Yesu heetthuciha wiira nihaana nikhalakhalaka ninnema naakhunanihu. Masi nkwaha mmoca, uyo ahowiirela maapostolwaawe co: “Nhoonihe wiira kiwaanale nnema watuninyani; akiwaanale nnema, masi inttewo. Kontha kiwaanale uhiiwanana: nlopwana ni athumwaane, mwaana nthiyana ni anumwaane, ni nthiyana ni amwaramwanawe.” (Mat. 10:34, 35) Isiyani Yesu yaapheelaawe wiitthuca wiira wawe commo?

Yesu khaaphenle uwoona amuci yahiiwananaka. Masi uyo aanaacuwela wiira iyo itthwiiyo yaanaahala wiirannya nlattu wo citthu ceetthucihaawe. Atthu yaahala ulakela ukhala atthari a Yesu ni upattisiya yahaana yacuwelaka isiyani yaahala uwiirannyeela nlattu woolakela ukhala atthari a Yesu. Pooti ukhalaka wiira amucyaaya khawaahala waacivela uwoona yalakelaka untthara Yesu ni yaanaahala upanka yotheene yaahalaaya ukhitiri wiira yaahiihe weettela ikano ca Yesu.

Ibiiblya inaanikurumica ‘ukhala ninnema naatthu otheene.’ (Aroo. 12:18) Masi citthu ciitthucihalyaawe Yesu, pooti uwaana “inttewo” nhina itthoko cinci. Manannani? Iyo itthwiiyo pooti wiirannya ntthu mmoca watthokoni alakelaka ukhala nkristau, masi atthu akinaayo woohaacivela itthu ilakenlyaawe awula yanceraka unthanya. Yeerannyaaka iyo itthwiiyo, amucyaawe uyo ntthuuyo pooti ukhala khampa ‘awanannyaawe.’—Mat. 10:36.

Makristau ankhala itthoko caatthu arina ittiini coovirikana pooti waakhumelela citthu cinhala waarikarikiha unfenta ni unvaresesa Yehova ni Yesu. Wootakihera, ayo pooti ukhanyererihiya naasimucyaaya utthapelela isikuhuulu cottiini cowootha. Phimaana, ayo ahaana yalakelaka tipani mpheelaaya untteeliha nrima. Yesu heera: “Ntthu naafenta athumwaane awula anumwaane uvikana inanna cinkifentaawe mi, khunomphwanela ukhala nttharyaaka.” (Mat. 10:37) Unawoonannya wiira Yesu khaaphenle uhimya wiira attharyaawe ahaana yahiyaka waafenta asimucyaaya. Masi uyo aapheela uwiitthuciha attharyaawe tipani aalamuliyaaya uhoolelihera unfenta. Asimuciihu yamananihaka unikhanyereriha uhiya unswalela Yehova, hi khaninhiya waafenta. Masi unfenta Nluku phi itthu inlamuliyeehu uhoolelihera.

Khweeliini, hiiva pooti unirika uvilela asimuciihu yanceraka unithanya. Masi hataa ukhalaka commo, atthari a Yesu ahaana yuupuwelaka moolumo a Yesu amphwanyannya nhina Matewus 10:38: “Ntthu hincisa nipotto nawe noottaruseliya ni hinkitthara khunomphwanela ukhala nttharyaaka.” Ala moolumwaala maanaaya wiira makristau anlupatthiya naasimucyaaya anaacuwela wiira iyo ikhanle itthu inwiirannyeela atthu otheene anontthara Yesu. Ciicammo, ayo makristawaayo anaakhuluvela wiira wahoolo asimucyaaya anaahala urukunusa mirima caya yoonaka makhalelwaaya omaana ni atthunaka anaahala upheela wiitthuca ikhweeli ca Nluku.—1 Pet. 3:1, 2.