Pa myaka iingi antu yataamanyile icasuko ukwi uzyo lii. Nomba antu aingi yafwa pa mulandu ni vinkunka ni ndwala. Nomba ya sayansi yasusile iyamanya icumi. Yalangilile ukuti malwala ilingi yakafuma ku tuzizi tunono sana utusiloleka na manso. Lino yazanyile icumi cico, cazwilizye antu ukuicingilila nu kumanya ivyakupozya indwala izingi, na cico calenga antu aingi cuze ukwikala imyaka iingi nu umi usuma.

Nga pa mauzyo yauze acindame pene, caya uli? Uzye mukwelenganya ukuti ukumanya icumi ku mauzyo yaa kungamwazwa uli?

• Uzye Leza a weni?

• Uzye Yesu Klistu a weni?

• Uzye Uwene wakwe Leza i cani?

• I vyani ivilacitika ku nkoleelo?

Antu aingi yazana masuko ku mauzyo yaa nupya calenga ukuti umi wao uzipileko. Namwe kwene kumanya masuko ku mauzyo yaa kungamwazwa.

Limwi mukasakamala ukuti ‘uzye ningacita uli pakuti imanye icumi pa cili consi?’ Alino, ukuzana icumi pa vintu ivingi kukaloleka  kwati kukuya kukutalilako sile. U mulandu ci?

Antu aingi yatataila ukuti mauteeko, aakacita uculuzi nanti aakasalanganya malyasi yangayanena icumi. Cikayatalila kumanya ndi cakuti yauze yakulanda icisinka, nanti yakulanda sile vino yamanya, yakufisa ivyeo vimwi nanti ndi yakusomba sile. Pa mulandu wa kuti antu yatatailana nupya ivyeo ivingi vikaya ivya ufi, calenga antu aingi yavilwa kuzumila ivisinka nanti icakuti vintu vivyo ivicindama sana.

Usi mulandu ni ntazi zizyo, tungazana amasuko acumi ku mauzyo acindame sana. Tungacita uli vivyo? Ndi cakuti tukucita vivi kwene vino tukacita nga tukulonda kumanya amasuko ku mauzyo aatacindama sana.

Limwi, mukalonda kumanya icumi cila wanda. Elenganyini pa ntazi ino ya Jessica yakwata. Yatiile: “Umwanane mukazyana akalwala ndi walya ivyakulya umuli imbalala, icakuti nanti walya sile ivyakulya umuli tumbalala tunono angafwa nu kufwa.” Fwandi ya Jessica yakalondelezya lino yatatala yakala ivyakulya ukulola nga vili sile ningo. Yalanzile nu kuti: “Ica nkoleelo cino nkacita u kuwelenga ivilemvilwe pa vyakulya nu kulola vino yapangila ivyakulya vivyo. Lyene nkalondelezya nu kutumila aakapanga ivyakulya vivyo pakuti imanye ndi cakuti yatasankanyamo imbalala. Lyene nkalondelezyako na vino antu yalandapo pa kampani kwene kaa akakapanga ivyakulya.”

Icumi cino tukalondesya ukumanya cila wanda, citanga cilingane na vino ya Jessica yakaezya na maka kulondelezya, lelo wakwe vivi kwene vino yakacita, naswe kwene tulinzile ukulondelezya pakuti tuzane amasuko ku mauzyo yano tukakwata:

• Mwamanya ivisinka vyonsi.

• Mwalondelezya ivyeo na vyuze.

• Mwasininkizya ukuti kuno mukulondelezya ivyeo u kutailwe

Inzila ili imwi kwene ingamwazwa kuzana amasuko acumi ku mauzyo acindame pa umi. U munzila ci?

Lino ya Jessica yalondelezyanga icumi ica muli Baibo, yaomvizye inzila ili imwi kwene  ino yakaomvya pa kulondelezya pa vyakulya vya mwana wao. Yalanzile ukuti, “Ukwika sana mano ku kuwelenga nu kulondelezya sana ivyeo kwangavwile kumanya icumi ca muli Baibo.” Wakwe vino cali kuli ya Jessica, antu aingi yamanya icumi pali vino Baibo ikasambilizya pa mauzyo yaa:

• U mulandu ci uno twayela pano nsi?

• I vyani vikacitika nga twafwa?

• U mulandu ci uno tukaculila?

• I vyani vino Leza akucita pakuti akafumyepo ucuzi?

• Tungacita uli pakuti tuye ni nsansa mu lupwa?

Mungazana amasuko ya cumi ku mauzyo yaa na yauze nga mwawelenga Baibo nu kulondelezya ivyeo na vyuze pa webusaiti ya www.ps8318.com.