¿JARGUA mba̱ra̱ji kʼo ntee kjo mi nge kʼe Mesías? E Mizhokjimi o tsjaa ke kʼo profeta ñe kʼo anxe ro manji kjo mi nge kʼe Mesías. Mu̷ a gu kjogu̷ cuatrociento kje̷e̷ kʼu̷ bi opju̷ji kʼo Escrituras Hebreas, e Mizhokjimi o mbejñe kʼe anxe Gabriel ro maa ngijñi na xuntrʼi nu mi menzumu̷ a Nazaret. Kʼe anxe o xipji: María, ri musʼu̷ge na tsʼitrʼi. E María o mama: ¿Jarga kjakʼo ma dya be ri juntago ko da bʼe̷zo? Kʼe anxe o xipji: Espíritu santo ra tsjakʼu̷ ri nrrunte. Kʼe tsʼitrʼi kʼu̷ ri musʼu̷ge nge o trʼii e Mizhokjimi kʼu̷ bʼu̷bʼu̷ ajensʼekʼu̷, e Mizhokjimi ra ñeme ra manda ra tsjaa Rey dya axta nguaru̷ ra mandakʼu̷. Kʼo paakʼo, e Jesús mi bʼu̷bʼu̷ ajensʼe, e Mizhokjimi ro tsjapu̷ ro ne̱e̱ bʼu̷bʼu̷ kja o pjeme e María.

E María o mama: Ra kjago janzi ga nee Mizhokjimi. E José mi yaxu̷ zaʼa. Nudyakʼua e Mizhokjimi o pejñe na anxe ro maa xipji e José: Dya ri su̱u̱, ri chju̷ntu̷ e María zo ya nrrunte, ixi ngeje o espíritu Mizhokjimi kʼu̷ o tsjapu̷ o ndu̱sʼu̷ kʼe tsʼitrʼi. Nukʼua e José o chju̷ntu̷bi e María. Kʼe profeta Miqueas o mama kʼe Mesías ro musʼu̷ji a Belén. ¿Jargua tsjaakʼo, ma e María ñe e José mi menzumu̷ a Nazaret? (Miqueas 5:2.) Kʼo ntee kʼo mi ka̱ra̱ji a Nazaret mi nzhodʼu̷ji 150 kilómetro ngekʼua ro za̷trʼa̷ji a Belén.

Na gobernador kʼu̷ mi romano o manda ro tsjaji na censo, o xipji yo ntee ro moji ro maa jñusʼu̷ji o trju̱u̱ jango ba musʼu̷ji. Ngekʼua e José ñe e María o mebi a Belén, a mi bʼe̷xtrjo janzi paa ro zo̷ʼdye̷ e María (Lucas 2:3). Ma o za̷trʼa̷bi a Belén, dya o chotrʼu̷bi ja ro oxu̷bi. O mebi ja mi kotrʼu̷ji yo nzhu̷nu̷; nujnu o zo̷ʼdye̷ e María o musʼu̷ na tsʼitrʼi, o mbo̷sʼu̷ o bʼitu. Kjanu o ngo̷bʼu̷ jango mi ñonu̷ kʼo añimale. Kʼe xomu̷kʼu̷ mi ka̱ra̱ mbo̷ru̷ kja bʼatrju̷ mi pjoru̷ji o nzhenchju̷ru̷. E Mizhokjimi o pejñe na anxe ja mi ka̱ra̱ kʼo mbo̷ru̷, kʼe anxe o xipjiji: Nudya o musʼu̷ji na tsʼitrʼi a Belén, nukʼu̷, ngeje e Cristo.

Xo go bʼu̷bʼu̷ ntee kʼo unu̷ji nguenrra e Jesús mi ngeje kʼe Mesías. O za̷trʼa̷ kʼo paa kʼo o mama kʼe profeta Isaías, mi bʼu̷bʼu̷ na bʼe̷zo mi jichi yo ntee mi xipji ro sa̷ja̷ kʼe Cristo (Isaías 40:3). Mi nge kʼe Juan kʼu̷ mi jiichinte. Na nu paa ma o jñanrra ma e̱je̱ e Jesús, o xipji yo ntee: “Jñanrrajidya. Ba e̱je̱ nukʼu̷ o ñeme Mizhokjimi ra ndunbu̷ o nzhubu̷ [o pekado] yo ka̱ra̱ kja ne Xoñijomu̷. Ngeje o Tsʼime Mizhokjimi”. O bʼu̷bʼu̷ ntee nzi gua dya̷ra̷jikʼo nzi gua ndu̷ntʼu̷ji axu̷trju̷ e Jesús. Naja bʼe̷zo o mama: “Ya ro chjegojme nukʼu̷ o nda̷ja̷ Mizhokjimi [...]. Nukʼu̷, nge kʼu̷ xiji Mesías” (Juan 1:29, 36, 41).

E Jeoba o mama e Jesús mi ngeje kʼe Mesías. Ma e Juan o jiichi e Jesús ma o mbe̷se̷ kja nrreje, o xogu̷ ajensʼe o e̱je̱ o espíritu Mizhokjimi ja mi bʼu̷bʼu̷ e Jesús, nukʼua e Jeoba o mama: “Nujnu ngejnu in Chʼiigo nu ri sʼiya, ngejnu rga ma̷kjojnu” (Mateo 3:16, 17). ¡O sa̷ja̷ kʼe ntee kʼo bi mama e Jeoba ro pejñe! ¡O sa̷ja̷ kʼe Mesías kʼu̷ mi ngeje e Cristo!

¿Jingua o mbe̷zhi Mesías e Jesús? Kja ne kje̷e̷ 29, ma o zoo kʼo cuatrociento ochenta y tres kje̷e̷ kʼo bi mama e Daniel. Kʼe kje̷e̷ nge ma o za̷dʼa̷ kʼo bi na̷dʼa̷ kʼo profeta, ngekʼua ri pa̱rgoji e Jesús mi ngeje kʼe Mesías. ¿Pje mi jichi e Jesús yo ntee ma mi bʼu̷bʼu̷ kja ne Xoñijomu̷?

(Nu kʼo gua e̱je̱ba xo ri jyodʼu̷ kja Mateo nu capítulo 1-3, ñe Marcos nu capítulo 1, ñe Lucas nu capítulo 2 ñe Juan nu capítulo 1.)