1, 2. Ang’o momiyo dwarore ni wabed gi yie sani? Chiw ane ranyisi.

 YIE en kido maber nyowuoyo. Kata kamano, sama wawuoyo kuom yie, dwarore ni wapar wach machielo ma en: “Kawo okang’ mapiyo!” Kapo ni waonge yie, dwarore ni wakaw okang’ mapiyo mondo wabed kode. To kapo ni wan gi yie, dwarore ni wakaw okang’ mapiyo mar rite kendo pidhe. Nikech ang’o?

² Par ane ni iwuotho e piny motwo kendo riyo omaki to ionge pi kata matin. Kiyudo pi, ibiro rite maber kendo tiyo kode maber. Kendo nyaka iyud kaka ibiro medo pigino kik rum nyaka ichop kama idhiye. E kindegi, thoth ji ok lam Jehova kendo yie madier tin ahinya. Omiyo e yor ranyisi, wadak e piny motwo. Mana kaka tek yudo pi e piny motwo, e kaka ok yot yudo yie e piny ma ji ok oluoroe Nyasaye, kendo yie ma wan-go nyalo lal mapiyo ka ok warite kendo tege. Mana kaka ok wanyal dak maonge pi, mano bende e kaka ok wanyal bedo gi winjruok maber gi Nyasaye ka waonge yie.—Rumi 1:17.

3. Ang’o ma Jehova osemiyowa mondo okonywa gero yie marwa, to gin gik mage ariyo madwarore ni watim?

³ Jehova ong’eyo gimomiyo dwarore ahinya ni wabed gi yie, kendo ong’eyo kaka gero kendo rito yie ma kamano e piny masani ok yot. Mano emomiyo omiyowa ranyisi ma wanyalo luwo. Jehova ne otelo ne jaote Paulo mondo ondik niya: “Ubed jo ma kawo kit jogo ma yudo gik ma Nyasaye nosingo.” (Hib. 6:12) Kendo mano emomiyo riwruok mar Jehova osejiwowa mondo watim kinda e luwo ranyisi mabeyo mag chwo gi mon ma wasewuoyo kuomgi e bugni. Kata kamano, en ang’o monego watim? We wapar gik moko ariyo: (1) Dwarore ni wadhi nyime tego yiewa; (2) dwarore ni waket genowa mar kinde mabiro osik ka liw e pachwa.

4. Satan osebedo jasigu mar yie e yore mage, to ang’o momiyo mano ok onego onyos chunywa?

⁴ Dhi nyime tego yie mari. Satan en jasigu maduong’ mar yie. Nikech Satan ema otelo ne pinyni, osemiyo piny obedo kama onge yie kendo osemiyo ji osin gi kidono. Satan nigi teko moloyowa. Be mano onego omi waluor tego kendo jiwo yie marwa? Ooyo ng’ang’! Jehova en osiep jogo duto madwaro bedo gi yie madier. Onyisowa ni ka wan kode e bathwa, wanyalo kwedo Jachien kendo oring oa kuomwa! (Jak. 4:7) Wakwedo  Satan kuom kawo kinde pile pile mar gero kendo tego yiewa. E yo mane?

5. Ang’o ma ne okonyo chwo gi mon ma ne ochung’ motegno mondo obed gi yie? Ler ane.

⁵ Mana kaka waseneno, chwo gi mon ma nonyiso yie miwuoyo kuomgi e Muma ne ok onyuol ka gin gi yie. Ngimagi nyiso ni yie en nyak mar roho maler mar Nyasaye. (Gal. 5:22, 23) Ne gikwayo Nyasaye e lamo mondo okonygi, kendo Nyasaye ne otego yie margi. Onego wan be watim kamano ka wiwa ok wil ni Jehova chiwo roho mare ne joma kwaye kendo matimo kaluwore gi lamo margi. (Luka 11:13) Be nitie gima machielo monego watim?

6. Ang’o manyalo konyowa yudo ber chuth kuom gik mwapuonjore e wi joma iwuoyo kuomgi e Muma?

⁶ E bugni wasewuoyo mana kuom joma nok ma ne onyiso yie. Pod nitie ranyisi mang’eny mag jomamoko. (Som Jo Hibrania 11:32.) Moro ka moro kuom ranyisigo miyowa weche mathoth ma wanyalo puonjore. Kapo ni wasomo weche jogi ka warikni ok wabi gero yie motegno. Mondo wayud ber chuth kuom weche mwasomo, onego wakaw kinde ka wanono matut kaka gigo ne otimore koda chal ma ne nitie. Ranyisigo biro mulowa moloyo ka waketo e paro ni chwo koda mon-go ne gin ‘dhano machalo kodwa gi kitgi.’ (Jak. 5:17) Wanyalo ng’eyo chuth kaka ne giwinjo sama ne ginyagore gi pek machal gi magwa.

7-9. (a) Nyalo bedo ni moko kuom chwo gi mon miwuoyo kuomgi e Muma nyalo winjo nade kapo ni ne giyudo thuolo mar lamo Jehova kaka watimo e kindegi? (b) Ang’o momiyo onego wateg yiewa kuom tim?

⁷ Watego yiewa bende kokalo kuom gik mwatimo. Nimar “yie bende ka onge tim otho.” (Jak. 2:26) Parie kaka chwo gi mon mwasewuoyo kuomgi ne nyalo bedo mamor kapo ni ne omigi migepe ma Jehova miyowa e kindegi!

⁸ Kuom ranyisi, iparo ni Abraham nyalo winjo nade ka dine onyise ni olam Jehova, ok e altar molos gi kite e i thim, to e kind jotich Nyasaye wetene e Ute Romo mabeyo koda e chokruoge madongo mag distrikt kama singo mag Nyasaye ma noneno “gi ku mabor” iwuoyoe kendo ilero e yo matut? (Som Jo Hibrania 11:13.) To nade ka dine onyis Elija ni tije en mana limo ji e utegi ka oteronegi wach makelo hoch koda geno, to ok nego jonabi maricho mag Baal kotemo tiyo ne Jehova e bwo loch mar ruoth marach ma ne oseng’anjo? Donge jogo ne nyalo mor ndi kuom yudo thuolo mar lamo Jehova kaka watimo e kindegi?

⁹ Omiyo, we mondo wadhi nyime tego yiewa kuom tim. Ka watimo kamano, wabiro nyiso ni waluwo ranyisi mag chwo gi mon  ma ne onyiso yie miwuoyo kuomgi e Wach Nyasaye. Mana kaka onyis e weche michakogo, wabiro nenogi kaka osiepewa machiegni. Kendo osiep ma kamago nyalo konyowa ahinya.

10. Wabiro yudo gweth mage e Paradis?

¹⁰ We geno ma in-go kuom kinde mabiro osik ka liw e pachi. Geno ma kamano ma Nyasaye miyowa kinde duto osetego chwo gi mon moluoro Nyasaye. Be in be iyudo teko kowuok kuom genono? Kuom ranyisi, par ane kaka ibiro bedo mamor bedo kanyachiel gi jotich Nyasaye mibiro chier e “chier mar jo makare.” (Som Tich Joote 24:15.) Gin penjo kaka mage ma diher penjogi?

11, 12. E piny manyien, gin penjo mage minyalo penjo (a) Abel? (b) Noa? (c) Abraham? (d) Ruth? (e) Abigail? (f) Esther?

¹¹ Chieng’ miromo gi Abel, be dibed ni ibiro penje kaka jonyuolne ne chalo? Kata dibed ni ibiro penje ni: “Be ne iwuoyoe gi jo kerubi ma ne rito yo madonjo e puodho mar Eden? Be ne gidwoki?” To nade Noa? Dibed ni ibiro penje ni: “Be ne iluoro jomarabede ka? Nitimo nade mondo irit le duto ma ne nie yie kuom higa achiel?” To kiromo gi Abraham, samoro inyalo penje ni: “Be ne iromoe gi Shem? Ng’ano ma ne opuonji e wi Jehova? Be wuok Ur ne en gima yot?”

¹² Bende, ne ane moko kuom penjo ma diher penjo mon ma ne oluoro Nyasaye ma ibiro chier: “Ruth, ang’o ma ne omiyo ibedo jatich Jehova?” “Abigail, be ne iluor nyiso Nabal ni ne ikonyo Daudi?” “Esther, ngimau ne odhi nade in kaachiel gi Mordekai bang’ weche minyisowa e Muma?”

13. (a) Jogo mibiro chier nyalo bedo ni biro penji penjo kaka mage? (b) Iwinjo nade kuom geno mar romo gi chwo kod mon ma ne otiyo ne Jehova chon?

¹³ Onge kiawa ni kata jotich Nyasaye machon-go be biro penji penjo mang’eny turi. Donge wabiro mor nyisogi kaka weche ne opogore ahinya e kinde mag giko koda kaka Jehova ne ogwedho joge e kinde matekgo? Onge kiawa ni gin bende gibiro mor ahinya ng’eyo kaka Jehova ne ochopo singoge duto. E kinde mabirogo, ng’eyo jogo maber biro bedonwa gima yot. Wabiro dak kaachiel kodgi e Paradis! Omiyo, tim duto minyalo sani mondo ing’e jogo maber. Dhi nyime luwo yie margi. Mad idhi nyime tiyo ne Jehova kaachiel kodgi kaka osiepeni, nyaka chieng’!