SA TI passé en 1949, ena plis ki 60 an, mais mo zistoire commence plusieurs l’année avant. Hendrik, mo papa, ti enn cordonnier ek enn jardinier, dan enn ti village ki appel Donderen, dan le nord Drenthe, dan Pays-Bas. Mo ti né laba en 1927, mo ti quatrieme parmi sept zenfant. Nou lakaz ti trouve lor enn chemin later dan la campagne. La plupart nou bann voisin ti bann planteur, ek mo ti bien content lavi lor plantation. En 1947, kan mo ti ena 19 an, mo ti konn la verité par enn voisin ki appel Theunis Been. Mo rappel ki mo pa ti content Theunis kan mo ti zwenn li premier fois, mais enn tipé apré Deuxieme Guerre Mondial, li ti vinn enn Témoin de Jéhovah, ek mo ti remarké ki li ti pli amical ki li ti été avant. Sa changement-la ti etonne moi, alors, mo ti ecoute li kan li ti koz ar moi lor promesse Bondié pou faire later vinn enn paradis. Mo pa ti tardé pou accepté la verité, ek nou ti reste bann bon camarade pou toute lavi. a

Mo ti commence preché en Mai 1948, ek mois apré, le 20 Juin, mo ti prend bapteme dan enn l’assemblée ki ti faire en Utrecht. Le 1^er Janvier 1949, mo ti commence faire pionnier ek ti envoye moi Borculo, dan l’est Pays-Bas, kot ti ena enn ti congregation. Mo ti bizin voyage 130 kilometre pou arrive laba, alors mo ti decidé pou al lor mo bicyclette. Mo ti pensé ki sa ti pou prend moi apepré 6 heure temps, mais a cause enn gros la  pluie ek enn grand di-vent contraire, sa ti prend moi 12 heure, mem si mo ti prend train pou faire le reste 90 kilometre! Tard dan l’apré-midi, mo ti finalement arrive kot enn famille Témoin kot mo ti resté pendant ki mo ti faire pionnier dan sa l’endroit-la.

Dan sa bann l’année apré la guerre-la, bann dimoune pa ti ena beaucoup kitsoz. Tou seki mo ti ena c’est enn costume ek enn pantalon​—costume-la ti trop grand ek pantalon-la ti trop courte! Couma mo ti dire au commencement, premier mois ki mo ti passé dan Borculo ti bien difisil, mais Jéhovah ti beni moi ek mo ti kapav conduire plusieurs letid la Bible. Apré neuf mois, mo ti gagne enn nouveau affectation: Amsterdam.

Mo ti grandi dan la campagne, mais asterla, mo ti dan Amsterdam, pli grand lavil dan Pays-Bas. Mo ti gagne bann bon resultat dan mo service. Pendant premier mois, mo ti place plis publication ki mo ti’nn placé pendant neuf dernier mois. Bientot mo ti conduire pa moins ki huit letid la Bible. Apré ki mo ti vinn serviteur congregation (asterla appel sa coordinateur college ancien), mo ti gagne mo premier discours publik pou faire. C’est enn privilege ki ti faire moi bien peur, alors mo ti bien soulagé kan ti envoye moi dan enn lot congregation zis avant ki mo ti bizin faire sa discours-la. Sa lepok-la, mo pa ti koné ki dan bann l’année ki ti pou vini apré, mo ti pou faire plis ki 5,000 discours!

En Mai 1950, mo nouveau l’affectation ti Haarlem. Lerla, ti demann moi pou vinn surveillant circonscription. Mo pa ti dormi bien pendant trois jour. Mo ti dire Robert Winkler, enn parmi bann frere ki ti dan filiale, ki mo pa ti senti-moi qualifié, mais li ti dire moi: “Rempli zis bann papier toi. To pou aprann.” Enn tipé apré sa, mo ti gagne enn formation enn mois ek mo ti commence servi dan circonscription. Pendant enn visite dan enn congregation, mo ti zwenn Janny Taatgen, enn jeune soeur pionnier ki ti bien joyeux. Li ti ena enn grand lamour pou Jéhovah ek enn l’esprit sacrifice. Nou ti marié en 1955. Mais avant mo contigne raconte mo zistoire, Janny pou expliké couma li ti vinn pionnier ek couma nou ti servi ensam apré nou mariage.

Janny: Mo mama ti vinn enn Témoin de Jéhovah en 1945, kan mo ti ena 11 an. Desuite li ti trouve l’importance pou etudié la Bible avek so trois zenfant, mais mo papa ti bien opposé ar la verité. Alors, li ti faire nou letid kan mo papa pa ti lakaz.

Premier reunion ki mo ti assisté ti enn l’assemblée dan La Haye, en 1950. Enn semaine plitar, mo ti assisté mo premier reunion dan la Salle du Royaume dan nou l’endroit, dan Assen, (Drenthe). Mo papa ti bien en colere ek ti mette moi dehors. Mo mama ti dire moi: “To koné kot-sa to kapav al resté.” Mo ti koné ki li ti pé pense mo bann frere ek soeur spirituel. Au commencement, mo ti al reste  kot enn famille Témoin ki ti reste pré kot moi, mais mo papa ti ankor pé faire moi gagne probleme, alors, mo ti demenagé pou al dan congregation Deventer, (Overijssel), ki ti trouve apepré 95 kilometre pli loin. Selman, mo ti ankor mineur, alors mo papa ti gagne probleme avek bann l’autorité parski li ti mette moi dehors. A cause sa, li ti dire moi ki mo ti kapav retourne lakaz. Mem si jamais mo papa finn accepté la verité, finalement, li ti laisse moi assisté tou bann reunion ek al preché.

Enn tipé apré ki mo ti retourne lakaz, mo mama ti tombe bien malade, ek mo ti bizin faire tou l’ouvrage dan lakaz. Malgré sa, mo ti contigne progressé lor plan spirituel ek mo ti prend bapteme en 1951, l’age 17 an. En 1952, apré ki mo mama ti ré-gagne so la santé, mo ti faire pionnier vacance (auxiliaire), pendant deux mois, ensam avek trois soeur pionnier. Nou ti vive lor enn bateau ek nou ti preche dan deux lavil dan Drenthe. Mo ti vinn pionnier permanent en 1953. Enn an plitar, enn jeune surveillant circonscription ti vinn visite nou congregation. Li ti appel Markus. Nou ti marié en Mai 1955, parski nou ti pensé ki nou ti pou kapav servi Jéhovah pli bien en tant ki enn couple.​—Eccl. 4:9-12.

Markus: Apré nou mariage, ti demann nou pou faire pionnier dan Veendam, dan Groningue. Nou ti vive dan enn ti la chambre ki ti mesure apepré deux metre par trois metre. Kan-mem, Janny ti faire nou la chambre bien joli ek confortable. Chaque soir, nou ti bizin tire nou la table ek nou deux ti chaise, pou nou kapav desann nou lili ki ti dan muraille.

Apré six mois, ti demann nou pou al faire circonscription dan Belgique. En 1955, ti ena apepré 4,000 proclamateur dan sa pays-la. Asterla, ena six fois plis! Dan Flandre, dan nord Belgique, bann dimoune koz mem langue ki dan Pays-Bas. Selman, en Belgique, zot l’accent enn tipé diferan, alors, nou ti bizin surmonte sa difficulté-la.

Janny: Nou ti bizin ena enn grand l’esprit sacrifice pou faire circonscription. Nou ti visite bann congregation lor nou bicyclette ek nou ti reste kot bann frere ek soeur. Nou pa ti ena enn lakaz pou resté entre bann visite dan diferan congregation, alors, nou ti reste kot bann frere ziska Mardi gramatin, apré sa, nou ti al visite prochain congregation. Mais nou ti toujours considere nou service couma enn benediction Jéhovah.

Markus: Au commencement, nou pa ti konn okenn frere ek soeur dan bann congregation, mais zot ti bien gentil ek hospitalier envers nou. (Héb. 13:2, note) Pendant bann l’année, nou ti visite plusieurs fois tou bann congregation ki koz Néerlandais dan Belgique. Sa ti faire nou gagne beaucoup benediction. Par exemple, nou ti konn preské tou bann frere ek soeur ki ti dan district Néerlandais, ek nou ti bien attaché ar zot. Nou finn trouve plusieurs centaine jeune grandi lor plan physik ek spirituel, voué zot lavi ar Jéhovah, ek mette so Royaume en premier dan zot lavi. C’est enn vrai la joie pou  trouve beaucoup parmi zot ki pé servi Jéhovah avek fidelité dan service a plein temps. (3 Jean 4) Grace a sa “l’echange l’encouragement[-la],” li ti pli fasil pou nou pou contigne servi Jéhovah avek zele dan nou affectation.​—Rom. 1:12.

Markus: Depuis nou mariage, nou ti envie assisté Lekol Guiléad. Nou ti aprann Anglais pendant au moins enn heure temps, toulé-jour. Pourtant, li pa ti fasil pou aprann Anglais zis dan bann livre, alors nou ti decidé pou al en Angleterre pendant nou vacance pou pratik sa langue-la dan predication. Finalement, en 1963, nou centre mondial ki trouve Brooklyn, ti envoye nou enn l’enveloppe. Dan sa l’enveloppe-la ti ena deux lettre, enn pou moi ek lot-la pou Janny. Dan mo lettre, ti ena enn l’invitation pou assisté enn cours special dix mois pou suive cours Guiléad. Sa cours-la ti pou surtout forme bann frere ek donne zot bann l’instruction en rapport avek l’organisation. Alors, parmi 100 etudiant ki ti invité, 82 ladan ti bann frere.

Janny: Dan lettre ki mo ti gagné sa jour-la, bann frere ti demann moi pou reflechi dan la priere si mo ti pou disposé pou reste Belgique pendant ki Markus ti pou al Guiléad. Mo bizin reconette ki au commencement, mo ti bien deçu. Mo ti ena l’impression ki Jéhovah pa ti beni bann zeffort ki mo ti pé faire pou servi Li. Selman, mo ti rappel l’objectif Lekol Guiléad​—pou aide bann zeleve pou preche la bonne nouvelle dan le monde entier. Alors, mo ti accepté pou reste Belgique ek mo ti servi couma pionnier special dan lavil Gand, avek Anna ek Maria Colpaert, deux soeur pionnier special ki ti ena l’experience.

Markus: Mo ti bizin ameliore mo Anglais, a cause sa, mo ti invité pou al Brooklyn cinq mois avant lekol commencé. Mo ti travail dan service Expedition ek Bureau Service. Travail ki mo ti faire dan nou centre mondial ek preparation bann publication pou envoye en Asie, en Europe, ek en Amérique du Sud par bateau, ti faire moi plis conscient ki nou ena enn famille international. Mo ti surtout rappel Frere Alexander Macmillan, ki ti enn pelerin (surveillant itinerant) dan lepok Frere Russell. Li ti agé, ek li ti enn tipé sourde, pourtant li ti assisté tou bann reunion. Sa ti faire enn grand l’effet lor moi, ek ti enseigne moi ki fodé jamais nou considere frequentation nou bann frere couma enn kitsoz banal.​—Héb. 10:24, 25.

Janny: Markus ek moi nou ti ecrire nou camarade plusieurs fois par semaine. Nou ti bien mank nou camarade! Mais, Markus, ti bien content formation ki li ti pé gagné Guiléad, ek mo ti gagne enn grand la joie dan mo ministere. Kan Markus ti sorti en Amérique, mo ti pé conduire 17 letid la Bible! Nou ti separé pendant 15 mois, ek sa ti bien difisil, mais mo ti kapav trouvé ki Jéhovah ti beni bann sacrifice ki nou ti faire. Jour ki Markus ti retourné, so avion ti faire retard pendant plusieurs ler, alors, kan finalement li ti arrivé, nou ti maye nou camarade ek nou ti ploré. Depuis sa, jamais nou finn separé.

Markus: Kan mo ti sorti Guiléad en Décembre 1964, ti demann nou pou servi dan Béthel. Sa lepok-la, nou pa ti koné ki nou pa ti pou reste laba touletan. Zis trois mois plitar, ti demann moi pou vinn surveillant district dan Flandre. Kan Aalzen  ek Els Wiegersma ti vinn Belgique couma missionnaire, zot ti remplace nou dan district, ek lerla, nou ti retourne Béthel, kot mo ti travail dan Bureau Service. Depuis 1968 ziska 1980, plusieurs fois nou ti change affectation, nou ti servi dan Béthel ek dan service itinerant. Finalement, depuis 1980 ziska 2005, mo ti ré-servi ankor couma surveillant district.

Mem si nou l’affectation souvent ti changé, jamais nou ti blié ki nou ti’nn voué nou lavi pou servi Jéhovah avek tou nou nâme. Nou ti vrai-mem apprecié chaque affectation ki nou ti gagné. Nou ti sur ki tou bann changement ki finn ena dan nou service c’est pou favorise bann l’interet Royaume Bondié.

Janny: Mo ti surtout bien content privilege extraordinaire ki mo ti gagné pou al avek Markus, Brooklyn, en 1977 ek Patterson, en 1997 kan li ti gagne enn lot formation en tant ki membre Comité Filiale.

Markus: En 1982, Janny ti faire enn l’operation ek apré, li ti ré-gagne so la santé. Trois an plitar, congregation Louvain ti offert nou enn l’appartement lor zot la Salle du Royaume. Pou premier fois en 30 an, nou ti ena enn ti place pou nou-mem. Dan Mardi, kan nou ti fini ramasse nou bann zaffaire pou al visite enn congregation, mo ti bizin monté-desann 54 marche dan l’escalier pou desann nou bann bagage! Heureusement, en 2002, ti prend bann disposition pou ki nou gagne enn l’appartement en bas. Apré ki mo ti’nn gagne 78 an, nou ti gagne l’affectation pou servi couma pionnier special dan lavil Lokeren. Nou bien content ki nou kapav servi dan sa fason-la ek ki nou ankor kapav al preché toulé-jour.

Janny: Nou toulé-deux ensam, nou finn passe plis ki 120 an dan service a plein temps! Nou finn temoin realisation promesse ki Jéhovah faire, ki ‘jamais Li pou quitte nou’ ek ki si nou servi Li fidelement, nou ‘pa pou mank nanyé.’​—Héb. 13:5; Deut. 2:7.

Markus: Kan nou ti jeune, nou ti voué nou lavi ar Jéhovah. Jamais nou ti rod bann grand kitsoz pou nou-mem. Nou ti accepté n’importe ki affectation ki ti offert nou parski nou sur ki seki pli important c’est pa ki coté nou servi, ni ki privilege nou ena, mais kisannla nou servi.