DAN la Bible, pa koz souvent lor sa creature spirituel ki appel Mikaël-la. Mais, kan koz lor li, li touletan pé faire kitsoz. Dan livre Daniel, Mikaël pé laguerre avek bann mauvais ange; dan livre Jude, li dan enn grand discussion avek Satan, ek dan Révélation, li pé faire la guerre kont Satan ek so bann demon. Parski li defann regne Jéhovah ek li laguerre kont bann l’ennemi Bondié, Mikaël agir en accord avek seki so nom vedir—“Kisannla ki couma Jéhovah?” Mais kisannla Mikaël?

Parfois, enn dimoune ena plus ki enn nom. Par exemple, Jacob ti appel aussi Israël, ek l’apotre Pierre ti appel aussi Simon. (Genèse 49:1, 2; Matthieu 10:2) Li pareil; la Bible montré ki Mikaël, li enn lot nom pou Jésus Christ, avant ek apré ki li finn vive lor la terre. Anou guette bann raison biblik ki faire nou dire sa.

Archange. La Bible appel Mikaël, “l’archange.” (Jude 9) Sa mot-la vedir “chef bann ange.” Noté ki appel Mikaël, l’archange. Sa faire nou comprend ki ena enn sel ange coumsa. Aussi, sa mot ‘archange-la’ dan la Bible, li touletan singulier, jamais li pa pluriel. En plus, ena enn rapport entre Jésus ek sa position archange-la. Concernant Seigneur Jésus Christ apré so resurrection, 1 Thessaloniciens 4:16 dire: “[Nou] Seigneur li-mem pou desann depuis dan le ciel, ek li pou donne enn l’ordre, avek la-voix enn archange.”  Sa text-la decrire la voix Jésus couma la voix enn archange. Alors li faire nou comprend ki Jésus li-mem, li archange Mikaël.

Enn chef l’armée. La Bible dire ki “Mikaël ek so bann ange ti laguerre kont dragon . . . ek so bann ange.” (Révélation 12:7) Alors Mikaël li chef enn l’armée bann ange fidel. Révélation decrire Jésus aussi couma chef enn l’armée bann ange fidel. (Révélation 19:14-16) Ek l’apotre Paul koz lor “Seigneur Jésus” ek “so bann ange puissant.” (2 Thessaloniciens 1:7) Alors la Bible koz lor Mikaël ek “so bann ange” ek lor Jésus ek “so bann ange.” toulé-deux. (Matthieu 13:41; 16:27; 24:31; 1 Pierre 3:22) Pena okenn place dan la Bible ki dire ki ena deux l’armée ange fidel dan le ciel—enn ki dirigé par Mikaël ek enn lot ki dirigé par Jésus. Alors li logik pou pensé ki Mikaël, li-mem Jésus Christ dan position ki li ena dan le ciel. *