BE NITIE GIMA INYALO TIMO MONDO ICHIK KAKA NGIMANI BIRO CHALO KINDE MA BIRO? Jomoko paro ni gik ma timore e ngimagi nosechan chon ma ok ginyal loko. Ka gik moko ok otimorenegi kaka ne gichano, gineno ni onge kaka ne ginyalo geng’o. Giwacho niya: “Ne osechan chon ni gigo ne ok dhi timore kaka ne aparo!”

Jomoko chunygi nyosore ka giparo ni onge gimoro amora ma ginyalo timo mondo gik maricho ma timore e piny sani kik yudgi. Samoro gisetemo mondo gidag e ngima maber to bang’e lweny, timbe mahundu, masiche ma timore apoya, kod tuoche ketho gik moko duto ma ne gisechano. Ginyalo penjore niya: ‘Ang’o ma dimi achandra gi pinyni?’

En adier ni gik ma timore e ngima seche moko nyalo ketho gik ma isechano timo. (Eklesiastes 9:11) Kata kamano, pod inyalo yiero kaka ngimani biro chalo kinde ma biro. Muma wacho ni mano yiero ma in iwuon e ma itimo. Ne ane kaka owacho.

Ka ne Musa tero oganda mar Israel e Piny ma Nosingi, ne onyisogi kama: “Aseketo e nyimi ngima gi tho, gweth kod kwet: e momiyo mondo iyier ngima, ibedi mangima, in kod kothi mar hero Jehova Nyasachi, mar winjo dwonde, kendo mar padore kuome.”​—Rapar mar Chik 30:15, 19, 20.

“Aseketo e nyimi ngima gi tho, gweth kod kwet: e momiyo mondo iyier ngima.”​—Rapar mar Chik 30:19

Ee, ka ne Nyasaye ogolo Jo-Israel e piny Misri kama ne isandogie, nosingonegi ni ne gidhi bedo thuolo kendo dak maber e Piny ma Nosingi. Kata kamano, ne ok gidhi yudo ngima maberno nyalhodia. Mondo ne giyud guethgo, ne nyaka ‘giyier ngima.’ E yo mane? ‘Kuom hero Nyasaye, winjo dwonde, kendo padore kuome.’

E kindegi bende, nyaka itim yiero ma kamano, to yiero ma itimo e ma biro nyiso kaka ngimani biro chalo kinde ma biro. Ka iyiero hero Nyasaye, winjo dwonde, kendo padori kuome, mano nyiso ni iyiero ngima ma en ngima ma nyaka chieng’ e paradiso e piny. To timo gigo oriwo timo ang’o?

Hera e kido maduong’ie moloyo ma Nyasaye nigo. Roho maler ne otayo jaote Johana ma ondiko niya: “Nyasaye en hera.” (1 Johana 4:8) Mano e momiyo ka ne ng’ato openjo Yesu ni chik maduong’ie mogik en mane, nodwoko niya: “Nyaka iher Jehova Nyasachi gi chunyi duto, kendo gi ngimani duto, kendo gi pachi duto.” (Mathayo 22:37) Ng’ato onego omak osiep gi Jehova Nyasaye nikech ohere, to ok nikech luoro moro kata odwaro luwo aluwa chikene ma ok opar. Kata kamano, ang’o momiyo onego wayier hero Nyasaye?

Hera ma Jehova oherogo dhano inyalo pim gi hera ma jonyuol oherogo nyithindgi. Kata obedo ni jonyuol gin joma orem, pod gipuonjo nyithindgi, gijiwogi, gikonyogi, kendo girieyogi nikech gidwaro ni nyithindgi obed ma mor kendo ngimagi obed maber. To jonyuol gombo yudo ang’o kuom nyithindgi? Gidwaro ni nyithindgi ohergi kendo giluw gik ma gipuonjgi mondo okonygi. Donge en gima owinjore ka Wuonwa ma ni e polo bende dwaro ni wanyis ni wamor gi gik moko duto ma osetimonwa?

E dhok ma nokwong ndikgo Muma, wach molok ni “winjo” oriwo “timo gima onyisi ni itim.” Donge mano e gima watemoga wacho sama wanyiso nyathi ni, “Winj jonyuolni”? Omiyo, winjo dwond Nyasaye tiende en ni wapuonjre chikene kendo watim kaka onyisowa. To nikech ok wanyal winjo dwond Nyasaye aching’, wawinjo dwonde kuom somo Muma kendo tiyo gi puonj ma wayudo.​—1 Johana 5:3.

Yesu nowacho gimomiyo dwarore ni wawinj dwond Nyasaye ka ne owacho kama: “Dhano ok bed mangima mana kuom chiemo kende, to kuom weche duto ma wuok e dho Jehova.” (Mathayo 4:4) Chiemo en gima duong’ ahinya e ngima dhano, kata kamano, puonjruok e wi Nyasaye to koro duong’ie moloyo. Nikech ang’o? Ruoth Solomon ne owacho niya: “Rieko en rageng’ kaka tipo, mana kaka fedha; to ber mar ng’eyo kit gik moko e ma, ni rieko en rageng’ kaka tipo orito ngima mar ng’a man kode.” (Eklesiastes 7:12) Rieko ma wayudo kuom Nyasaye nyalo ritowa kendo nyalo konyowa mondo watim yiero mabeyo ma biro miyo wayud ngima ma nyaka chieng’.

Par ane weche ma Yesu nowacho ma ne waneno e sula mokalo. Nowacho niya: “Rangach matin kendo ndara madiny tero ji e ngima, to ji manok e ma nwang’e.” (Mathayo 7:13, 14) Ka wayiero wuotho e ndara madinyno, wanyiso ni wayie mondo Nyasaye otelnwa e ndara ma terowa e ngima mochwere. Omiyo, dwarore ni waket Nyasaye e nyimwa kinde duto. (Zaburi 16:8) To ere kaka wanyalo timo mano?

Pile ka pile nitie gik mang’eny ma nyaka watim kod moko ma wagombo agomba timo. Gik ma kamago nyalo miyo wabed modich ma chop kama ok wayud thuolo mar nono gik ma Nyasaye dwaro ni watim. Mano e momiyo Muma paronwa kama: “Beduru motang’ ahinya mondo kik uwuoth ka joma onge rieko, to uwuoth ka joma riek, ka utiyo maber gi kinde ma un-go, nikech ndalogi gin ndalo maricho.” (Jo-Efeso 5:15, 16) Omiyo, ka wadwaro ni waket Nyasaye e nyimwa kinde duto, nyaka watim duto mwanyalo mondo dwache e ma waket mokwongo e ngimawa.​—Mathayo 6:33.

Kata obedo ni onge gima inyalo timo mondo ilok gik ma ne osetimoreni kinde mokalo, nitie gima inyalo timo mondo ngimani ma kinde ma biro kaachiel gi mar joodi obed maber. Muma nyisowa ni Jehova Nyasaye ma en Wuonwa ma ni e polo oherowa ahinya kendo omiyowa thuolo mar ng’eyo gik ma doher ni watim. Ne ane weche ma onyisowa kokalo kuom janabi Mika:

‘Yaye dhano, osenyisi gi maber; kendo en ang’o ma Jehova dwaro kuomi, to mana ni mondo itim makare, iher miwafu, kendo iwuoth gi chuny mamuol kod Nyasachi?’​—Mika 6:8.

Be ibiro yie wuotho gi Jehova mondo iyud gueth ma joma wuotho kode yudo? Yiero en mari!