Ium̦win elõñ to̦ujin iiõ ko, ejjel̦o̦k en̦ ear lukkuun jel̦ã uwaak eo ñan kajjitõk in. Kõn men in nañinmej ko rekapopo rar ajeededl̦o̦k im bõk mour ko an elõñ milien armej. Bõtab tokãlik, jaintiij ro rar lo uwaakin kajjitõk in. Rej kwal̦o̦k bwe ekkã an nañinmej ko wal̦o̦k jãn kij ko reddik​—bacteria ak virus ko. Kõn aer kar lo m̦ool eo kõn uwaakin kajjitõk in, men in ear jipañ armej ro ñan aer maroñ bõbrae im kõm̦adm̦õde elõñ kain nañinmej ko, im ear kõm̦m̦an bwe elõñ pilien armej ro en aetokl̦o̦k aer mour im bwe ren ãjmourl̦o̦k.

Ta kõn kajjitõk ko jet raorõk? Ewi wãween am̦ l̦õmn̦ak, am̦ pukot m̦ool eo kõn uwaakin kajjitõk kein emaroñ ke jelõt wãween am̦ mour?

• Wõn Anij?

• Wõn Jesus Christ?

• Ta in Aelõñ eo an Anij?

• Ta kobban ilju im jekl̦aj?

Elõñ milien armej ro em̦õj aer lo uwaak ko ñan kajjitõk kein, im ear em̦m̦anl̦o̦k wãween aer mour. Kwe bareinwõt kwõmaroñ bõk tokjãn jãn uwaak ko ñan kajjitõk kein.

Kwõmaroñ l̦õmn̦ak ippam̦ make, ‘Jemaroñ ke lukkuun lo m̦ool eo kõn aolep men?’ Ilo m̦ool, elukkuun alikkar an penl̦o̦k ad pukote m̦ool eo kõn elõñl̦o̦k men ko. Etke?

Elõñ armej ro rejjab lõke kien ko, peejnej ko, ak nuuj ko ñan kwal̦o̦k m̦ool eo ñan er. Epen aer kile ñan jel̦ã oktak eo ikõtaan men ko rem̦ool im l̦õmn̦ak ko an armej, mel̦el̦e ko me jimattanier wõt rem̦ool, kab mel̦el̦e ko me rej m̦on̦e armej. Im kõn an armej jab lõke doon im kõn an lõñ mel̦el̦e ko reriab, rejjab errã ippãn doon ilo wãween aer kwal̦o̦k kõn ta ko rem̦ool im rejjab juon wõt l̦õmn̦ak kõn ta ko rem̦ool.

Ijoke, meñe emaroñ pen, bõtab kwõmaroñ lo uwaak ko rem̦ool kõn kajjitõk ko el̦ap aer aorõk ikijjeen mour. Ewi wãween? Ikijjeen am̦ kõjerbal ejja wãween ko wõt kwõj bar kõjerbali ilo mour eo am̦ aolep raan.

Armej rej kate er ñan kappukote m̦ool eo aolep raan. L̦õmn̦ak kõn wãween eo Jessica ear jelm̦aiki. Ej ba, “Joñan an l̦ap an ledik eo nejũ kadeke pinõt, jekdo̦o̦n ñe m̦õñã ko me ewõr jijinniñniñ wõt kãre in pinõt ie ak emaroñ mej kaki.” Jessica ej aikuj jel̦ã ñe m̦õñã eo ej wiaiki enãj ekkar ñan ledik eo nejin. Ej ba, “Men eo m̦oktata ij kõm̦m̦ane, ij riiti mel̦el̦e ko ilo kilin m̦õñã eo im lukkuun etale kãre ko ie. Ãlikin, ij bar kõm̦m̦an etale ko, joñan ij kajjioñ tõpar kom̦bani eo me kar kõm̦m̦ane m̦õñã eo ie bwe in lukkuun lale ñe rar baj jirilo̦k im kãreik jidik pinõt ie. Ij bar lale kein jipañ ko jet me remaroñ kam̦oole bwe elukkuun em̦m̦an an kom̦bani eo kijoñ lukkuun kõjparok wãween aer kõm̦m̦ani m̦õñã ko.”

Men ko kwõj pukot m̦ool eo kaki kajjojo raan remaroñ jab l̦apin aer menin aikuj wõt men eo Jessica ej etale, bõtab ãinwõt Jessica kwõmaroñ kõjerbali wãween ko ear kõm̦m̦ani ñan kappukot uwaakin kajjitõk ko am̦:

• Pukot mel̦el̦e ko rem̦ool.

• Kõm̦m̦an etale ko jet.

• Lukkuun lale bwe kein jipañ ko kwõj bõk jipañ jãni ren jet kein jipañ ko kwõmaroñ lõki.

Ilo ejja wãween in wõt emaroñ jipañ eok ñan pukot uwaak ko rem̦ool ñan kajjitõk ko rel̦l̦ap kõn mour. Ewi wãween?

Ke Jessica ear kappukot katak ko rem̦ool jãn Baibõl̦, ear kõjerbale ejja wãween ko wõt ej kõm̦m̦ani ke ej kappok mel̦el̦e ko kõn m̦õñã eo ledik eo nejin ej kadeke. Ej ba, “Aõ kar lukkuun riit im tiljek ilo aõ kõm̦m̦an etale ko ear jipañ eõ ñan lo m̦ool eo jãn Baibõl̦.” Ãinwõt Jessica, elõñ milien armej ro em̦õj aer katak kõn ta eo Baibõl̦ ej ba kõn kajjitõk kein:

• Etke jej mour?

• Ta eo ej wal̦o̦k ñe jej mej?

• Etke ej wõr eñtaan?

• Ta eo Anij enaaj kõm̦m̦ane ñan jol̦o̦k aolep eñtaan?

• Ewi wãween bwe baam̦le eo ad en lem̦õn̦õn̦õ?

Kwõmaroñ lo uwaak ko rem̦ool ñan kajjitõk kein im kajjitõk ko jet ikijjeen am̦ riiti Baibõl̦ eo im kõm̦m̦an etale ko jet ilo weepjait eo www.ps8318.com.