Pa Mulungu pa 20 Novemba 2022, yamazile ukukomaana ukwakuti COP27 United Nations Climate Change. Nanti cakuti pa kukomaana kuu yazumilizyanyizye ukuti yapeeleko impanga izipina impiya izyakuyazwa ukucefyako intanzi izikaiza pa mulandu nu kusenuka kwa miceele, aingi yamanya ukuti ukucita vii kutanga kumale intazi izikaiza pa mulandu nu kusenuka kwa miceele.

•   Pa 19 Novemba 2022, António Guterres kalemba uwa mu kaungwe ka United Nations walanzile ukuti, “Indi ni nsansa pali vino twapingulapo ukufumya impiya izyakwazwilamo yayo akucula pa mulandu nu kusenuka kwa miceele. Lelo itumanya ukuti ukucita vii kutalamala intazi ii . . . Ivintu umu nsi vingipisya insita ili yonsi.”

•   Pa 20 Novemba 2022, Mary Robinson uwali kateeka umu Ireland nupya uwali UN High Commissioner for Human Rights walanzile ukuti, “Ukusenuka kwa miceele kungipisya insita ili yonsi, na cii cingalenga ukuti antu yonsi yaye umu uzanzo.”

 Acance ali yano yakasakamala sana pali vino insi ilaya uku nkoleelo. Lelo uzye mauteeko yangaombela pamwi nu kufikilizya vino yakalaya ukulesya intazi ya kusenuka kwa miceele? Uzye Baibo yalandapo uli?

 Baibo yalenga tumanye ukuti nanti cakuti mauteeko yangaombesya ukucefyako intazi iya kusenuka kwa miceele, yatanga yamale intazi ii. Lolini ivintu viili ivyalenga ciye vivyo:

•   “Utange uolole cintu icinyongane.”—Kasambilizya 1:15.

   Vino cikapiliula: Mauteeko yatanga yacite vyonsi vino yakulonda pano antunze yataumvilwe ukuti yaitungulula aineco. (Yelemiya 10:23) Nanti cakuti mauteeko yangalemana, yatanga yakwate amaka akumala intazi izyaya umu nsi nanti yangaombesya uli.

•   “Pano antu yalaitemwa, yalatemwa impiya, . . . aasizumilizyanya.”—2 Timoti 3:2, 3.

   Vino cikapiliula: Baibo yasoowile ukuti antu ndakai yalaya yakaitemwe nupya yatalalonda ukuombela pamwi na yauze pakuti ivintu vizipile yonsi.

 Lelo vino ivintu umu nsi vilaya uku nkoleelo vitasintilila pali vino mauteeko yakalaya. Leza wasoolola Kateeka umusuma, Yesu Klistu. Baibo ikalanda pali aliwe ukuti:

•   “Yamwikila uwene apa viye vyakwe. Yamutemela izina lyakwe yati, A Ciinda Wakuzunguka, Leza wa Maka, Umuvyazi wa pee, Inkombe ya Mutende.”—Ezaya 9:6.

 Yesu u Mwene uwa Wene Wakwe Leza, nanti uteeko uwa kwi yulu. (Mateo 6:10) Wakwata maka, mano, nupya akalondesya ukusakamala insi pamwi na antu akaikalamo. (Masamu 72:12, 16) Lino Yesu alateeka, uwene wa kwi yulu ulonona yayo “aakaonona insi” nupya alazifya insi yonsi.—Kusokolola 11:18; Ezaya 35:1, 7.

 Pa kuti mumanyilepo na vyuze pa cingalenga amazanzo akaiza pa mulandu nu kusenuka kwa miceele ukusila, belengini icipande cakuti “Kusenuka Kwa Miceele ni Vilacitika Uku Nkoleelo—Uzye Baibo yalandapo uli?”