo Yesu ne owacho ni ‘Jehova puonjowa waduto,’ to ang’o ming’ado e chunyi?

²⁰ Onge kiawa ni Ruoth ma Mesia osebedo ka tiyo matek mondo one ni otieg jolupne. Tiegruogegi a malo nyaka piny, tiende ni Jehova tiego Wuode, kae to Wuode tiego jolupne. Mano e momiyo Yesu ne owacho ni ‘Jehova puonjowa waduto.’ (Joh. 6:45; Isa. 54:13, NW) Omiyo, wang’aduru e chunywa ni wabiro dhi nyime rwako tiegruok duto ma Ruodhwa miyowa, kendo wapar kinde duto ni gimomiyo itiegowa en mondo wabed Jokristo motegno ma nigi winjruok maber gi Jehova kendo molony e tij yalo wach maber.