Inyalo Yiero mar Bedo gi Ngima Maber Kinde Mabiro e yo Mane?

INYALO timo nade mondo ibed gi ngima maber gadier? Yo achiel en kuom tiyo gi nyalo makende ma in-go mar nono kaka yiero mitimo sani nyalo mulo ngimani mabiro.

Kuom adier, nyalo bedoni matek timo yiero manyalo keloni ber masiko. Nikech ang’o? Nikech olworwa gi ji mang’eny madwaro mana mor masano sano. Kuom ranyisi, inyalo ng’eyo ni tiyo gi puonj mag Muma nyalo konyi gero winjruok motegno e kindu kaka joot. (Jo Efeso 5:⁠22–​6:4) Kata kamano, mondo iger winjruok ma kamano e kind joot, nyaka imany kinde mar bedo gi joodi maok iweyo mondo tich, yore mag manyo mor koda yueyo omayi thuolo mar bedo gi joodi. Mana kaka jadwarore e yore mang’eny mag ngima, nyaka iyier e kind yudo mor machuok masano sano kata yudo ber masiko. Ang’o minyalo timo mondo ibed gi teko mar timo yiero manyiso rieko? Kaw okenge ang’wen maluwogi.

1 Tem Neno e Pachi Nyak Manyalo Bedoe Nikech Yiero Mitimo

Sama yiero moro ochomi, tem neno e pachi nyak mar yiero mitimo maok iwuondo chunyi. Muma wacho niya: ‘Ng’a moterore mos oneno gimoro marach mi opondo.’ (Ngeche 22:3) Ka inono gi wang’ maler nyak marach ma yiero mitimo biro kelo, thothne ibiro dwaro weyori gi yo manyalo keloni hinyruok. To komachielo, ka ineno e pachi nyak maber masiko mabiro bedoe kitimo yiero manyiso rieko, mano nyalo tego chunyi mondo itim yiero mariek.

Penjri niya: ‘Nyak mag yiero ma atimo biro bedo mage bang’ higa achiel, higini 10, kata mana higini 20? Yierono biro mulo nade chunya koda ngima mar denda? Yiero ma atimo biro mulo nade jooda koda jomamoko ma ahero? ’ To maduong’ie moloyo, penjri niya: ‘Be yiero ma atimo biro moro Nyasaye? Obiro mulo nade osiep manie kinda kode? ’ Nikech Muma okudh gi much Nyasaye, onyalo konyowa ng’eyo gik mamore kendo siemowa kuom obadho manyalo bedo ni ok wane.​​—⁠Ngeche 14:12; 2 Timotheo 3:​16.

2 Non Iwuon Nyak mag Yiero Mitimo

Kar timo yiero gin giwegi, ji mang’eny kopo mana jomoko. Kata kamano, yo moro ok bi kelo nyak maber mana nikech ji mang’eny luwe. Non iwuon nyak mag yiero mitimo. Kaw ane ranyisi mar Natalie. * Owacho niya: “Ne adwaro ni adonj e kend madhi maber. Kata kamano, kaluwore gi kaka ngimana ne chalo, ne aneno ni mano ne ok dhi timore. Osiepena duto e kolej ne gin rowere mariek ahinya. Kata kamano, ne gisiko ka gitimo yiero maricho e ngimagi. Nyiri ne siko wilo osiepegi ma yawuowi to yawuowi bende ne timo kamano. Mana kaka gin, an bende ne an gi osiepe mogwaro ma yawuowi. Ngima ma kamano ne okelona lit mang’eny e chunya.”

Natalie ne ochako puonjore Muma gi Joneno mag Jehova. Owacho niya: “E oganda Joneno ne aneno rowere mamor koda joma kendgi  dhi maber. Kata obedo ni ne ok yotna, mosmos ne atimo lokruok e kit ngimana.” Ne oyudo nyak mage? Natalie wacho niya: “Kinde duto ne asegabet ka agombo ni okenda gi jal ma kite ber. Bang’ kinde, ne okenda gi jal maluwo chike Nyasaye kaka an. Aneno ni Nyasaye omiya ngima maber mar joot moloyo kata kaka ne agombo.”

3 Non Kaka Yiero Mitimo Sani Biro Mulo Ngimani mar Kinde Mabiro

Mondo kik ipar mana kaka yiero mitimo mulo ngimani gie sani, dwarore bende ni ine maler ngima midwaro e kinde mabiro koda gima ibiro timo mondo ibed gi ngima ma kamano. (Ngeche 21:5) Kik ine ngimani mana kaka mar higini 70 kata 80. Kar mano, tem neno e pachi kaka ibiro dak nyaka chieng’ mana kaka oler e Muma.

Muma lero ni kokalo kuom rawar mar misango mar Kristo Yesu, Nyasaye oseyawonwa yo mar yudo ngima mochwere. (Mathayo 20:28; Jo Rumi 6:​23) Nyasaye osingo ni machiegni, dwaro ma ne en-go mokwongo ne dhano koda ne piny biro chopo. Jogo mohero Nyasaye biro yudo mor mar dak nyaka chieng’ e piny majaber. (Zaburi 37:11; Fweny 21:​3-5) Inyalo yudo ngima ma kamano kinono kaka yiero mitimo mulo ngimani mar kinde mabiro.

4 Tim Kinda Mondo Iyud Ngima Mochwere

Inyalo timo ang’o mondo iyud ngima mochwere? Chak kuom puonjori Wach Nyasaye. (Johana 17:3) Ng’eyo puonj makare mag Muma biro miyo imed bedo gadier ni singo mag Nyasaye mag kinde mabiro biro timore gadier. Yie ma kamano nyalo tegi mondo itim lokruok madwarore mondo imor Nyasaye.

Kaw ane ranyisi mar Michael. Owacho niya: “Ne achako mer kendo tiyo gi yedhe mamero kane an jahigini 12. Ne an e grup moro mar jonjore kendo ne aneno ni abiro tho kapok achopo higini 30. Mirima koda chuny mool ne omiyo atemo ding’eny tieko ngimana. Ne agombo ng’eyo gimomiyo Nyasaye ne ochweyo dhano, to ne otama.” Kane Michael nie sekondari, ja njore wadgi ne ochako puonjore Muma gi Joneno mag Jehova. Michael bende ne oyie puonjore Muma.

Gik ma Michael ne puonjore e Muma ne omiyo obedo gi paro mopogore kuom ngimane mar kinde mabiro. Michael wacho niya: “Ne apuonjora ni e kinde mabiro piny ibiro los mabed paradis, kendo dhano biro dak gi kuwe maonge parruok. Ne achako neno ni an be anyalo bedo gi ngima ma kamano kinde mabiro. Gero winjruokna gi Nyasaye obed maber ema ne obedo gima duong’ e ngimana. Kata kamano, seche moko ne adok chien. Kata bang’ chako puonjora Muma, kinde moko ne amer. Kendo kinde moro ne adonjo e timbe mag terruok.”

Ang’o ma ne okonyo Michael loyo tembe ma ne dwoke chien mi oloko ngimane? Owacho kama: “Japuonjna mar Muma nojiwa mondo asom Muma pile kendo abed gi osiepe madwaro moro Nyasaye. Ne afwenyo ni jonjore wetena ne ketho timbena. Kata obedo ni gin ema ne gisebedona kaka joodwa, ne aweyo tudora kodgi.”

Michael noketo chenro ma ne odwaro chopo mapiyo, kendo noyango gik monego oket motelo mondo ochop gombone maduong’ mar dak kaluwore gi chike Nyasaye. In bende inyalo timo kamano. Ndik gik ma idwaro chopo kinde mabiro kae to iket okenge matindo tindo mabiro konyi chopogi. Nyis jogo mabiro riwi lwedo gik midwaro chopo e ngimani, kendo yie mondo gikonyi e neno dongruok mitimo.

Kik idigni puonjori e wi Nyasaye kendo tiyo gi puonjgo e ngimani. Kaw okang’ sani mondo iger herani ne Nyasaye koda ne Wachne, ma en Muma. Kowuoyo kuom ng’at matiyo gi puonj mag Muma, Wach Nyasaye lero kama: “Gi motimo duto nobed gi hawi.”​​—⁠Zaburi 1:​1-3.

[Weche moler piny]