Kouma Ou Kapav Ena enn Pli Bon Lavi?
AZORDI, fason ki bann dimounn viv bien diferan ar seki Bondie ti anvi. Later ti bizin ranpli avek bann dimounn ki anvi ki zot Kreater diriz zot, ki gagn bann bienfe ar so direksion, ek ki imit so lamour ek so bann zoli lezot kalite. Zot ti bizin pe viv ere ansam amezir ki zot elve zot zanfan, dekouver bann nouvo kitsoz, ek fer later antie vinn enn paradi.
BONDIE PROMET POU FER LAVI LOR LATER VINN KOUMA LI TI ANVI
-
“Li fer bann lager arete partou lor later.”—Psom 46:9, NW.
-
‘Kan letan fixe arive pou detrir bann ki pe detrir later.’—Revelasion 11:18, NW.
-
“Okenn abitan pa pou dir: ‘Mo malad.’”—Izai 33:24.
-
“Bann ki mo’nn swazir pou profit maximum tou travay zot lame.”—Izai 65:22.
Kouma sa bann profesi-la pou realize? Bondie finn swazir so Garson, Zezi, antan ki lerwa dan enn gouvernman parfe ki trouv dan lesiel pou diriz later. Labib apel sa gouvernman-la Rwayom Bondie. (Daniel 2:44) Labib dir konsernan Zezi: “Bondie Lesegner pou donn li tronn . . . , e li pou regn[e].”—Lik 1:32, 33.
Zezi ti fer boukou mirak kan li ti lor later, pou montre kouma lavi bann dimounn pou pli bon kan li pou regne antan ki Lerwa.
ZEZI TI MONTRE KI BANN BON KITSOZ KI LI POU FER POU BANN DIMOUNN KI OBEISAN
-
Li ti geri tou sort maladi, pou montre kouma li pou tir bann maladi.—Matie 9:35.
-
Li ti kalme lamer, pou montre kouma li pou protez bann dimounn kan li kontrol lafors lanatir.—Mark 4:36-39.
-
Li ti nouri bann milye dimounn, pou montre ki Li pou donn bann dimounn seki zot bizin pou viv.—Mark 6:41-44.
-
Dan enn maryaz li ti fer delo vinn divin, pou montre ki li pou fer lavi vinn agreab.—Zan 2:7-11.
Kouma ou kapav gagn lavi ki Bondie anvi pou bann dimounn? Ena enn “semin” ki ou bizin swiv. Labib dekrir li kouma ‘semin lavi, ek tigit dimounn pran sa semin-la.’—Matie 7:14.
SEMIN KI AMENN NOU VER ENN PLI BON LAVI
Ki ete semin lavi? Bondie dir: “Mwa, Zeova, Momem to Bondie, Momem ki ansegn twa pou to profi, Momem ki gid twa lor semin ki to bizin marse.” (Izai 48:17) Si ou swiv sa semin-la ou lavi pou pli bon.
Zezi ti dir: “Momem semin, ek laverite ek lavi.” (Zan 14:6, NW) Si nou fer seki Zezi ti dir ek imit so lexanp nou pou vinn pli pros ar Bondie ek nou lavi pou vinn pli bon.
Kouma ou kapav trouv semin lavi? Ena boukou relizion, me Zezi ti donn sa lavertisman-la: “Pa tou dimoun ki dir mwa, ‘Segner, Segner’ ki pou rant dan rwayom lesiel, me zis bann ki fer volonte mo papa ki dan lesiel.” (Matie 7:21) Li ti dir osi: “Zot pou rekonet bannla par zot frwi (setadir, par zot bann aksion).” (Matie 7:16, NW) Labib kapav ed nou pou kone ki larelizion ki vre.—Zan 17:17.
Kouma ou kapav swiv semin lavi? Sa inplik konn sa Kikenn ki finn donn lavi tou bann dimounn: Kisannla li ete? Kouma li apele? Kouma li ete? Ki li pe fer pou nou? Ki li anvi nou fer? *
Bondie anvi plis ki sa pou bann dimounn, ki zot zis travay, manze, amize, ek gagn bann zanfan. Nou kapav konn nou Kreater ek vinn so kamarad. Nou kapav montre nou lamour pou Li kan nou fer so volonte. Zezi ti dir: “Samem ki vedir lavi eternel, ki zot aprann konn twa, sel vre Bondie.”—Zan 17:3, NW.
GRAS-A LABIB, BONDIE ANSEGN OU ‘POU OU PROFI.’—IZAI 48:17
OU PREMIE PA LOR SA SEMIN-LA
Si ou anvi fer Bondie plezir kitfwa ou pou bizin fer sertin sanzman. Kitfwa sa paret difisil. Me selman, ou lavi pou vinn pli bon kan ou koumans mars lor semin lavi. Bann Temwin Zeova kapav ed ou gagn repons pou bann kestion inportan lor Bondie. Nou donn bann kour Labib gratis dan ler ek landrwa ki pli bon pou ou. Ou kapav kontakte nou lor nou sit Internet www.ps8318.com.
