Icisalu cino yasungila umu Turin citalumbululwa muli Baibo. I cisalu cino aingi yakaelenganya ukuti ali muno yapomvile Yesu Klistu pa kumuzika. Pa mulandu ni cizumilo cii, yamwi akaitunga ukuti Aina Klistu yakalola icisalu cii ukuya icintu ca muzilo icaliko mpiti. Icisalu kwene cico yacisungila umwi calici lyakwe ya katolika ilyayela umu musumba wa Turin umu mpanga ya Italy nupya yapanga umufuko muno yaciika.

 Uzye malyasi aya muli Baibo yakazumilizya ivyeo ivyalandwa pa Cisalu Cino Yasungila Umu Turin ukuti ivya cumi? Awe.

 Lekini tulande pa vintu vitatu ivikalanda pa cisalu cii ivyapusana na vino Baibo ikalanda.

1.   Icisalu cii cakwata masentimita 422 umu utali na masentimita 113 umu wipi, alino yakacisumila umu utali ukuomya kotoni wa masentimita 8.

    Vino Baibo ikalanda: Umwili wakwe Yesu yataupomvile umu cisalu conga, lelo yaupomvile umu nsalu izingi. Umutwe wakwe yaupomvile umu nsalu yuze. Lino Yesu watutulwilwe, umutumwa wakwe wenga waile umwi lindi muno mutaali nanti cimwi nupya waweni “nsalu zitiswe zyamutengo zituzi.” Baibo nupya ikaati: “Nga ni citambala cino canyefilwe ku mutwe wakwe Yesu. Cene citali pamwi ni nsalu zitiswe zya mutengo, lelo cakonzine conga pa mbali.”—Yoane 20:6, 7.

2.   Umu cisalu cii mwaya uwazi uumilile uno ukaloleka ukuti wafumile uku citumbi cino yatafuzile.

    Vino Baibo ikalanda: Lino Yesu wafwile, alondezi yakwe yateinye ningo umwili wakwe “kulingana nu lutambi lwa Ciyuda lwa kuteyanya kuzika icala.” (Yoane 19:39-42) Umu lutambi luu mwali nu kufula icitumbi ukucipaka mafuta ni vinunkile lino yatatala yazika. (Mateo 26:12; Milimo 9:37) Fwandi asambi yakwe Yesu yafwile yafuzile umwili wakwe lino yatatala yaupomba umu nsalu.

3.   Ibuku limwi (Encyclopædia Britannica) likalanda ukuti pa cisalu cii paya icikope ca monsi “cino yaleenga umu utali ukufika pakasi. Lyene iciputulwa icasyala yacikuzya sana icakuti cingaviimba umwili onsi.”

    Vino Baibo ikalanda: Alondezi yakwe Yesu yalanzyanyizye pa mfwa yakwe Yesu ni lindi lyakwe umutaali nanti acimwi alino na anaci aweni ‘cilolwa ca angeli ayanenyile ukuti wene uwa umi.’ (Luka 24:15-24) Ndi cakuti icisalu cii cino yasungila umu Turin amuno cali umwi lindi lino yazikiilemo Yesu, ukwaula nu kutwika asambi yakwe nga yalanzilepo alino nga yalanzile na pa vikope kwene ivyayapo. Nomba Baibo italandapo icili consi pali vii.

 Awe. Nanti icakuti icisalu cii akuno caya, ukucicindika u kwipe. Uvwini ivisinte ivikulondolola umulandu uno caipila ukucita vivyo.

1.   Citacindime ukucita vivyo. Yesu walondolwile ukuti: “Leza u mupasi, na yano akamupepa, yalinzile kumupepela mu mupasi nu mu cumi.” (Yoane 4:24) Umu kupepa kwa cumi mutaya ukuomvya ivya mpiti nanti ivinkolanya.

2.   Citazumiliziwa ukucita vivyo. Masunde 10 yakanyizye ukupepa utuluwi. (Malango 5:6-10) Vivyo kwene avino na Baibo ikanena Aina Klistu ukucita, ikati: “Mwaisunga ningo mutapepa tuluwi.” (1 Yoane 5:21) Yamwi yangapazya iyati icisalu cino yasungila umu Turin asi ciluwi kuli aliyo lelo i cintu cimwi icicindame sana nanti icimpazyanya cino imipepele yao yataila. Nomba icimpazyanya, cikaya kaluwi uku muntu wino akucipeela umucinzi. a Fwandi umuntu akulonda ukuzanzya Leza atalapeela umucinzi uku cintu cili consi ukwikako sile ni cisalu cino yasungila umu Turin.