En mich manade minyalo morgo gadier? Onge kiawa ni thothwa bedo mamor ka ng’ato omiyowa mich nikech ohero to ok nikech ochune. Sama ng’ato chiwo gimoro, chuny ma ochiwego en gimaduong’. Ng’at mimiyo michno, kawo wachno mapek. To moloyo duto, Nyasaye bende kawo wachno mapek. Ne ane weche ma ne jaote Paulo ondiko kotelne gi roho mar Nyasaye e bug 2 Jo Korintho 9:7.

Ang’o momiyo Paulo ne ondiko wechego? Ne odwaro jiwo Jokristo ma Jo-Korintho mondo okony Jokristo wetegi ma ne ni Judea. Be ne otemo chuno Jo-Korintho timo mano? Ooyo, kar mano ne owachonegi niya: “Ng’ato ka ng’ato mondo ochiw kaka oseparo e chunye; ok mar ng’ura, kata mar achuna: nikech Nyasaye ohero jachiwo mamor.” We wane ane wechego matut.

“Kaka oseparo e chunye.” Paulo ne owacho ni Jakristo madier chiwo nikech ong’ado mar timo kamano koa “e chunye.” E wi mano, Jakristo paro matut kuom dwaro ma Jokristo wetene nyalo bedogo. Jasomo moro lero ni wach ma ne olok ni “kaka oseparo” tiende en “paro motelo.” Omiyo, Jakristo paro motelo gima Jakristo wadgi ochando, kae to ong’ado gima onyalo timo mondo okonye.—1 Johana 3:17.

“Ok mar ng’ura kata mar achuna.” Paulo wuoyo e kit chuny ariyo ma Jakristo ok onego obedgo sama ochiwo gimoro—ok onego ochiw gi chuny mapek kata nikech achune. Wach ma ne olok koa e dho-Grik ni “mar ng’ura” tiende en “chiwo ka ng’ato ok mor kata ka ong’ur.” Buk moro lero ni “ni ng’at machiwo ka ng’ur en ng’at mawinjo malit sama ogolo pesane.” Ng’at machiwo nikech achuna chiwo nikech owinjo ni okete kama diny. Be nitie ng’ato kuomwa mamor yudo mich kowuok kuom ng’at ma ng’ur kata machiwo nikech ochune?

“Nyasaye ohero jachiwo mamor.” Paulo wacho ni ka Jakristo ong’ado mar chiwo gimoro, onego otim kamano gi chuny mamor. Kuom adier, ka ng’ato ochiwo gimoro gi chuny maler, obedo mamor. (Tich Joote 20:35) Ka ng’ato chiwo gi chuny mamor, morne nenore ayanga ne jomoko. Ng’at machiwo gi chuny “mamor” winjo ka omor e chunye kendo morneno nenore gi oko. Yudo mich ma ochiw gi chuny ma kamano mulo chunywa. Bende, ng’at ma ochiwo gi chuny ma kamano, moro Nyasaye. Muma wacho ni: “Nyasaye ohero jachiwo mamor.”

Weche ma ne jaote Paulo ondiko kotelne gi roho mar Nyasaye, oting’o puonj matayo Jokristo e wach chiwo. Bed ni watiyo gi thuolowa, kata tekowa e konyo jomoko, kata wachiwo mwanduwa, watim kamano nikech wahero, kendo nikech wamor chiwo gigewa ne jomoko, to moloyo, jogo mochando. E wi kelonwa mor, chiwo ma kamano biro miyo Nyasaye omor kodwa nikech, “ohero jachiwo mamor.”