Ilo kajjojo Betel̦, elõñ kain jerbal ko rej kõm̦m̦ani ñan lale bwe en wõnm̦aanl̦o̦k wõt jerbal in kwal̦o̦k naan ilo juon aelõñ ak elõñl̦o̦k jãn juon aelõñ. Jet iaan rein rej jerbal ãinwõt ri ukok ro. Jet iaaer rej print ak kõm̦m̦ani bok ko. Bar jet rej jerbal ilo jikin kakon̦ bok ko. Ebar wõr ro rej jerbal ilo jikin rekoot im ilo jikin kõm̦m̦an CD kab DVD. Im ro jet rej loloorjake aikuj ko jet an aelõñ kein.

Ewõr kumi ko me rej lale opij ko kajjojo an Ri Kõnnaan ro an Jeova. Em̦m̦aan ro me rej lale aolep eklejia ko ipel̦aakin lal̦ in rej kããlõt kumi ko bwe ren lale jerbal ko rej wal̦o̦k ilo ra ak opij ko kajjojo an Ri Kõnnaan ro an Jeova. Ilo kumi kein, ekkã an wõr jilu em̦m̦aan ak lõñl̦o̦k. Em̦m̦aan rein rej aikuj uwaan ro me rej lale eklejia eo. Em̦m̦aan rein rej kõjjel̦ãikl̦o̦k kumi eo me ej lale aolep eklejia ko kõn jabdewõt tõprak ko ak apañ ko rej wal̦o̦k ilo aelõñ ko rej lali. Ripoot kein rej jipañ kumi eo me ej lale aolep eklejia ko bwe ren jel̦ã katak ta ko ekkar bwe ren wal̦o̦k ilo bok ko ad, iien kweilo̦k ko ad, im bareinwõt iien kweilo̦k ko rel̦l̦ap. Kumi eo me ej lale aolep eklejia ko ipel̦aakin lal̦ in ej kããlõt jet em̦m̦aan ro bwe ren ilo̦k im lol̦o̦k ra ko wõj. Rej ilo̦k im lel̦o̦k naan in tõl ko ñan em̦m̦aan ro me rej lale ra ko. (Jabõn Kõnnaan 11:14) Ilo iien lol̦o̦k kein, ekkã an wõr juon iien kweilo̦k el̦ap im em̦m̦aan in me ear lotok ra eo ej kwal̦o̦k juon katak me el̦ap an kakajoor armej ro wõj me rej pãd ium̦win ra eo.

Rej jipañ eklejia ko me rej pãd ium̦win ra eo. Ilo kajjojo ra ko, em̦õj kappeik jet em̦m̦aan ro bwe ren kõweeppãni pepe ko ñan kajutak eklejia ko rekããl. Em̦m̦aan rein rej bar bõk eddon jerbal ko an pioneer ro, mejinede ro, im em̦m̦aan ro me rej itoitak im lol̦o̦k eklejia ko kajjojo ium̦win ra eo. Rej bareinwõt kõm̦m̦ani karõk ko bwe en wõr kweilo̦k ko rel̦l̦ap im loloorjake jerbal in ekkal Im̦õn Kweilo̦k ko rekããl. Em̦m̦aan rein rej bareinwõt kõm̦m̦an karõk ko ñan jilkinl̦o̦k bok ko ñan eklejia ko kajjojo. Aolep jerbal ko ilo Betel̦ rej jipañ bwe en l̦ap tõprak ko im en lukkuun kon̦ jerbal in kwal̦o̦k naan.​—1 Korint 14:33, 40.

• Em̦m̦aan ro me rej lale opij ko kajjojo an Ri Kõnnaan ro an Jeova rej jipañ Kumi eo me Ej Lale Aolep Eklejia ko ipel̦aakin lal̦ in. Ewi wãween?

• Ta jerbal ko rej kõm̦m̦ani ilo ra ak opij ko an Ri Kõnnaan ro an Jeova?