Ennaan eo Jesus ear kwal̦o̦ke ear juon ennaan kõn aenõm̦m̦an. Bõtab juon iien, ear ba ñan ri-kal̦oor ro an: “Kom̦win jab l̦õmn̦ak bwe iar itok bwe in bõktok aenõm̦m̦an ñan lal̦ in. Iar jab itõn bõktok aenõm̦m̦an, ak iar itõn bõktok jãje. Iar itok bwe in kõjepel ro uwaan baam̦le ko. L̦õm̦aro renaaj jum̦aik ro jemãer, lim̦aro renaaj jum̦aik ro jineer, im lim̦aro renaaj jum̦aik jinen l̦õm̦aro pãleer.” (Matu 10:34, 35) Ta mel̦el̦ein an kar Jesus ba naan kein?

Jesus ear jab kõn̦aan kõjepel baam̦le ko jãn doon, bõtab ear jel̦a bwe katak ko an renaaj kõm̦m̦an bwe en wõr jepel ilowaan jet baam̦le. Kõn men in, ro me rekõn̦aan erom ri-kal̦ooran Jesus im peptaij renaaj aikuj mel̦el̦e kõn ta ko remaroñ wal̦o̦k itok wõt jãn pepe in aer. El̦aññe rej iioon jum̦ae jãn eo pãleer me ejjab juon rũttõmak ak jãn ro jet ilo baam̦le eo, men in emaroñ kõm̦m̦an bwe en pen aer dãpij wõt aer tiljek im l̦oori katak ko an Jesus.

Baibõl̦ eo ej rõjañ Kũrjin ro bwe ren “aenõm̦m̦an ippãn armej otemjej.” (Rom 12:18) Bõtab katak ko an Jesus remaroñ ãinwõt juon “jãje” ñan jet baam̦le. Men in ej wal̦o̦k ñe juon ilo baam̦le eo ej m̦õn̦õn̦õ in eo̦roñ katak ko an Jesus ak ro jet ilo baam̦le eo rej jum̦ae ak rejjab errã kõn katak ko. Ñe men in ej wal̦o̦k, ro nukũn me rej jokwe ippãn rej oktak im “kõjdate” eo me ej katak kõn m̦ool eo.​—Matu 10:36.

Jet iien, ri-kal̦oor ro an Jesus me rej jokwe ippãn ro nukwier me rejjab rũttõmak rej iioone wãween ko rej mãlejjoñe yokwe eo aer ñan Jeova im Jesus. Ñan waanjoñak, rein nukwier remaroñ kajjioñ iuuni er ñan bõk kun̦aaer ilo juon iaan holiday ko an kabuñ ko. Ñe men in ej wal̦o̦k, wõn eo renaaj kabuñbũruon? Jesus ear ba: “Jabdewõt eo el̦apl̦o̦k an yokwe jemãn ak jinen jãn ña, ejekkar bwe en ri-kal̦oora.” (Matu 10:37) Alikkar bwe Jesus ear jab ba bwe ñan an juon maroñ erom ri-kal̦ooran, ej aikuj dikl̦o̦k aer yokwe jemãer im jineer. Bõtab, ear katakin er ñan kile ta men ko raorõkl̦o̦k ilo mour ko aer. El̦aññe ro uwaan baam̦le eo ad me rejjab rũttõmak rej jum̦ae ad kate kõj ñan kabuñ ñan Jeova, innem jej wõnm̦aanl̦o̦k wõt im yokwe er, ak jej kile bwe yokwe eo ad ñan Anij ej itok m̦oktata.

Ejjel̦o̦k pere bwe ñe jej iioon jum̦ae jãn baam̦le eo ad, men in emaroñ lukkuun kõmetak kõj. Meñe ãindein, ak ri-kal̦oor ro an Jesus rej keememej wõt naan kein an, ke ear ba: “Jabdewõt eo ejjab ineek al̦al̦ in eñtaan eo an im l̦oor eõ, ejekkar bwe en ri-kal̦oora.” (Matu 10:38) Ilo bar juon wãween, Kũrjin ro rej watõk bwe an baam̦le eo aer jum̦aik er, eñin ej juon iaan wãween ko reppen me ri-kal̦oor ro an Jesus rej m̦õn̦õn̦õ in kijenmej ium̦win. Bõtab ilo ejja iien eo wõt, rej kõjatdikdik bwe kõm̦m̦an ko aer rem̦m̦an enaaj kõm̦akũt ro uwaan baam̦le eo aer me rejjab rũttõmak ñan ukot l̦õmn̦ak ko aer im kõn̦aan katak kõn ennaan eo ilo Baibõl̦.​—1 Pit. 3:1, 2.