Kouma Nou Kapav Ere ek Satisfe?
Ki nou selibater ouswa marye, zenn ouswa vie, nou tou, nou anvi ere ek satisfe dan nou lavi. Nou Kreater osi anvi sa pou nou. Alor, Li finn donn nou bann pli bon konsey ki ena.
Travay Dir
“Li bizin travay dir, fer bon travay avek so de lame, pou ki li ena kitsoz pou partaz avek enn kikenn ki bizin led.”—EFEZIEN 4:28, NW.
Nou Kreater anvi ki nou trouv travay kouma enn bon kitsoz. Li kone ki enn dimounn ki travay dir li ere, parski li kapav nouri limem ek so fami. Kitfwa li pou kapav osi ed enn dimounn ki bizin led. So patron osi pou apresie li. Alor, enn bon travayer ena mwins sans pou perdi so travay. Bann Lekritir sakre dir ki bann bon rezilta ki enn dimounn gagne kan li travay dir, se “enn don Bondie.”—Ekleziast 3:13.
Res Onet
“Nou sir ki nou ena enn konsians ki drwat, akoz nou anvi res onet dan tou kitsoz.”—EBRE 13:18, NW.
Si nou onet, nou pou respekte noumem, nou pou ena lape lespri ek nou pou kapav dormi bien aswar. Ek anplis, bann lezot dimounn pou fer nou konfians ek respekte nou. Me, bann dimounn ki malonet pa reisi profit sa bann bon kitsoz-la. Okontrer, zot santi zot koupab ek touletan pe viv dan laper, atansion lezot dekouver seki zot inn fer.
Pa Les Kas Vinn Kitsoz Pli Inportan dan Ou Lavi
“Ki lamour pou larzan pa determinn zot lavi, kontant zot avek seki zot ena.”—EBRE 13:5.
Nou bizin kas pou manze ek pou gagn seki nou bizin. Parkont, “lamour pou larzan” bien danzere. Sa lamour-la kapav pous enn dimounn pou fini tou so letan ek so lenerzi pou gagn plis kas. Sa lanvi exazere pou gagn plis kas la kapav afekte so maryaz, kantite letan ki li pas avek so bann zanfan ek mem so lasante. (1 Timote 6:9, 10) Anplis, enn dimounn ki kontan kas kapav tante pou fer enn kitsoz malonet. Enn dimounn ki ena boukou sazes ti dir: “Enn dimounn fidel, pou gagn boukou benediksion, me enn kikenn ki pe prese pou vinn ris, pa pou res inosan.”—Proverb 28:20.
Swazir Pli Bon Ledikasion ki Ena
“Gard sazes pratik ek kapasite pou reflesi.”—PROVERB 3:21.
Enn bon ledikasion ed nou pou vinn bann adilt responsab ek bann bon paran. Me zis ledikasion ki nou gagne dan lekol pa ase pou ed nou trouv boner ek res an sekirite. Si nou anvi reisi dan tou seki nou fer, nou bizin osi ledikasion ki Bondie donn nou. Bann Lekritir sakre dir konsernan enn dimounn ki ekout Bondie: “Tou seki li fer pou reisi.”—Psom 1:1-3.
Ena Osi
LATOUR DEGARD
Kouma Nou Kapav Kontan pou Travay Dir?
LEVE!
Kouma Ou Kapav Ere?—Kontantman ek Zenerozite
Boukou dimounn panse ki boner ena enn lien ar bann dibien ek larises. Eski larzan ek bann dibien vremem fer bann dimounn ere pou lontan? Ki bann fe montre?
