1 Korint 2:1-16
2 Kõn men in, ro jeiũ im jatũ, iar jab iwõj bwe in kabwilõñ kom̦ kõn naan ko rewãjepdik ak kõn mãlõtlõt ke iar kwal̦o̦k ñan kom̦ kõn men eo ettino im eokkwõjarjar an Anij.
2 Ke iar pãd ippemi, iar pepe in jab kõnnaan ippemi kõn jabdewõt men ijello̦kun wõt kõn Jesus Christ, im kõn aer kar m̦ane ilo aer dilaiki ilo jurõn al̦al̦.
3 Im ke iar iwõj ñan ippemi, iar m̦õjn̦o̦ im mijak im kanooj in wũdiddid,
4 im naan ko aõ kab men ko iar kwal̦o̦k kaki rar jab itok jãn naan ko rekarreelel an ro remãlõtlõt. Bõtab naan ko aõ rar kwal̦o̦k kõn kajoor eo an jetõb kwõjarjar,*
5 bwe tõmak ko ami ren jab pedped ioon jel̦ãl̦o̦kjen̦ an armej, bõtab ren pedped ioon kajoor eo an Anij.
6 Kiiõ jej kwal̦o̦k kõn mãlõtlõt eo jãn Anij ñan ro rerũtto ilo tõmak. Jejjab kwal̦o̦k ñan rein kõn mãlõtlõt eo an jukjukun pãd* in ak mãlõtlõt eo jãn ri-tõl ro an jukjukun pãd in, ro renaaj jako.
7 Bõtab jej kwal̦o̦k kõn men eo ettino im eokkwõjarjar an Anij, men in ej mãlõtlõt eo ettino an Anij me ear pepel̦o̦k im̦aan kake m̦okta jãn an kar jukjukun pãd in wal̦o̦k, bwe jen maroñ bõk aiboojoj.
8 Ejjel̦o̦k juon iaan ri-tõl ro an jukjukun pãd* in rar jel̦ã kõn mãlõtlõt in, kõnke el̦aññe rar jel̦ã kake, innem reban kar m̦an* Irooj eo ad el̦ap.
9 Ãinwõt an Jeje ko ba: “Men ko mãj ejjañin kar loi im lo̦jilñi ejjañin kar roñ, im ejjañin kar ejaak ilo bũruon armej, erkein men ko Anij ear kõpooji ñan ro rej yokwe e.”
10 Bõtab Anij ear kwal̦o̦k men kein ñan kõj ikijjeen jetõb kwõjarjar* eo an, kõnke jetõb kwõjarjar* ej kwal̦o̦k men otemjej, im ej bar kwal̦o̦k kõn men ko rem̦wilal̦ an Anij.
11 Ewõr ke en̦ emaroñ jel̦ã kõn l̦õmn̦ak ko an juon armej ijello̦kun wõt armej eo make? Ejja ãindeinl̦o̦k wõt, ejjel̦o̦k en̦ ejel̦ã kõn men ko an Anij ijello̦kun wõt jetõb kwõjarjar* eo an Anij.
12 Kiiõ jaar jab bõk jitũbõn lal̦ in, bõtab jaar bõk jetõb eo jãn Anij, bwe jen maroñ in jel̦ã kõn men ko Anij ear m̦õn̦õn̦õ in litok ñan kõj.
13 Im jej bareinwõt kwal̦o̦k kõn men kein, ejjab ikijjeen naan ko rej itok jãn mãlõtlõt an armej, bõtab ikijjeen naan ko jaar katak jãn jetõb kwõjarjar.* Jej kõm̦m̦ane men in ñe jej kõjerbal naan ko jãn jetõb kwõjarjar* ñan kõmel̦el̦eik men ko an Anij.
14 Juon eo ej mour ekkar ñan kanniõk ejjab m̦õn̦õn̦õ in l̦oor men ko jetõb kwõjarjar* eo an Anij ej kwal̦o̦ki, kõnke ej watõki menin bwebwe. Ejjab maroñ jel̦ã kõn men kein, kõnke ej aikuj etali ikijjeen jipañ eo jãn jetõb kwõjarjar.*
15 Bõtab juon eo ej mour ekkar ñan tõl eo an jetõb kwõjarjar,* emaroñ etale men otemjej, ijoke ejjel̦o̦k jabdewõt armej ej ekajete armej in.
16 Bwe “wõn ejel̦ã kõn l̦õmn̦ak ko an Jeova* bwe en maroñ in itõn katakini?” Ijoke kõj jej bõk l̦õmn̦ak ko an Christ.
Footnotes
^ Lale “Jetõb kwõjarjar” ilo Kõmel̦el̦e Ko.
^ Lale “Jukjukun pãd” ilo Kõmel̦el̦e Ko.
^ Lale “Jukjukun pãd” ilo Kõmel̦el̦e Ko.
^ Ak “dilaiki ilo jurõn al̦al̦.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
