Nu ja ri jmurgojme kʼo kjuarma kʼꞹ otrʼꞹ axojñi kjaji ja ma tsjaji o discípulo e Jesús mi jingua, dya nrro̱nji merio ma ga jichiji yo ntee. E Jehová juajnꞹ bʼɇzo kʼꞹ “pjørꞹji texe kʼo ñaja kjuarma” (Hechos 20:28). Angezeji kjaji kʼo mama e Jehová, jichiji ñe pjøsʼꞹji yo kjuarma. Ne Biblia mama ga kjaba: “Ri pjørꞹji o ntee Mizhokjimi kʼo o dyakʼꞹji ri pjørꞹji. Dya nge kʼꞹ ixi kjakʼꞹji a fuerza ri pjørꞹji; nge kʼꞹ ri ñegeji ri pjørꞹji. Dya nge kʼꞹ rgi pjørꞹji kʼꞹ ri cho̱geji o merio; nge kʼꞹ pjørꞹji ko texe in mꞹbʼꞹji” (1 Pedro 5:1-3). ¿Pje kjaji yo kjuarmayo?

Yo kjuarma kʼo otrʼꞹ axojñi pjøkꞹjme. Angezeji pjøsʼꞹji ñe xøpꞹji yo kjuarma o Jñaa Mizhokjimi. Angezeji pa̱ra̱ji ke e Jehová nee ke ra mbøkꞹjme ngekʼua dya zangꞹgojme, pjøxkꞹgojme ngekʼua dya ra kjajme kʼo na sʼoo, ra mⱥkjojme (2 Corintios 1:24). Dʼa mbørꞹ pjørꞹ na joo o nzhenchjꞹrꞹ, ma sødye dʼa ndenchjꞹrꞹ, angeze ra mbørꞹ asta ma ra jogꞹ. Ximi kjaji ga kjaba yo kjuarma kʼo otrʼꞹ axojñi, pjøkꞹjme ñe pa̱ka̱jme na joo, ma pje ma nrrumꞹ ri pɇsʼijme pjøxkꞹjme (Proverbios 27:23).

Yo kjuarma kʼo otrʼꞹ axojñi jitsʼkojme ja rga kjajme kʼo mama e Mizhokjimi. Chjꞹma chjꞹma ma ri jmurgojme, kʼo kjuarma kʼo otrʼꞹ axojñi unꞹji discurso, xitsʼkojme ja ga kjaa o Jñaa Mizhokjimi ga kjanu ra kjajme kʼo na joo (Hechos 15:32). Yo kjuarmayo pɇpjiji na punkjꞹ, manji ja nge nu ra ma zopjꞹjme yo ntee, ja rga jichijme kʼo mama ne Biblia, ja rga unꞹjme estudio ñe pje ra mangojme ma nrro ra nzhogojme ra ñajme ko yo ntee. Dya ngextrjo jitsʼkojme pje ra kjajme, xo angezeji poji ko nutsʼkojme ma ri pa jichkʼojme yo ntee o Jñaa e Jehová.

Yo kjuarma kʼo otrʼꞹ axojñi pjøxkꞹjme ra sɇchijme. Ma ri jmurgojme, angezeji øngꞹgojme ma ri bʼꞹntrjojme na joo. Xo bʼꞹbʼꞹ paa ma poji kja in nzungojme. Ma ri pɇsʼijme nrrumꞹ jitsʼkojme kʼo mama ne Biblia, xitsʼkojme dya ri bʼꞹntsjɇjme, angezeji øtꞹji e Palesito ajensʼe ra mbøxkꞹjme (Santiago 5:14, 15).

Yo kjuarma kʼo otrʼꞹ axojñi pɇsʼiji o pjamilia, zo nesta ra pɇpjiji ngekʼua ra unꞹji pje ra ziji, zo nesta ra mbørꞹji o pjamilia, angezeji pɇpjiji na punkjꞹ kja congregación, ngekʼua me ri negojme kʼo kjuarmakʼo (1 Tesalonicenses 5:12, 13).

• ¿Pje kjaji yo kjuarma kʼꞹ otrʼꞹ axojñi kja congregación?

• ¿Ja ga mbøxkꞹjme yo kjuarma kʼo otrʼꞹ axojñi? ¿Pje jitsʼkojme ñe ja ga pjøkꞹjme?