LARTIK KOUVERTIR
Ki Bondie Panse lor Lager?
Kouma ou pou reponn sa kestion-la? Boukou panse ki Bondie aksepte ki ena lager. Zot dir ki dan lepase Li ti donn lord sertin so bann adorater pou al lager, ek Labib konfirm sa. Parkont, lezot dir ki Zezi, Garson Bondie, ti ansegn so bann disip pou kontan zot lennmi. (Matie 5:43, 44) Alor zot dir ki finn ena enn moman kot Bondie inn sanz so pwindevi lor lager ek ki zordi Li kondann lager.
Ou, ki ou panse? Eski Bondie aksepte ki ena bann lager? Si wi, dan bann lager ki ena zordi, dan ki kote Li ete? Repons sa bann kestion-la kapav sanz ou fason panse lor lager. Par exanp, si ou kone ki Bondie aksepte ki ena lager ek Li pe soutenir mem parti ki ou, kitfwa ou pou dir ou dan bon kote, ek ou sir ki ou parti pou gagne. Me ki ou pou resanti si ou aprann ki Bondie pe soutenir ou adverser? Sirman ou pou reget ou pozision.
Me ena enn kitsoz pli inportan. Kan ou kone ki Bondie panse lor lager sa kapav sanz ou fason panse lor Li. Si ou enn parmi bann milyon dimounn ki’nn bien soufer akoz lager, pena dout ki ou anvi gagn repons sa bann kestion-la: Parey kouma sertin panse, eski Bondie ankouraz bann dimounn pou al lager ek aksepte bann soufrans ki ena akoz lager? Ouswa eski Li zis gete ek pa pran kont kan bann dimounn pe soufer akoz lager?
Kitfwa ou pou etone pou aprann ki repons ki Labib done bien diferan ar sa bann lopinion-la. Anplis, seki Bondie panse lor lager pa’nn sanze. Anou gete ki Labib dir lor seki Bondie ti panse lor lager dan lepase ek dan premie siek kan Zezi ti lor later. Koumsa nou pou kone ki Li panse lor lager zordi ek si dan lavenir pou kontign ena lager.
